irqqasn 23 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ ءيسّماقّل بولُس غ‑ايت‑لمحكاما ييني‑اسن: «واي‑ايتما، ها‑يّي كولّو ماد‑كّيغ سول س‑غاسّاد ار‑سكارغ ف‑اد‑ترضوغ ربّي س‑وول ءيغوسن.»

² ءينكر غاكودان حانانيّا لّي‑يگان انمغور ءيهيّان ن‑تگمّي ن‑ربّي، يامر غويلّي بيدّنين غ‑تاما ن‑بولُس ا‑ت‑وتن ف‑يمي‑نس.

³ ءيرار‑اس بولُس: «را‑ك‑يد‑يوت ربّي، اي‑اغُراب ءيجيّرن. هاتي تسكيوست غيد ا‑فلّا‑تحكامت س‑شّرع، والاينّي تفّوغت زغ‑شّرع لّيغ‑تن‑تومرت ا‑يّي‑وتن.»

⁴ ءينين‑اس غويلّي بيدّنين غ‑تاما‑نس: «ءيزد ترگمت انمغور ءيهيّان ن‑ربّي؟»

⁵ ءيرار‑اسن بولُس: «واي‑ايتما، ءور‑سّينغ غواد ءيزد انمغور ءيهيّان ا‑يگا. اشكو ءيتيارا غ‑واوال ن‑ربّي: ‹ا‑ور‑ترگمت يان ءيگان انمغور ن‑ايت‑تمازيرت‑نّك.› »

⁶ ءيسّن بولُس ءيزد كرا گيسن ءيگا زغ‑لمدهب ن‑يصادّوقين د‑كرا ءيگا زغ‑لمدهب ن‑يفاريسين. يالّ اوال‑نس غ‑لمحكاما ييني‑اسن: «واي‑ايتما، نكّي افاريسي اد‑گيغ، گغ يوس ن‑يفاريسين. بيدّغ غ‑دّو لحوكم غاسّاد ف‑سّيبت ن‑رّجا لّي‑غ‑ن‑رجيغ، اشكو ءومنغ ءيس‑راد‑نكرن غويلّي مّوتنين.»

⁷ غير ءينّا اوال‑اد س‑نكرن ءيفاريسين د‑يصادّوقين ار‑تژين ءي‑نگراتسن، بضون ايت‑لمحكاما ف‑سين.

⁸ اشكو ءيصادّوقين ار‑تّينين ءور‑راد‑نكرن مدّن زغ‑لموت، ار‑تّينين ءور‑لّين كرا لّمالايكا نغد كرا لّارواح. ءيمّا ءيفاريسين ار‑تّينين كولّو غويد لّان.

⁹ زايدن كولّو ار‑تغوّاتن ايلّيغ نكرن كرا ن‑يمسلمدن ن‑شّرع لّمدهب ن‑يفاريسين، بزگن باهرا ف‑وييّاض ءينين‑اسن: «ءور‑اكُّ‑نوفي كرا يُخشنّ غ‑ورگاز‑اد. ءور‑يشقي ا‑سرس‑يساول كرا ن‑رّوح نغد كرا لّمالاك.»

¹⁰ زايدن غمكان ايلّيغ گيس روحن تيميغت. ار‑كولّو‑لدّين غ‑بولُس، ايلّيغ ءيكسوض‑ونمغور ن‑يعسكرين ا‑ت‑گن د‑يگزمان. يامر ءيعسكرين اد‑گّوزن اد‑اسن‑ت‑يد‑كّيسن س‑يفادّن اوين‑ت س‑لقصر.

¹¹ غ‑يض‑ان ا‑يبيدّ سيديتنّغ ف‑بولُس ييني‑اس: «زعم د‑يخف‑نّك. غمكلّي فلّا تفكيت توگّا‑نّك غ‑وروشاليم، غمكان ا‑ك‑يد‑يقّانّ ا‑تنت‑فلّا‑تفكت ءولا غ‑روما.»

سكرن ايت‑يودايا ف‑اد‑نغن بولُس

¹² نديد ازكّا غ‑صّباح مشاوارن كرا ن‑ايت‑يودايا ءي‑نگراتسن، گّالّن ءور‑شتّان ءولا سوان ارد نغن بولُس.

¹³ ءوگُّار ن‑كّوژ ءيد‑مراو ا‑يگّولّان ف‑غايان.

¹⁴ اشكين‑د س‑دار ءينمغورن ن‑تگمّي ن‑ربّي د‑يمغارن ن‑تمازيرت ءينين‑اسن: «ها‑نكُّني نمشاشكا‑د نگّالّ تاگالّيت ءيمقّورن ءيس‑ور‑را‑نشّ ارد ننغ بولُس.

¹⁵ نرا گيگون كونّي ءولا ايت‑لمحكاما ا‑تازنم غيلاد س‑ونمغور ن‑يعسكرين، تضالبم‑ت ا‑د‑ياوي بولُس س‑لگدّام‑نّون، تينيم‑اس ءيس‑ترام ا‑تي‑تسقسام ءوگُّار ف‑ما‑يسكر. ها‑نكُّني نوجاد ا‑ت‑ننغ ءور‑تا‑د‑يلكيم.»

¹⁶ والاينّي غايلّي‑ف‑د‑مشاشكان، ءيسفلد فلّاس يوس ن‑وولّتماس ن‑بولُس. ءيدّو س‑لقصر ءيكشم س‑دار بولُس ييني‑اس‑ت.

¹⁷ ءيغر بولُس غاكودان ءي‑يان زغ‑لقبطانات ن‑يعسكرين ييني‑اس: «اوي اعيّال‑اد ءي‑ونمغور‑نّون، اشكو ءيرا اد‑اس‑ييني كرا.»

¹⁸ ياوي‑ت لقبطان ءيشّكشم‑ت س‑دار‑ونمغور ييني‑اس: «ءيغرا‑يّي‑وحبّاس بولُس ءيضالب‑يّي اد‑اك‑د‑اويغ اعيّال‑اد، اشكو ءيرا اد‑اك‑ييني كرا.»

¹⁹ يامژ‑ونمغور غ‑وفوس ن‑وعيّال، ياوي‑ت واحدوت ءيسقسا‑ت: «ما‑راد‑يّي‑تينيت؟»

²⁰ ييني‑اس: «مشاشكان‑د ءينمغورن ن‑ايت‑يودايا ا‑زگيك‑ضالبن اد‑اسن‑ين‑تاويت بولُس ازكّا س‑لمحكاما. راد‑اك‑ينين ران ا‑ت‑سقسان ءوگُّار ف‑ما‑يسكر.

²¹ والاينّي ا‑تن‑ور‑تامنت اشكو لّان ءوگُّار ن‑كّوژ ءيد‑مراو ن‑ورگاز، رگسن ار‑سرس‑تقلن. گّالّن ءور‑شتّان ءولا سوان ارد‑ت‑نغن. ءوجادن غيلاد، ار‑غير‑تقلن س‑واوال‑نّك.»

²² ييني‑اس‑ونمغور ءي‑وعيّال: «اد‑ور‑تينيت ءي‑يان ءيس‑يّي‑دي‑تيويت لخبار‑اد.» يادج‑ت ءيلمّا ءيدّو.

ءيتيازان بولُس س‑دار لحاكم فيليكس

²³ ءيغر‑ونمغور ن‑يعسكرين ءي‑سين زغ‑لقبطانات‑نس يوصّا‑تن ييني‑اسن: «سّموناد‑د سين ءيد‑ميّا (200) ن‑وعسكري د‑سّا ن‑يد‑مراو (70) ن‑ومنّاي د‑سين ءيد‑ميّا (200) ن‑ويلّي طّافنين احريش، اد‑وجادن اد‑دّون س‑قايصريّا غ‑يض‑اد غ‑تاساعت تيس تژا.

²⁴ تزايدم كرا ن‑واگمارن ما‑غ‑ا‑يسّودو بولُس، باش ا‑تي‑تسّلكمّ غ‑لامان ءي‑لحاكم فيليكس.»

²⁵ يارا ءيلمّا يات‑تبرات ييني:

²⁶ «زغ‑كلوديوس‑ليسياس، ءي‑سيدي لحاكم ءيعزّان فيليكس، اد‑اك‑تيلي سّلامت.

²⁷ ارگاز‑اد، غوين‑ت ايت‑يودايا، ءيرين نتني ا‑ت‑نغن. افغ‑ت‑ين ءيس‑يگا يان ءيطّافن تاغامت غ‑ايت‑روما، نلكم‑ن نكّي د‑يعسكرين‑ينو نكّيس‑اسن‑ت‑يد.

²⁸ سّحاضرغ‑اسن‑ت‑ين غ‑لمحكاما‑نسن باش اد‑يسّانغ ما‑س‑ا‑سرس‑تاشتكّان.

²⁹ افغ‑ت‑ين ءيس‑ور‑يسكير ما‑ف‑ا‑يتمتات نغد ما‑ف‑ا‑يتّيلي غ‑لحبس. ءور‑ا‑سرس‑تاشتكّان ابلا س‑كرا ءيگان وين شّرع‑نسن.

³⁰ والاينّي لّيغ‑يّي‑د‑يلكم لخبار ن‑يزد كرا گيسن مشاوارن فلّاس ا‑ت‑نغن، ازنغ‑اك‑ت‑ين. ءينيغ ءي‑ويلّي سرس تاشتكّانين اد‑اس‑صرضن س‑لگدّام‑نّك.»

³¹ سكرن ءيلمّا ءيعسكرين غمكلّي‑تن‑يوصّا‑ونمغور‑نسن، اوين بولُس غ‑ييض ايلّيغ لكمن تامدينت ن‑انتيباتريس.

³² نديد ازكّا وورّين نتني س‑لقصر، فلن ءيمنّاين ا‑ت‑اوين زغ‑غين.

³³ لّيغ روحن قايصريّا، فكن تابرات ءي‑لحاكم، شّكشمن بولُس س‑دارس.

³⁴ لّيغ ءيغرا لحاكم تابرات، ءيسقسا بولُس گو‑مان تامازيرت ا‑يگا.

³⁵ لّيغ ءيسّن ءيس‑يگا گو‑كيليكيّا ييني‑اس: «راد‑اك‑سفلدغ غاكود نّا‑د‑وشكان غويلّي‑اك‑صرضنين.» يوصّا‑تن ءيلمّا ا‑ت‑گابلن غ‑لقصر ن‑هيرودوس.