irqqasn 26 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اوال ن‑بولُس غ‑لگدّام ن‑اگريبّاس

¹ ءيساول اگريبّاس س‑بولُس ييني‑اس: «را‑ك‑ادجغ ا‑تساولت غيلاد ف‑يخف‑نّك.» يالّ بولُس افوس‑نس ا‑يرار اوال ييني:

² «واي‑اگلّيد اگريبّاس، نّيغ نكّي اساعدي اد‑گيغ غاسّاد، اشكو غ‑لگدّام‑نّك ا‑غ‑بيدّغ باش اد‑رارغ اوال ف‑كولّو ما‑س‑ا‑سري‑تاشتكّان مدّن‑اد ن‑ايت‑يودايا.

³ اشكو كيّي تسّنت لعادات ن‑ايت‑يودايا ءولا ءيسوينگيمن لّي‑ف‑ا‑تمجاحادن ءي‑نگراتسن. ف‑مايان ا‑ف‑را‑ك‑ضالبغ ا‑ديدي‑تصبرت، تسفلدت ءي‑ما‑راد‑اك‑ينيغ.

⁴ اشكو كولّو ايت‑يودايا سّنّ مامنك اد‑گيغ زغ‑لّيغ مژّيغ غ‑تمازيرت‑ينو ءولا تيگيرا ن‑مايان غ‑وروشاليم.

⁵ كيگان د‑يسگُّاسن ايد‑يّي‑سّنّ. ژضارن اد‑اك‑فلّا‑فكن توگّا ءيغ‑ران نتني، ءينين‑اك ءيس‑گيغ واد ءيسكارن س‑تنباضين ن‑يفاريسين لّي‑يگان لمدهب كولّو ءينوكمان غ‑دّين‑نّغ.

⁶ ءيمّا غيلاد بيدّغ غيد ا‑فلّا‑تحكامت ف‑سّيبت ن‑رّجا لّي‑داري‑يلّان، اشكو ءومنغ اوال لّي‑ينّا ربّي ءي‑يمزوورا‑نّغ.

⁷ اوال‑ان ا‑غ‑ا‑ن‑كولّو‑ترجونت‑تقبيلين‑نّغ س‑سنات د‑مراوت، لّيغ ا‑تعبادن ربّي غيلاد س‑نّييت‑نسن غ‑ييض ءولا ازال. واي‑اگلّيد ءيعزّان، هاتي ف‑رّجا‑ياد ا‑س‑ا‑سري‑تاشتكّان ايت‑يودايا.

⁸ ءيمّا كونّي، ماخ ايلّيغ ءور‑تريم ا‑تامنم ءيس‑يژضار ربّي ا‑د‑يسّنكر غويلّي مّوتنين؟

⁹ «كّيغ‑تّين ءولا نكّي ار‑تّينيغ ءيلّا فلّا ا‑ن‑گغ تيقّي‑نو اد‑تضاضّاغ كولّو ما‑يگان وين ءيسم ن‑ياسوع گو‑ناصيرا.

¹⁰ غمكان اد‑سكارغ غ‑وروشاليم. ضالبغ زغ‑ينمغورن ن‑تگمّي ن‑ربّي اد‑يّي‑فكن اوال ا‑ن‑تقّنغ ءي‑ما‑يگّوتن غ‑يمژلاين ن‑ربّي غ‑لحبس. غاكود نّا‑فلّاسن‑حكامن س‑لموت، ار‑تّينيغ نتّات اد‑اسن‑يگان.

¹¹ كيگان د‑توال اد‑كشّمغ س‑تگُمّا ن‑تژالّيت ار‑تن‑سّرفوفونغ باش ا‑تن‑رارغ اد‑رگّمن غ‑وغاراس‑اد. ار‑يّي‑سرسن‑تاسين ءيريين باهرا ايلّيغ ا‑سرسن‑تمودّوغ ءولا س‑تمدينين اگّوگنين باش ا‑تن‑سّرفوفنغ.

غمكلّي يوورّي بولُس يومن س‑لماسيح

¹² «غايان ا‑ف‑ومژغ اغاراس س‑ديماشق س‑واوال ن‑ينمغورن ن‑تگمّي ن‑ربّي ءولا لوصيت‑نسن.

¹³ واي‑اگلّيد ءيعزّان، سّوديغ غ‑وغاراس‑ان غ‑طوژّونت ن‑واسّ س‑يّي‑دي‑تبان يات تيفاوت زغ‑يگنوان تجهّد ءوگُّار ن‑تافوكت، تسفاو فلّا نكّي ءولا غويلّي‑د‑مونغ.

¹⁴ نضر كولّواغ س‑واكال، س‑سفلدغ ءي‑يان ءينّا‑يّي‑د س‑واوال ن‑ايت‑يودايا: ‹شاول شاول، ماخ ا‑يّي‑تسّرفوفونت؟ هان ار‑تسّياگّاست ءيخف‑نّك لّيغ ا‑تسّفوقوست ف‑وكوراي.›

¹⁵ ءينيغ: ‹وا‑سيدي، ما‑تگيت كيّي؟› ءيساول‑د سيديتنّغ ييني‑يّي: ‹نكّي ا‑يگان ياسوع لّي‑تسّرفوفونت.

¹⁶ نكر تبيدّت ف‑يضارن‑نّك، اشكو ماياد ا‑ف‑اك‑د‑بانغ، باش ا‑ك‑گغ د‑وخدّام‑ينو ار‑تاكّات توگّا ف‑مامنك ا‑يّي‑تژريت غاسّاد ءولا ف‑ما‑راد‑اك‑ملغ تيگيرا.

¹⁷ را‑كي‑تفوكّوغ زغ‑يفاسّن ن‑ايت‑يودايا ءولا ايت‑تميزار اگّوگنين.

¹⁸ را‑ك‑ازنغ ا‑ترژمت الّن‑نسن، ترارت‑تن‑د زغ‑تيلّاس س‑تيفاوت، ءولا زغ‑لقوّا ن‑شيطان س‑ربّي، باش ا‑فلّاسن‑يتّين دّنوب‑نسن، وورّين طّافن تاغامت غ‑گر غويلّي ژليغ اد‑گن وينو ف‑سّيبت ن‑ماد‑سري‑ومنّ.›

ءيساول بولُس ف‑تبرّاحت‑نس

¹⁹ «غاكودان اي‑اگلّيد اگريبّاس، ءور‑ونفغ ءي‑مايلّي‑يّي‑د‑يسّبايّن ربّي.

²⁰ فّوغّ ار‑تبرّاحغ غ‑ديماشق، دّوغ ءيلمّا ار‑تبرّاحغ غ‑وروشاليم ءولا غ‑كولّو تامازيرت ن‑يودايا ءولا تيميزار ن‑يبرّانيين. ار‑اسن‑تّينيغ ءيس‑تن‑يخصّا اد‑فلن كولّو ما‑يُخشنّ وورّين س‑ربّي، ار‑سكارن افولكي باش ا‑يبان ءيس‑فلن ما‑يُخشنّ.

²¹ ف‑سّيبت ن‑تبرّاحت‑اد ا‑ف‑يّي‑ومژن كرا ن‑ايت‑يودايا غ‑تگمّي ن‑ربّي، ءيرين ا‑يّي‑نغن.

²² والاينّي ار‑بدّا‑يّي‑يتعاوان ربّي سول س‑غاسّاد. مايان ا‑ف‑بيدّغ غيد ار‑اكّاغ توگّا‑نو ءي‑كولّو مدّن، ءي‑ما‑يمقّورن ءولا ءي‑ما‑يمژّين. ءور‑ا‑ساوالغ ابلا ف‑مايلّي‑ف‑نّان لانبيا را‑ييلي، نتني ءولا موسا.

²³ نّان ءيس‑راد‑باهرا‑يرفوفن لماسيح، ءيگ امزوارو ءي‑ويلّي را‑د‑ينكر زغ‑لموت، باش ا‑يسّبايّن تيفاوت ءي‑ايت‑يودايا ءولا ايت‑تميزار اگّوگنين.»

²⁴ سول ا‑يساوال بولُس ف‑يخف‑نس س‑اس‑ينّا فاستوس س‑جّهد: «وا‑بولُس، هاتين تفّوغت ءيخف‑نّك. هان تيغري ءيگّوتن ا‑ك‑يسّنوفلن.»

²⁵ ءيرار‑اس بولُس: «ءور‑نوفلغ، ا‑سيدي فاستوس. كولّو مايد‑اون‑تّينيغ، لحقّ د‑لمعقول ا‑يگا.

²⁶ تيغاوسيوين‑اد، ءيسّن‑تنت‑وگلّيد اگريبّاس، ژضارغ اد‑اس‑فلّاسنت‑ساولغ س‑زّعامت. سّنغ ءيس‑ور‑فلّاس‑ينتيل ماياد، اشكو ءورد غ‑كرا ن‑توغژوت ءيلّاسن ا‑غ‑يجرا.

²⁷ واي‑اگلّيد اگريبّاس، ءيس‑تومنت ءيواليون لّانبيا؟ سّنغ ءيس‑تن‑تومنت.»

²⁸ ءيساول ءيلمّا اگريبّاس س‑بولُس ييني‑اس: «ءيس‑تريت ا‑يّي‑ترارت اد‑گغ اماسيحي غ‑يات تاساعت ءيگزّولن؟»

²⁹ ييني‑اس بولُس: «زوند ءيغ‑تگزّول زوند ءيغ‑تغزّيف، ضالبغ ءي‑ربّي ا‑تگت زوند ماد‑گيغ، كيّي ءولا كولّو غويد سري سفليدنين غاسّاد، والاينّي بلا سّناسل‑اد.»

³⁰ ءينكر‑وگلّيد غاكودان، نتّان د‑لحاكم ءولا بارنيكي ءولا وييّاض لّي‑ديدس‑سكيوسنين،

³¹ فّوغن زغ‑لمحكاما ار‑تّينين ءي‑نگراتسن: «ارگاز‑اد ءور‑يسكير كرا‑ف‑ا‑يتمتات ءولا كرا‑ف‑ا‑يتّيلي غ‑لحبس.»

³² ءيساول اگريبّاس س‑فاستوس ييني‑اس: «ارگاز‑اد، تژضارم اد‑اس‑ترژمّ مراد ءيس‑ور‑يسّغلي تاغاوسا‑نس س‑گر ءيفاسّن ن‑قايصر.»