irqqasn 25 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيسّغلي بولُس اصراض‑نس س‑دار قايصر

¹ ءيقاما فاستوس كراض‑ووسّان غ‑قايصريّا س‑يفّوغ ءيدّو س‑وروشاليم.

² دّون دارس ءينمغورن ن‑تگمّي ن‑ربّي د‑يمغارن ن‑ايت‑يودايا، اشتكّان‑داغ س‑بولُس.

³ ضالبن فاستوس ا‑گيسن‑يسكر لخير‑اد ياوي‑اسن‑د بولُس س‑وروشاليم، اشكو نتني سكرن ف‑اد‑اس‑مدين غ‑وغاراس نغن‑ت ءور‑تا‑يلكيم.

⁴ ءيمّا فاستوس ءيرور‑اسن: «هان بولُس ءيلّا غ‑لحبس غ‑قايصريّا. يان ءيميكّ راد‑وورّيغ نكّي س‑غين.

⁵ ازنات ديدي كرا ن‑يمغارن‑نّون اد‑اس‑ن‑صرضن غين ءيغ‑يسكر كرا يُخشنّ.»

⁶ ءيقاما فاستوس غ‑وروشاليم ما‑يتگّان تژا ن‑ووسّان، ءيدّو ءيلمّا س‑قايصريّا. نديد ازكّا ءيسكيوس غ‑لمحكاما يامر ءيعسكرين اد‑د‑اوين بولُس.

⁷ ءيكشم‑د بولُس سوتلن‑اس ايت‑يودايا لّي‑د‑وشكانين زغ‑وروشاليم، ار‑سرس‑تاشتكّان س‑تغاوسيوين مقّورنين والاينّي ءور‑ژضارن ا‑تنت‑زّگان.

⁸ ءيساول بولُس ف‑يخف‑نس ييني‑اسن: «ءور‑سكيرغ كرا لّعيب لا غ‑شّرع ن‑ايت‑يودايا ءولا غ‑تگمّي ن‑ربّي ءولا غ‑قايصر.»

⁹ والاينّي فاستوس ءيرا ا‑يرضو ايت‑يودايا، ءيسقسا بولُس: «ءيس‑تريت ا‑تدّوت س‑وروشاليم ا‑تبيدّت غ‑لگدّام‑ينو غين ترارت اوال ف‑يصراض‑نسن؟»

¹⁰ ءيساول بولُس ييني‑اس: «ها‑يّي بيدّغ غيد غ‑لمحكاما ن‑قايصر غ‑يلّيغ‑يّي‑د‑يقّان اد‑بيدّغ. ءيمّا ايت‑يودايا، ءور‑گيسن‑سكيرغ كرا لّعيب. كيّي تسّنت ماياد باهرا.

¹¹ مراد ءيس‑فّوغّ لقانون سكرغ كرا‑ف‑ا‑تمتاتغ، ءور‑راد‑يريغ اد‑انفغ ءي‑لموت. والاينّي ءيغ‑ور‑يلّي غ‑يصراض‑نسن ابلا تيكركاس، ءور‑يژضار يان ا‑يّي‑يدحي ءي‑مدّن‑ان. ها‑يّي غيلاد ءوسيغ اصراض‑ينو س‑گر ءيفاسّن ن‑قايصر.»

¹² ءيشاور فاستوس د‑يمعاوانّ‑نس، ييني ءيلمّا ءي‑بولُس: «تسّغليت اصراض‑نّك س‑دار قايصر. هاتي س‑دار قايصر ا‑س‑را‑تدّوت.»

ءيبيدّ بولُس غ‑لگدّام ن‑وگلّيد اگريبّاس

¹³ زرين كرا ن‑ووسّان س‑د‑يوشكا‑وگلّيد اگريبّاس د‑وولّتماس بارنيكي س‑قايصريّا. ءيرين اد‑سّمرحبان س‑فاستوس غ‑تمازيرت‑نسن.

¹⁴ گاورن دارس كرا ن‑ووسّان ايلّيغ ءيساول فاستوس د‑وگلّيد ف‑تغاوسا ن‑بولُس ييني‑اس: «ءيلّا غيد يان‑ورگاز، ءيفل‑ت‑يد فيليكس غ‑لحبس.

¹⁵ لّيغ دّيغ س‑وروشاليم، صرضن‑اس ءينمغورن ن‑تگمّي ن‑ربّي د‑يمغارن ن‑ايت‑يودايا، ضالبن‑يّي ا‑فلّاس‑وتغ لحوكم،

¹⁶ والاينّي رورغ‑اسن: ‹نكُّني ن‑ايت‑روما ءور‑ا‑نسكار غمكان. ءور‑ا‑نتحكام ف‑يان س‑لموت ءيغ‑ور‑زوار‑يبيدّ غ‑لگدّام ن‑ويلّي‑اس‑صرضنين، ءيساول ف‑يخف‑نس ف‑غايلّي س‑ا‑سرس‑تاشتكّان.›

¹⁷ والاينّي لّيغ‑د‑ديدي‑مونّ س‑غيد ءور‑سّماطلغ تاغاوسا‑يان. سكيوسغ نديد ازكّا غ‑لمحكاما، امرغ اد‑د‑سّحاضرن ارگاز‑ان.

¹⁸ والاينّي لّيغ‑د‑نكرن ءيمصراضن‑نس، ءور‑سرس‑اشتكّان س‑كرا ن‑يسكّيرن أُخشنّين غمكلّي غالغ نكّي.

¹⁹ ءور‑يلّي يات غ‑گراتسن ابلا كرا ن‑يمجاحادن ف‑مامنك اد‑تعبادن ءيلاه‑نسن، ءولا ف‑يان ءيمّوت ءيسم‑نس ياسوع ار‑فلّاس‑يتّيني بولُس ءيس‑يدّر.

²⁰ ءور‑سّينغ غاكودان مامنك اد‑سّنفاصالغ تيغاوسيوين‑اد. سقساغ بولُس ءيس‑يرا ا‑يدّو س‑وروشاليم ا‑ن‑فلّاس‑حكامغ غين،

²¹ والاينّي ءينّا‑يّي ءيرا ا‑يقاما غيد ارد ءيحكام قايصر ف‑تغاوسا‑نس. امرغ غاكودان ا‑يقاما غ‑لحبس ارد‑ت‑ازنغ س‑دار قايصر.»

²² ءيساول ءيلمّا اگريبّاس ييني‑اس ءي‑فاستوس: «ءولا نكّي ريغ اد‑سفلدغ ءي‑ورگاز‑اد.» ييني‑اس فاستوس: «ار صّباح راد‑اس‑تسفلدت.»

²³ نديد ازكّا ياشك‑يد اگريبّاس د‑بارنيكي س‑لهيبت ءيگّوتن، كشمن س‑وحانو ءيمقّورن لّمحكاما، نتني د‑ينمغورن ن‑يعسكرين د‑يمغارن ن‑تمدينت. ءينكر فاستوس يامر اد‑د‑شّكشمن بولُس.

²⁴ ييني ءيلمّا فاستوس: «واي‑اگلّيد اگريبّاس ءولا كولّو ويلّي ديدنّغ لّانين غاسّاد، غواد ا‑يگان ارگاز لّي‑مي‑د‑صرضن كولّو ايت‑يودايا س‑داري غ‑وروشاليم ءولا غيد، ار‑سرس‑تغوّاتن ار‑تّينين ءيقّان‑ت‑يد ا‑يمّت.

²⁵ ءور‑گيس‑وفيغ نكّي كرا‑ف‑يستهلّا لموت، والاينّي لّيغ ءيسّغلي تاغاوسا‑نس س‑گر ءيفاسّن ن‑قايصر سكرغ ف‑ا‑ت‑ازنغ س‑دارس.

²⁶ ءيمّا نكّي ءور‑داري كرا ءيزگان ما‑س‑ا‑فلّاس‑تاراغ ءي‑قايصر. هاتي سّحاضرغ‑اون‑ت‑يد غيلاد، سّبيدّغ‑ت‑يد غ‑لگدّام‑نّك اي‑اگلّيد اگريبّاس، باش ا‑گيس‑نسيگّل ناف ما‑س‑ا‑فلّاس‑تاراغ.

²⁷ اشكو ءيرواس‑يّي ءيس‑ور‑يشوي ا‑نازن يان‑وحبّاس ءي‑قايصر ءيغ‑ور‑فلّاس‑نملي مايلّي‑ف‑ا‑ياس‑صراضن مدّن.»