irqqasn 27 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

امودّو ن‑بولُس س‑روما

¹ سكرن غاكودان ف‑اد‑اغ‑ازنّ غ‑ومدا س‑تمازيرت ن‑يطاليا. فكن بولُس د‑كرا ن‑يحبّاسن ياضني غ‑وفوس ن‑يا‑لّقبطان ن‑يعسكرين ءيسم‑نس يوليوس، ءيگا زغ‑‹رّبعت ن‑قايصر›.

² نغلي س‑يان‑واناو ءيكّا‑د تامدينت ن‑ادراميتا، ييري لمرسات لّي‑لّانين غ‑تسگيو ن‑اسيّا. ءيمون ديدنّغ اريستارخوس، ءيگا گو‑ماكيدونيّا زغ‑تمدينت ن‑تاسالونيكي. نفّوغ نسّودو غ‑ومدا.

³ نديد ازكّا نلكم لمرسا ن‑صايدا. يوليوس ءيسكر لخير غ‑بولُس، يادج‑ت ا‑يدّو س‑دار ءيمدّوكُّال‑نس غ‑تمدينت‑ان باش اد‑اس‑فكن ما‑ت‑يخصّان.

⁴ نزايد ءيلمّا نفّوغ غ‑ومدا، نزري زغ‑تسگا ءينتلن ن‑يگزير ن‑قوبروس اشكو ءيضاضّ‑اغ‑واضو.

⁵ نبّي امدا غ‑تاما ن‑كيليكيّا د‑بامفيليّا ايلّيغ نلكم لمرسا ن‑ميرا غ‑تمازيرت ن‑ليكيّا.

⁶ ياف غين لقبطان يان‑واناو ياضني، ءيكّا‑د ءيسكانداريّا ييري تامازيرت ن‑يطاليا، ءيسّغلي‑اغ سرس.

⁷ كيگان د‑ووسّان ءور‑ا‑نتزاياد غير س‑يميكّ، ايلّيغ بحرا ءور‑نلكيم تاما لّمرسا ن‑كنيدوس. ءور‑اغ‑يودجي‑واضو ا‑نكمّل س‑تسگا‑يان. نك ءيلمّا تاسگا ءينتلن ن‑يگزير ن‑كريت، نزري زغ‑تاما ن‑وجاريف ن‑سالموني.

⁸ نزايد س‑تكرّايت، نحادا اكال ايلّيغ نلكم يان‑ماني لّي‑مي‑تّينين ‹ءيد‑ونتال شوانين›، ياكمور س‑تمدينت ن‑لاسايّا.

⁹ نسّن غ‑وزمز‑ان ءيس‑را‑يشقو لحال ءيغ‑نزوويد غ‑ومودّو‑نّغ، اشكو نماطل باهرا، ءيزري فلّانّغ لعيد ن‑وژوم. غاكودان ا‑ينكر بولُس ءيساول س‑مدّن س‑لمعقول ييني‑اسن:

¹⁰ «وا‑يرگازن، ءيبان ءيس‑را‑يشقو‑ومودّو‑نّغ باهرا غيلاد. ءيگّوت گينّغ ما‑را‑يتّهلك، ءورد غير سّلاعت ءولا اناو والاينّي ءولا تودرت‑نّغ نكُّني.»

¹¹ ءيمّا لقبطان ن‑يعسكرين ءور‑سرس‑يسفلد. ءيسكر س‑ما‑ينّا رّايس ن‑واناو د‑باب‑نس. تمژّي لمرسا لّي‑غ‑نلّا، ءور‑تشوي ا‑گيس‑نقاما غ‑وزمز ن‑تگرست.

¹² ءيمشاشكا‑د ما‑يگّوتن غ‑ايت‑واناو ا‑نسّودو زغ‑غين، نارم ءيس‑نژضار ا‑نروح فينيكس ا‑ن‑گيس‑نزّري تاگرست. تگا فينيكس يات لمرسا غ‑يگزير ن‑كريت، ءيحكام‑تّ‑وغربي زغ‑وفاسي ءولا اژلماض.

اضو ءيتجهّدن د‑ومدا ءيدووين

¹³ ءيصوض‑د ءيميكّ ن‑وزوزوو زغ‑لجانوب، ءيرواس‑اسن ءيس‑يوورّي لحال ءيگا غمكلّي ران. سّوكفن ءيلمّا اگّوس ا‑نسّودو. نزايد نحادا اكال ن‑كريت، ءور‑ديدس‑نمگالّاي يات.

¹⁴ ءيميل ءينكر‑د‑واضو لّي‑مي‑تّينين ‹اژلماض ءي‑وسغلاي› ار‑د‑يصواض س‑جّهد زغ‑تسگا ن‑يگزير.

¹⁵ ار‑يكّات اناو ايلّيغ ءور‑سول‑نژضار ا‑نزايد س‑تسگا‑يان، نادج اناو ا‑ت‑يدحاي‑واضو.

¹⁶ لّيغ نزري غ‑ونتال ن‑تگزيرت ن‑كودا، مّاغن ءيباحريين اد‑قّنّ تاناوت لّي‑يزوكور‑واناو.

¹⁷ الّن‑تّ‑يد س‑يگّي ن‑واناو، سّلولّين ءيلمّا ءيزاكارن ءي‑والّاغ ن‑واناو باش ا‑ت‑سّدوسن. كسوضن ا‑يوت يورار ن‑وملال لّي‑لّانين غ‑دّو‑وامان غ‑تاما ن‑سيرتيس. ادرن ءي‑لقلوع، ادجن اناو ا‑ت‑يدحاي‑واضو.

¹⁸ والاينّي ءيزوويد‑واضو د‑ومدا س‑وگُّار ايلّيغ نكرن ءيباحريين غ‑ويس سين‑ووسّان ار‑ن‑تلوحن سّلاعت غ‑ومدا.

¹⁹ ويس كراض‑ووسّان اسين ءولا ءيماسّن ن‑واناو لوحن‑تن‑ين غ‑ومدا.

²⁰ منّاو‑ووسّان ءور‑ا‑ياغ‑تّبان تافوكت ءولا ءيتران، ار‑سول‑يصواض‑واضو س‑جّهد ايلّيغ ننّا ءور‑نژضار ا‑ننجم.

²¹ نتني ءور‑سول‑ا‑شتّان يات غ‑ووسّان‑ان، ءينكر بولُس ءيبيدّ غ‑وامّاس‑نسن ييني: «وا‑يرگازن، مراد ءيس‑سري‑تسفلدم، ءيكون ءور‑د‑نفّوغ كريت ءولا ترفوفنم غمكاد ءولا تسّخسرم كولّو ماياد.

²² ءيمّا غيلاد راد‑اون‑ينيغ، تهنّايات. هاتي ءور‑را‑يمّت يان گيگون. غير اناو ا‑را‑يتّهلك.

²³ اشكو غ‑يض‑اد ءيبيدّ‑د سري يا‑لّمالاك ن‑ربّي لّي‑مي‑گيغ وينس ار‑تي‑تعبادغ،

²⁴ ييني‑يّي: ‹وا‑بولُس، اد‑ور‑تيكساطّ. هاتي ءيقّان‑ك‑يد ا‑تبيدّت غ‑لگدّام ن‑قايصر. ءيفكا‑ياك ربّي ا‑ور‑يمّت يان زغ‑غويلّي ديدك مودّانين.›

²⁵ تهنّايات غيلاد ا‑يرگازن، اشكو ءومنغ ربّي ءيس‑را‑ييلي غمكلّي‑س‑يّي‑د‑ينّا.

²⁶ والاينّي ءيقّان‑د ا‑ن‑نضر غ‑كرا ن‑يگزير.»

²⁷ ويس كّوژ د‑مراو ن‑واسّ، سول ءوكان ا‑ياغ‑يدحاي‑واضو غ‑وامّاس ن‑ومدا ن‑ادريّا. غ‑طوژّونت ن‑يض‑ان ءيرواس ءي‑يباحريين ءيس‑ناكمور س‑كرا ن‑واكال.

²⁸ ءيرين اد‑يسّانّ تادروت ن‑ومدا غين. گرن‑ين ءيزيكر، ييلي غ‑يخف‑نس كرا ن‑ووزّال، افن‑ين گيس كّوژ ءيد‑مراو ن‑ميترو. ءيميكّ گرن‑ت‑ين‑داغ، افن‑ين گيس كراض ءيد‑مراو ن‑ميترو.

²⁹ كسوضن ا‑يوت‑واناو كرا ن‑وجاريف، لوحن‑ين كّوژ ءيگّوسن زغ‑تغوردين‑نس، ار‑ن‑ترجون ا‑دي‑تاكمور‑تواغلا ن‑تافوكت.

³⁰ سكرن ءيلمّا ءيباحريين ف‑اد‑روولن زغ‑واناو. زّوگزن تاناوت س‑وامان زوند ءيغ‑ران ا‑ن‑لوحن كرا ن‑يگّوسن زغ‑لگدّام ن‑واناو.

³¹ والاينّي ءيساول بولُس س‑لقبطان د‑يعسكرين ييني‑اسن: «ءيغ‑ور‑ديدون‑قامان ءيباحريين غ‑واناو ءور‑را‑تيژضارم ا‑تنجمّ.»

³² نكرن ءيعسكرين غاكودان، بّين ءيزاكارن ن‑تاناوت، ادجن‑تّ‑ين غ‑ومدا.

³³ لّيغ‑د‑ياكمور ا‑يفاو‑واسّ ءيساول سرسن بولُس كولّوتن ءيضالب‑تن اد‑شّن ييني‑اسن: «هاتي كّوژ د‑مراو ن‑واسّ اياد توسيم تاغوفت باهرا ءور‑تشّيم يات.

³⁴ ضالبغ‑كُن غيلاد ا‑تامژم ءيميكّ ن‑ومشّو. ءيخصّا‑كُن ا‑تسّدوسم ءيخفاون‑نّون، اشكو ءور‑اكُّ‑را‑يتّهلك يان‑ونژاض ن‑يگويّا‑نّون.»

³⁵ لّيغ‑اسن‑ينّا ماياد، ياسي اغروم، ءيشكر ربّي غ‑لگدّام‑نسن ءيبّي‑ت ار‑يشتّا.

³⁶ زعمن ءولا نتني غاكودان، بدون ار‑شتّان.

³⁷ نگا نكُّني سين ءيد‑ميّا د‑سّا ن‑يد‑مراو د‑سضيص (276) غ‑واناو.

³⁸ لّيغ شبعان كولّوتن، لوحن‑ين ءيردن لّي‑قامانين باش اد‑سّيفسوسن ف‑واناو.

غمكلّي لكمن اكال

³⁹ لّيغ‑د‑يغلي‑واسّ ءور‑سّينّ ءيباحريين مان اكال اد‑لكمن، والاينّي ژران يات‑تدغارت ياستوان ن‑وملال غ‑گر ءيجاريفن. سوانگمن ا‑سرس‑اوين اناو ءيغ‑ژضارن.

⁴⁰ بّين ءيزاكارن ن‑يگّوسن فلن‑تن غ‑ومدا، رژمن ءي‑يزاكارن ن‑تفلوين لّي‑س‑ا‑تگوّادن اناو. الّن لقلع ءيمژّين غ‑لگدّام ن‑واناو باش ا‑ت‑يدحي‑واضو س‑لگدّام. ناكمور س‑واكال،

⁴¹ والاينّي ءيزري‑واناو ف‑يان‑ماني غ‑ور‑درين‑وامان. يوت املال ءيتغز زغ‑لگدّام‑نس، ءور‑يژضار ا‑سول‑يمّاسّ. ار‑تّ‑كّاتنت تاضانگيوين ايلّيغ ا‑يفسّي زغ‑تغوردين‑نس.

⁴² مشاوارن ءيعسكرين ءي‑نگراتسن، ءيرين اد‑نغن ءيحبّاسن ا‑ور‑گيسن‑يعوم كرا ن‑يان ارد ءيلكم اكال ءيروول.

⁴³ ءيمّا لقبطان ءيرا ا‑يحصار ف‑بولُس غ‑لامان، ءور‑تن‑يودجي اد‑سكرن غمكان. يامر‑تن وانّا ءيسّنّ ا‑يعوم ا‑ن‑يضر غ‑وامان ءيزوور س‑واكال.

⁴⁴ ييني ءي‑وييّاض كود يان ا‑يغوي غ‑كرا ن‑يفرش ن‑واناو نغد كرا ن‑وكشّوض. غمكان ا‑س‑كولّو‑نروح اكال س‑لامان.