irqqasn 24 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اصراض ن‑ايت‑يودايا ءي‑بولُس

¹ زرين سمّوس‑ووسّان، س‑د‑يوشكا حانانيّا لّي‑يگان انمغور ءيهيّان ن‑تگمّي ن‑ربّي س‑قايصريّا، نتّا د‑كرا ن‑يمغارن ن‑تمازيرت. اوين‑د ديدسن يا‑لّموحامي ءيسم‑نس تارتولّوس. كشمن س‑دار فيليكس ءينين‑اس ف‑غايلّي‑ف‑صرضن ءي‑بولُس.

² ءيشّكشم‑ن بولُس غاكودان س‑دارسن، ءيبدو تارتولّوس ار‑سرس‑يتاشتكّا ييني: «وا‑لحاكم ءيعزّان سيدي فيليكس، منّاو ءيسگُّاسن اياد تهنّا‑تمازيرت‑نّغ ف‑وفوس‑نّك. تگريت غ‑كولّو ما‑يخصّان باش اد‑اغ‑ييگات لخير.

³ نفرح س‑كولّو ماد‑اغ‑تسكارت، ار‑ك‑نتشكار غ‑كرايگاتّ ماني د‑كرايگاتّ لوقت.

⁴ ءيمّا غيلاد ءور‑ريغ ا‑ك‑سّماطلغ. را‑ك‑نضالب اد‑اغ‑تسكرت افولكي‑اد، تسفلدت ءي‑كرا ن‑يواليون دروسنين ف‑مايلّي دارنّغ ءيجران.

⁵ اشكو نوفا‑ن ارگاز‑اد ءيگا بو‑يروّاين، ار‑يسّنكار ءودووي غ‑گر ايت‑يودايا غ‑دّونيت كولّوتّ. ءيگا زغ‑ينمغورن ن‑ويلّي مي تّينين ‹ايت‑ناصيرا›.

^6-7 غمكان ا‑يسكار ايلّيغ ءيرا ا‑يسّحرم تيگمّي ن‑ربّي، نامژ‑ت نكُّني غاكودان.

⁸ ءيغ‑تي‑تسقسات را‑تيسّانت كولّو غايلّي‑س‑ا‑سرس‑نتاشتكّا.»

⁹ نكرن ءيلمّا وييّاض زغ‑ايت‑يودايا ءينين: «س‑صّاحت غمكان ا‑يلّان.»

اوال ن‑بولُس غ‑لگدّام ن‑فيليكس

¹⁰ ءينعت‑ن لحاكم ءي‑بولُس س‑وفوس باش ا‑يساول. ييني: «وا‑سيدي، سّنغ ءيزد ءيسگُّاسن گّوتنين ايد تحكامت غ‑تمازيرت‑اد. ماياد ا‑ف‑فرحغ س‑وگُّار اد‑رارغ اوال ف‑مدّن‑اد غ‑لگدّام‑نّك.

¹¹ ءيغ‑تن‑تسقسات را‑تيسّانت ءيزد غير سين د‑مراو ن‑واسّ ايد‑ن‑كشمغ س‑وروشاليم ا‑گيس‑تعبادغ ربّي.

¹² ءيمّا نتني، هاتني ءور‑يّي‑ن‑وفين ار‑تمجاحادغ د‑كرا ن‑يان غ‑تگمّي ن‑ربّي، ءولا ءوفان‑يّي‑ن ار‑سّهيّاسغ مدّن لا غ‑تگُمّا ن‑تژالّيت ءولا غ‑تمدينت.

¹³ غايلّي‑س‑ا‑سري‑تاشتكّان، ءور‑ژضارن ا‑ت‑زّگان.

¹⁴ والاينّي يات‑تغاوسا راد‑اك‑تّ‑ينيغ: اغاراس لّي‑س‑ا‑تّينين غويد ءيجلا، نتّان ا‑غ‑ا‑تعبادغ ربّي ن‑يمزوورا‑نّغ. ها‑يّي ءومنغ س‑كولّو ما‑يتياران غ‑شّرع ن‑موسا ءولا ارّاتن لّانبيا.

¹⁵ گيغ رّجا‑نو غ‑ربّي غمكلّي‑ن‑گيس‑رجان نتني، امنغ ءيس‑راد‑نكرن كولّو مدّن زغ‑لموت، ما‑يفولكين ءولا ما‑يُخشنّ.

¹⁶ مايان ا‑ف‑ا‑ن‑تگّاغ تيقّي‑نو باش ا‑بدّا‑يغوس‑وول‑ينو زغ‑كولّو ما‑يگان لعيب غ‑يژري ن‑ربّي ءولا وين بنادم.

¹⁷ «زرين يان‑منّاو ن‑يسگُّاسن ءور‑دّيغ س‑وروشاليم، ايلّيغ‑ن‑يويغ كرا لّمعاونت ءي‑يمژلاض ن‑ايت‑تمازيرت‑ينو سّاكمورغ‑ن تيوافكيو ءي‑ربّي.

¹⁸ غمكان اد‑سكرغ س‑يّي‑ن‑وفان غ‑تگمّي ن‑ربّي، د‑نكّي غوسغ س‑يسيرد ن‑ايت‑يودايا. ءور‑ا‑ساوالغ س‑مدّن ءولا‑دا‑تژيغ د‑يان.

¹⁹ والاينّي لّان غين كرا ن‑ايت‑يودايا زغ‑تمازيرت ن‑اسيّا. نتني ءيغ‑دارسن كرا فلّا، ءيلّا فلّاسن ءولا نتني اد‑د‑اشكين صرضن‑يّي غ‑لگدّام‑نّك.

²⁰ نغد ادج غويد اد‑فلّا‑ينين ءيس‑گيگي‑وفان كرا لّعيب غاكود لّيغ بيدّغ غ‑لمحكاما‑نسن.

²¹ ءور‑سكيرغ يات، ابلا اوال‑اد اد‑نّيغ س‑جّهد لّيغ بيدّغ غ‑لگدّام‑نسن، نّيغ‑اسن: ‹ها‑يّي بيدّغ غ‑دّو لحوكم‑نّون غاسّاد ف‑سّيبت ن‑ماد‑ومنغ س‑تنكرا ن‑ويلّي مّوتنين.› »

²² ءيمّا لحاكم فيليكس ءيسّن ما‑يگّوتن ف‑وغاراس لّماسيح، ييني‑اسن: «غاسّاد يوودا غونشكاد، ارد‑د‑ياشك‑ونمغور ليسياس راد‑داغ‑غرغ س‑تغاوسا‑ياد‑نّون.»

²³ ءيزايد يوصّا لقبطان ا‑يگابل بولُس، ييني‑اس ا‑ت‑ور‑يكرس، يادج ءيمدّوكُّال‑نس اد‑اس‑دي‑تاوين اينّا‑ت‑يخصّان.

²⁴ زرين كرا ن‑ووسّان، س‑د‑يوشكا فيليكس د‑دروسيلا تامغارت‑نس. تگا نتّات ءولّت‑يودايا. يازن غاكودان اد‑د‑اوين بولُس. ءيسفلد‑اس ار‑يساوال ف‑ما‑را‑ييلي ءي‑يان يومنّ س‑لماسيح ياسوع.

²⁵ والاينّي لّيغ ءيزوويد بولُس ار‑يساوال ف‑وفولكي لّي‑س‑يرضا ربّي، ءولا مامنك ا‑را‑ييژضار يان ا‑يحكام غ‑يخف‑نس، ءولا لعقوبيت لّي‑را‑يتّوت ف‑دّونيت، ييكساض فيليكس ييني‑اس: «دّو غيلاد، را‑ن‑سرك‑ازنغ اكود نّا‑يّي‑تطلق لوقت.»

²⁶ ءيغال ءيس‑راد‑اس‑يفك بولُس ءيقاريدن. كيگان د‑توال ار‑سرس‑يتازن ار‑ديدس‑يساوال.

²⁷ غمكان ايلّيغ زرين سين ءيسگُّاسن، ءيدّو فيليكس تيگيرا. ياشك‑يد يا‑لّحاكم ياضني، ءيگ ءيسم‑نس بوركيوس‑فاستوس. ءيمّا فيليكس ءيرا ا‑يرضو ايت‑يودايا، ءيفل بولُس غ‑لحبس.