irqqasn 22 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اوال ن‑بولُس ءي‑ايت‑وروشاليم

¹ ييني‑اسن: «واي‑ايتما د‑يد‑خالي، سفلدات‑يّي. راد‑اون‑ملغ ماد‑گيغ ءولا ماد‑سكرغ ءيس‑ور‑يُخشين.»

² فسّان س‑وگُّار لّيغ‑اس‑سفلدن ار‑يساوال س‑واوال‑نسن ن‑ايت‑يودايا. ءيزايد ييني‑اسن:

³ «گيغ نكّي گو‑يودايا، لولغ غ‑طارسوس غ‑تمازيرت ن‑كيليكيّا، مقّورغ غ‑تمدينت‑اد ن‑وروشاليم. كّيغ‑تّين ار‑اقراغ غ‑دّو‑وفوس ن‑گاماليال، ار‑تلمادغ كولّو ما‑يلّان غ‑شّرع ن‑يمزوورا‑نّغ. ءيريغ باهرا اد‑رضوغ ربّي زوند كونّي كولّوكن لّي‑لّانين غيد غاسّاد،

⁴ ايلّيغ وورّيغ ار‑سّرفوفونغ ايت‑وغاراس‑اد ار لموت، ار‑تامژغ ءيرگازن ءولا تيمغارين ار‑تن‑ين‑دحايغ غ‑لحبس.

⁵ سقسات انمغور ن‑تگمّي ن‑ربّي د‑يمغارن ن‑تمازيرت، راد‑اون‑ينين ءيزد صّاحت اياد. اشكو ءومژغ غ‑دارسن تيبراتين ءي‑يمدّوكُّال‑نسن غ‑ديماشق، باش اد‑امژغ وانّا غين ءيلّان زغ‑ايت‑وغاراس‑اد، كرسغ‑تن س‑سّناسل اويغ‑تن‑د س‑وروشاليم ا‑فلّاسن‑نوت لحوكم.

⁶ «ها‑يان‑واسّ سّوديغ اكمورغ‑ن س‑ديماشق. غ‑طوژّونت ن‑واسّ تسفاو‑د فلّا يات تيفاوت ءيتجهّدن زغ‑يگنوان.

⁷ ضرغ س‑واكال س‑سفلدغ ءي‑واوال ءينّا‑يّي‑د: ‹شاول، شاول، ماخ ا‑يّي‑تسّرفوفونت؟›

⁸ ءينيغ: ‹وا‑سيدي، ما‑تگيت كيّي؟› ءيرار‑يّي‑د: ‹نكّي ا‑يگان ياسوع گو‑ناصيرا لّي‑تسّرفوفونت.›

⁹ غويلّي ديدي لّانين ژران تيفاوت والاينّي ءور‑فهيمن اوال لّي‑د‑سري‑يساولن.

¹⁰ ءينيغ ءيلمّا: ‹وا‑سيدي، ما‑راد‑سكرغ؟› ييني‑يّي‑د سيديتنّغ: ‹نكر تدّوت س‑ديماشق. غين ا‑غ‑راد‑اك‑يتياونّا كولّو مايلّي‑گيك‑يقصاد ربّي ا‑تي‑تسكرت.›

¹¹ سول بوكضغ نكّي ف‑سّيبت ن‑تيفاوت‑ان ءيتجهّدن، امژن‑يّي افوس غويلّي ديدي لّانين، اوين‑يّي س‑ديماشق.

¹² «ياشك‑ين داري يان‑ورگاز ءيسم‑نس حانانيّا، ءيگ يان باهرا ءيتّيرين ا‑يرضو ربّي، ار‑يسكار س‑كولّو ما‑يلّان غ‑شّرع، ار‑تي‑توقّارن كولّو ايت‑يودايا لّي‑زدغنين غين.

¹³ ءيبيدّ غ‑تاما‑نو ييني‑يّي: ‹وا‑گما شاول ءيسفيو،› س‑سفاوغ غاكودان ار‑تي‑تمنادغ.

¹⁴ ييني‑يّي: ‹ءيستي‑ك ربّي ن‑يمزوورا‑نّغ ا‑تيسّانت ما‑يقصاد، تژرت غوالّي ءيعمّرن س‑وفولكي لّي‑س‑يرضا، تسفلدت ءي‑واوال زغ‑يمي‑نس.

¹⁵ را‑تگت ءينيگي‑نس غ‑دار كولّو مدّن، تساولت‑اسن ف‑ما‑تژريت ءولا ما‑مي‑تسفلدت.

¹⁶ ءيمّا غيلاد ماخ ايلّيغ سول تگاورت؟ نكر ا‑ك‑سّدّمغ غ‑وامان، تغرت س‑يسم ن‑سيديتنّغ ا‑ك‑يسّغوس زغ‑دّنوب‑نّك.›

ءيساول بولُس ف‑تووري‑نس

¹⁷ «لّيغ‑د‑وورّيغ س‑وروشاليم، ار‑تژالّاغ يان‑واسّ غ‑تگمّي ن‑ربّي س‑يّي‑د‑يبان سيديتنّغ غ‑توارگيت

¹⁸ ييني‑يّي: ‹زايد غيل غيل تفّوغت زغ‑وروشاليم، اشكو ءور‑راد‑سفلدن س‑توگّا‑نّك فلّا.›

¹⁹ ءينيغ: ‹وا‑سيدي، سّنّ نتني مامنك ا‑ستّين‑كّيغ ار‑كشّمغ كولّو تيگُمّا ن‑تژالّيت ار‑تامژغ غويلّي سرك ءومنّين ار‑تن‑كّاتغ.

²⁰ ءولا غاسّان غ‑نغان ءينيگي‑نّك ستيفانوس بيدّغ نكّي غين، فرحغ س‑لموت‑نس گابلغ تيملسا ءي‑ويلّي‑ت‑نغانين.›

²¹ ءيساول‑داغ ييني‑يّي: ‹زايد تدّوت، اشكو را‑ك‑ازنغ س‑تميزار اگّوگنين.› »

²² ار‑كولّو‑سفليدن مدّن‑ان ءي‑بولُس، ايلّيغ ءينّا اوال‑اد نكرن‑داغ ار‑سّغويّون س‑جّهد ار‑تّينين: «وان غواد كّيسات‑ت زغ‑دّونيت. ءور‑اس‑يگي ا‑سول‑يقاما.»

²³ ار‑سّغويّون باهرا ار‑سّوسوسن ءيسلهامن‑نسن ار‑تالّن اگدرور س‑نّيگاتسن.

²⁴ يامر‑يلمّا‑ونمغور ءيعسكرين اد‑شّكشمن بولُس س‑لقصر، يوصّا‑تن ا‑ت‑سّغورشن ارد‑اسن‑يمل ماخ ايلّيغ ا‑فلّاس‑سّغويّون مدّن غمكان س‑جّهد.

²⁵ والاينّي لّيغ‑ت‑كرسن ا‑ت‑سّغورشن، ءيساول بولُس س‑لقبطان لّي‑يبيدّن غين ييني‑اس: «ءيس‑يلّا غاياد غ‑لقانون ا‑تسّغورشم يان ءيطّافن تاغامت غ‑ايت‑روما د‑نتّان ءور‑تا‑فلّاس‑وتن لحوكم ف‑كرا ءيسكر‑ت؟»

²⁶ لّيغ ءيسفلد لقبطان ءي‑ماياد، يوورّي س‑دار‑ونمغور ن‑يعسكرين ييني‑اس: «مايد را‑تسكرت؟ ارگاز‑اد ءيگا يان دار لحقّ ن‑ايت‑روما.»

²⁷ ياشك‑يد‑ونمغور س‑دار بولُس ءيسقسا‑ت: «ءيزد دارك تاغامت غ‑ايت‑روما؟» ييني‑اس بولُس: «تلّا داري.»

²⁸ ءيزايد‑ونمغور ييني‑اس: «نكّي س‑يقاريدن گّوتنين ا‑س‑ومژغ تاغامت غ‑ايت‑روما.» ءيرار‑اس بولُس: «ءيمّا نكّي، لولغ س‑تاغامت‑ينو، اشكو ايت‑داري طّافن تاغامت يادلّي.»

²⁹ لّيغ سفلدن ءيعسكرين ءي‑ماياد ءيتّين زغ‑گيس، ييكساض‑ونمغور لّيغ ءيسّن ف‑بولُس ءيس‑دارس لحقّ ن‑ايت‑روما د‑نتّان ءيكرس‑ت س‑سّناسل.

بولُس غ‑لمحكاما

³⁰ نديد ازكّا ءيرا‑ونمغور ن‑يعسكرين ا‑ييسّان لحقّ ن‑ما‑س‑ا‑تاشتكّان ايت‑يودايا س‑بولُس. ءيسّمون‑د ءينمغورن ن‑تگمّي ن‑ربّي د‑يمغارن لّمحكاما كولّوتن. ءيرژم‑د ءيلمّا ءي‑بولُس ياوي‑ت‑يد ءيسّبيدّ‑ت غ‑لگدّام‑نسن.