irqqasn 5 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

حانانيّا د‑سافّيرا

¹ ءيلّا يان‑ورگاز ءيسم‑نس حانانيّا، نتّا د‑تمغارت‑نس سافّيرا. ءيزّنزا يان‑يگر،

² ءيحضو ءي‑يخف‑نس كرا زغ‑مايلّي گيس يومژ، ءيسرس ما‑يقامان غ‑لگدّام ن‑يرقّاسن. د‑تمغارت‑نس، ءيلّا كولّو مايان غ‑وگايّو‑نس.

³ ءينكر بطرُس ييني‑اس: «وا‑حانانيّا، ماخ ايلّيغ تودجيت شيطان ا‑يكشم س‑وول‑نّك باش ا‑تسّكاركست ف‑رّوح لقودوس تحضوت كرا زغ‑مايلّي تومژت غ‑يگر‑نّك؟

⁴ لّيغ ءور‑تا‑ينزي وينّك ا‑يگا، ءيمّا لّيغ ءينزا هاتي مايلّي گيس تومژت ءيلّا سول غ‑وفوس‑نّك ا‑سرس‑تسكرت اينّا تريت. ماخ ايلّيغ تقصادت غاياد غ‑وول‑نّك؟ هاتي ءورد بنادم ا‑ف‑تسّكاركست، والاينّي تسّكاركست ف‑ربّي.»

⁵ غير ءيسفلد حانانيّا ءي‑ماياد س‑يضر س‑واكال ءيمّت. غووضن كولّو ويلّي سفلدنين ءي‑ما‑يجران.

⁶ نكرن ءيلمّا ءيعيّالن، لسن‑اس لكفن اسين‑ت مضلن‑ت‑ين.

⁷ زرينت كراطّ تاساعين س‑دي‑تكشم‑تمغارت‑نس، ءور‑تسّين ما‑يجران.

⁸ ءيسقسا‑تّ بطرُس: «ءيني‑يّي، ءيزد غونشكاد ا‑تومژم غ‑يگر‑نّون؟» تيني‑اس: «غونشكان ا‑يلّان.»

⁹ ءيزايد بطرُس ييني‑اس: «ماخ ايلّيغ تسوانگمّ ا‑ستّي‑تزّريم ف‑رّوح ن‑ربّي؟ هاتنين غ‑يمي، غويلّي‑ن‑مضلنين ارگاز‑نّم. را‑كم‑اسين ءولا كمّي.»

¹⁰ غاكودان ا‑تضر س‑واكال غ‑لگدّام‑نس تمّت. كشمن‑د ءيعيّالن افن‑تّ‑يد تمّوت، اسين‑تّ مضلن‑تّ‑ين غ‑تاما ن‑ورگاز‑نس.

¹¹ غووضن كولّو ايت‑ومناگّار باهرا، نتني ءولا كولّو وييّاض لّي‑سفلدنين ف‑ما‑يجران.

لمعجيزات ن‑يرقّاسن

¹² ءيسكر ربّي لمعجيزات د‑تميتار گّوتنين ف‑يفاسّن ن‑يرقّاسن غ‑دار ايت‑تمدينت‑ان. ار‑ن‑تمونون ءيمومنّ كولّوتن غ‑ودغار لّي‑مي‑تّينين ‹الحني ن‑سوليمان›.

¹³ واخّا دا‑تن‑تالغن كولّو مدّن، ءور‑يزعم يان ءور‑يگين امومن ا‑ديدسن‑يمون.

¹⁴ والاينّي ار‑تّيگاتن ايت‑ومناگّار، ءيرگازن ءولا تيمغارين لّي‑ومنّين س‑سيديتنّغ.

¹⁵ لّيغ ژران ايت‑تمدينت كولّو ماياد، ار‑د‑سّوفوغن ءيموضان‑نسن س‑تسواك، ار‑تن‑سراسن ف‑يبردان‑نسن ءولا ءيمجدان‑نسن، ار‑ترجون ا‑يزري بطرُس ءيضر‑د‑ومالو‑نس ف‑كرا گيسن.

¹⁶ ءيگّوت ما‑د‑يتّاشكين زغ‑يدوران ن‑تسگيو ن‑وروشاليم، ار‑دي‑تاوين ءيموضان د‑يمجنان، ار‑كولّو‑تجّين.

بطرُس د‑يوحانّا غ‑لحبس

¹⁷ ءيمّا انمغور ن‑تگمّي ن‑ربّي د‑يمدّوكُّال‑نس كولّوتن لّمدهب ن‑يصادّوقين، طيّر‑اسن باهرا اشكو فرحن مدّن س‑يرقّاسن ءوگُّار‑نسن نتني.

¹⁸ امژن‑تن غاكودان گن‑تن‑ين غ‑لحبس غ‑گر ويلّي فّوغنين لقانون.

¹⁹ والاينّي غ‑يض‑ان يوشكا‑د يا‑لّمالاك ن‑سيدي ربّي، ءيرژم تيفلوين لّحبس ءيسّوفغ‑د ءيرقّاسن ييني‑اسن:

²⁰ «زايدات تبيدّم غ‑تگمّي ن‑ربّي، تساولم ءي‑مدّن ف‑كولّو ما‑يگان وين‑وغاراس ن‑تودرت‑اد لّجديد.»

²¹ لّيغ‑د‑يغلي‑واسّ، سكرن ءيرقّاسن س‑واوال‑نس، كشمن س‑تگمّي ن‑ربّي ار‑سّلمادن مدّن. لّيغ ءينكر‑ونمغور ن‑تگمّي ن‑ربّي د‑يمدّوكُّال‑نس، سّمونّ‑د ءيمغارن لّمحكاما ن‑ايت‑ربّي كولّوتن، ازنّ س‑لحبس اد‑د‑اوين ءيرقّاسن س‑دارسن.

²² والاينّي لّيغ كشمن ءيمخزنيين س‑لحبس ءور‑تن‑ين‑وفين، وورّين س‑لمحكاما ءينين‑اسن:

²³ «نوفا‑ن لحبس ءيقّن، رگلنت‑تفلوين‑نس، بيدّن ءينگابالن كولّوتن غ‑تاما ن‑يماون، والاينّي لّيغ‑تن‑نرژم ءور‑ن‑نوفي يان غ‑وگُنس.»

²⁴ لّيغ سفلدن ءينمغورن د‑لقبطان ن‑يمخزنيين ن‑تگمّي ن‑ربّي ءي‑ماد‑نّان، گامّين اد‑فهمن ما‑يجران. ار‑تّينين ءي‑نگراتسن: «ما‑را‑د‑يگُّرو ءي‑غاياد؟»

²⁵ غاكودان ءيكشم دارسن يان‑ورگاز ييني‑اسن: «هان غويلّي‑ن‑تگام غ‑لحبس، بيدّن غ‑تگمّي ن‑ربّي ار‑سّلمادن مدّن.»

²⁶ ءيفّوغ لقبطان د‑يمخزنيين‑نس غاكودان، اوين‑د ءيرقّاسن س‑دارسن، والاينّي ءور‑تن‑سّرفوفنّ اشكو كسوضن زغ‑ايت‑تمدينت ا‑گيسن‑برّمن س‑يژران.

ءيرقّاسن غ‑لمحكاما

²⁷ شّكشمن‑تن سّبيدّن‑تن‑ين غ‑لگدّام ن‑ايت‑لمحكاما. ءينكر‑ونمغور ن‑تگمّي ن‑ربّي غاكودان ييني‑اسن:

²⁸ «ءيس‑ور‑كُن‑نومر ا‑ور‑تسّلمادم س‑يسم‑ان؟ ءيمّا كونّي مايد تسكرم غيلاد؟ هاتي تعمّرم ءوروشاليم س‑ولمّود‑نّون، تيريم اد‑اغ‑تقلّدم س‑يدامّن ن‑ورگاز‑ان.»

²⁹ ءيساول بطرُس ءولا ءيرقّاسن ءينين: «ءيقّان‑اغ‑د ا‑نسكار س‑واوال ن‑ربّي ءوگُّار ن‑واوال ن‑بنادم.

³⁰ اشكو ربّي ن‑يمزوورا‑نّغ ءيسّنكر‑د ياسوع لّي‑تنغام ف‑وگّجدي.

³¹ ءيسّاتّوي‑ت س‑وفاسيي‑نس باش ا‑يگ اگلّيد د‑ونجّام ءي‑ايت‑ربّي، ءيسكر‑اسن اغاراس ما‑س‑ا‑دي‑توورّين زغ‑كولّو ما‑يُخشنّ، ءيسّيتّي فلّاسن دّنوب‑نسن.

³² كولّو ماياد، ار‑فلّاس‑ناكّا توگّا‑نّغ نكُّني ءولا رّوح لقودوس لّي‑د‑يوزن ربّي ءي‑ويلّي سكارنين س‑واوال‑نس.»

³³ لّيغ سفلدن ايت‑لمحكاما ءي‑ماياد، نكرن‑د گيسن ءيريين باهرا، ءيرين اد‑نغن ءيرقّاسن.

³⁴ والاينّي ءينكر يان گيسن غ‑وامّاس لّمحكاما، ءيسم‑نس گاماليال. ءيگا زغ‑لمدهب ن‑يفاريسين، ءيگ امسلمد ن‑شّرع، ار‑تي‑توقّارن مدّن كولّوتن. ييني‑اسن اد‑سّوفغن ءيرقّاسن يان ءيميكّ.

³⁵ ءيساول ءيلمّا د‑ايت‑لمحكاما ييني‑اسن: «وا‑يرگازن ايت‑ربّي، سوانگمات باهرا ءور‑تا‑تسكيرم كرا ءي‑مدّن‑اد.

³⁶ ا‑ور‑تتّوم توداس لّي‑د‑يوشكان ءيسگُّاسن‑اد زرينين، ءينّا ءيس‑يگا كرا ءيهيّان. ءيمون ديدس ما‑يتگّان كّوژ ءيد‑ميّا (400) ن‑ورگاز. والاينّي ءيتياونغا، اكوتن كولّو ويلّي ديدس لّانين، ءور‑يقاما يات غ‑ما‑يناول.

³⁷ تيگيرا‑نس يوشكا‑د ياهودا گو‑جاليل غ‑وزمز لّي‑غ‑حاسبن كولّو ايت‑تمازيرت، ياوي ديدس مدّن گّوتنين. ءولا نتّان ءيتياونغا، اكوتن غويلّي ديدس مونّين.

³⁸ ف‑مايان ا‑ف‑راد‑اون‑ينيغ، اد‑ور‑تژيم د‑مدّن‑اد. ادجات‑تن اد‑دّون. اشكو مايد ناولن ءولا مايد سكارن، ءيغ‑يگا وين بنادم را‑يضر.

³⁹ والاينّي ءيغ‑يگا وين ربّي، ءور‑را‑تيژضارم ا‑تن‑تنروم. هان ا‑ور‑ن‑تافم ءيخفاون‑نّون غ‑يسيگُّرا ءيس‑ا‑تّژيم د‑ربّي.» سكرن ءيلمّا س‑ماد‑اسن‑ينّا گاماليال،

⁴⁰ غرن‑د ءي‑يرقّاسن سّغورشن‑تن، امرن‑تن ا‑ور‑داغ‑ساوالن س‑يسم ن‑ياسوع، رژمن‑اسن.

⁴¹ فّوغن ءيرقّاسن زغ‑لمحكاما، فرحن باهرا اشكو ءيگا‑تن ربّي د‑ويد‑ف‑يرضا ايلّيغ رفوفنّ ف‑يسم ن‑ياسوع.

⁴² زايدن ءيلمّا اسّ ف‑واسّ ار‑سّلمادن غ‑تگمّي ن‑ربّي ءولا غ‑تگُمّا ن‑مدّن، ار‑تبرّاحن س‑لخبار ءيفولكين ن‑ياسوع، ار‑تّينين ءيزد نتّان ا‑يگان لماسيح ن‑ربّي.