irqqasn 21 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

امودّو امگُّارو ن‑بولُس س‑وروشاليم

¹ غمكان ا‑تن‑نفل، نسّودو زغ‑غين نبّي امدا س‑يگزير ن‑كوس. نديد ازكّا نلكم ءيگزير ن‑رودوس، نزايد س‑يگزير ن‑باتارا.

² ناف‑ن غين يان‑واناو ءيرا ا‑يبّي س‑تمازيرت ن‑فينيقيّا، نغلي سرس نسّودو گيس.

³ ار‑نتمناد ءيگزير ن‑قوبروس ف‑وژلماض‑نّغ، نزايد ايلّيغ نلكم تامازيرت ن‑سوريّا. نگّوز غ‑تمدينت ن‑صور، اشكو غين اد‑ران ءيد‑باب ن‑واناو اد‑سرسن سّلاعت‑نسن.

⁴ ناف‑ن غين كرا ن‑يمحضارن، نگّوز غ‑دارسن سّا ن‑ووسّان. ءينين ءي‑بولُس مايلّي‑اسن‑يملا رّوح لقودوس ا‑ور‑يدّو س‑وروشاليم.

⁵ والاينّي لّيغ كمّلن‑ووسّان‑ان، نفّوغ زغ‑دارسن ا‑نزايد ف‑ومودّو‑نّغ. مونّ‑د ديدنّغ نتني كولّوتن ءولا تيمغارين‑نسن د‑تاروا‑نسن س‑برّا ن‑تمدينت. نوتش ف‑يفادّن‑نّغ غ‑تاما ن‑ومدا نژّالّ نضالب ربّي.

⁶ نمسافاض ديدسن، نغلي‑داغ س‑واناو، وورّين نتني س‑تگُمّا‑نسن.

⁷ نسّودو غ‑ومدا زغ‑صور س‑تمدينت ن‑بوتوليمايس. ننسالّام ءولا غين د‑ايتماتن، نزّري ديدسن غاسّان.

⁸ نديد ازكّا نزايد ايلّيغ نلكم تامدينت ن‑قايصريّا. نگّوز غين غ‑تگمّي ن‑فيليبّوس ابرّاح لّخبار ءيفولكين. ءيگ نتّان يان زغ‑سّا ن‑يرگازن لّي‑ستين ايتماتن غ‑وروشاليم.

⁹ ءيلينت دارس كّوژط ءيستيس ءور‑تاهيلنت، ار‑تّينينت ءيواليون نّا‑ياسنت‑يمالا ربّي.

¹⁰ نگاور دارس كرا ن‑ووسّان. غاكودان ا‑د‑يوشكا يان‑ورگاز زغ‑تمازيرت ن‑يودايا ءيسم‑نس اگابوس، ءيگ واد ءيتّينين ءيواليون نّا‑ياس‑يمالا ربّي.

¹¹ ءيروح‑اغ‑د، ياسي تاگُست ن‑بولُس، ءيكرس سرس ءيخف‑نس غ‑يضارن ءولا ءيفاسّن ييني‑اغ: «سفلدات ءي‑مايد ءينّا رّوح لقودوس، ‹غمكاد ا‑راد‑كرسن ايت‑يودايا بو‑تاگُست‑اد غ‑وروشاليم، فكن‑ت غ‑يفاسّن ن‑يبرّانيين.› »

¹² لّيغ نسفلد ءي‑ما‑ينّا، ننكر نكُّني د‑ايتماتن ن‑غين نضالب زغ‑بولُس باهرا ا‑ور‑يدّو س‑وروشاليم.

¹³ ءيرار‑اغ‑د نتّان ييني: «ما‑ف‑ا‑تالّام ار‑تسّياگّاسم ءول‑ينو؟ ها‑نكّي ءوجادغ ءورد غير اد‑تياوكرّافغ والاينّي ارد مّتغ غ‑وروشاليم ف‑يسم ن‑سيديتنّغ ياسوع.»

¹⁴ بولُس ءور‑سول‑يري ا‑سرنّغ‑يسفلد، نفسّا غاكودان نيني: «ا‑ييلي ما‑يرا سيديتنّغ.»

¹⁵ نقاما غين كرا ن‑ووسّان، نسّمون ءيلمّا تيغاوسيوين‑نّغ نمون‑داغ د‑وغاراس س‑وروشاليم.

¹⁶ مونّ‑د ديدنّغ كرا ن‑يمحضارن ن‑ايت‑قايصريّا، اوين‑اغ‑د س‑تگمّي ن‑والّي را‑دار‑نگّوز، ءيسم‑نس مناسون. ءيگا نتّا گو‑قوبروس ءيگ يان زغ‑يمزوورا لّي‑ومژنين اغاراس ن‑سيديتنّغ.

ءيساول بولُس د‑ياعقوب د‑يمغارن

¹⁷ لّيغ نلكم ءوروشاليم، فرحن سرنّغ ايتماتن شّكشمن‑اغ س‑دارسن.

¹⁸ نديد ازكّا نمون د‑بولُس ا‑نژر ياعقوب، ءيلين غين ءيمغارن كولّوتن.

¹⁹ ءينسالّام بولُس ديدسن، ار‑اسن‑يمالا كولّو ما‑يسكر ربّي ف‑وفوس‑نس غ‑دار ايت‑تميزار ياضني.

²⁰ لّيغ سفلدن ءي‑ما‑ينّا ار‑كولّو‑تالغن ربّي. ءينين ءيلمّا ءي‑بولُس: «وا‑گماتنّغ، تژريت كيگان د‑وافضان ن‑ايت‑يودايا ا‑د‑يوورّين امنّ س‑سيديتنّغ، ار‑كولّو‑تّيرين شّرع ن‑موسا باهرا.

²¹ نتني سفلدن فلّاك ءيس‑ا‑تسّلمادت ايت‑يودايا لّي‑زدغنين غ‑تميزار ياضني ا‑ور‑سول‑سكارن س‑شّرع ءولا‑دا‑تژالّان ءي‑يحشماي‑نسن ءولا‑دا‑تامژن سول غ‑لعادات ن‑يمزوورا‑نّغ.

²² ما‑را‑نسكر غيلاد؟ اشكو راد‑يسّانّ ءيس‑دي‑توشكيت س‑غيد.

²³ سكر مايد راد‑اك‑نيني. لّان دارنّغ كّوژ ءيرگازن قاولن ءي‑ربّي س‑واوال ءيزگان.

²⁴ اوي‑تن تسّغوست ءيخف‑نّك ديدسن، تفكت فلّاسن ما‑تن‑يخصّان ءي‑وسماكّرد ن‑يگويّا‑نسن. غمكاد ا‑س‑راد‑ژرن مدّن كولّوتن ءور‑يگي يات غايلّي مي فلّاك سفلدن. راد‑يسّانّ ءيس‑ا‑تسكارت س‑شّرع ن‑موسا.

²⁵ ءيمّا ءيبرّانيين لّي‑ومنّين س‑لماسيح، نوزن‑اسن يات‑تبرات، نيني‑اسن ف‑مايلّي‑ف‑د‑نمشاشكا. نوصّا‑تن ا‑ور‑شتّان ما‑يتياوغراسن ءي‑لاصنام ءولا ءيدامّن ءولا تيفيّي ن‑ما‑يقاجّين، اگّوگن زغ‑لفساد.»

تارفوفنت ن‑بولُس غ‑وروشاليم

²⁶ نديد ازكّا ياوي بولُس ءيرگازن‑لّي، ءيكمّل ديدسن اسغوس غمكلّي ءيگا دار ايت‑يودايا. ءيكشم ءيلمّا س‑تگمّي ن‑ربّي ييني ءي‑ينمغورن ف‑مان اسّ ا‑راد‑كمّلن ءوسّان ن‑وسغوس‑نسن باش ا‑ن‑سّاكمورن تيغرسيو ءي‑ربّي ف‑كرايگاتّ يان گيسن.

²⁷ ءور‑يقاما والو اد‑كمّلن سّا ن‑ووسّان، س‑يلّا بولُس غ‑تگمّي ن‑ربّي، ژرن‑ت كرا ن‑ايت‑يودايا لّي‑د‑كّانين تامازيرت ن‑اسيّا. سّهيّسن مدّن كولّوتن، غوين غ‑بولُس

²⁸ ار‑تغوّاتن ار‑تّينين: «واي‑ايت‑ربّي، اشكاد‑د تبيدّم ديدنّغ. ارگاز‑اد ءيگا واد ءيتكّان كرايگاتّ ماني، ار‑يسّلماد كولّو مدّن اد‑رگّمن غ‑ايت‑دارنّغ ءولا شّرع‑نّغ ءولا تيگمّي‑اد ن‑ربّي. هاتي غيلاد ءيشّكشم‑د كرا ن‑يبرّانيين س‑تگمّي ن‑ربّي، ءيسّحرم ادغار امژلاي.»

²⁹ نّان نتني غمكان اشكو ژران تروفيموس گو‑افسوس ءيمون د‑بولُس غ‑تمدينت، غالن ءيس‑ت‑يد‑ديدس‑ييوي س‑تگمّي ن‑ربّي.

³⁰ تزايد تقربل‑تمدينت كولّوتّ. ازّلن‑د مدّن گّوتنين، امژن بولُس زوكرن‑ت‑يد زغ‑تگمّي ن‑ربّي، قّنّ‑د فلّاس ءيفلوان

³¹ ءيرين ا‑ت‑نغن. غاكودان ا‑يسفلد‑ونمغور ن‑يعسكرين ن‑رّومان ءي‑لخبار ن‑يس‑كولّو‑تدووي ءوروشاليم.

³² ياوي‑د كرا ن‑يعسكرين د‑لقبطانات‑نسن ازّلن‑د س‑دارسن. لّيغ ژران مدّن انمغور‑ان د‑يعسكرين‑نس رژمن زغ‑بولُس ءور‑سول‑ا‑ت‑كّاتن.

³³ ءيروح‑تن‑ين‑ونمغور، يامژ غ‑بولُس، يامر ءيعسكرين ا‑ت‑كرسن س‑سنات سّناسل. ءيسقسا مدّن ءيلمّا: «ما‑يگا‑ورگاز‑اد؟ ما‑يسكر؟»

³⁴ بدون‑داغ ار‑تغوّاتن كود كرا د‑ما‑يتّيني، ايلّيغ ءور‑يژضار ا‑ييسّان ما‑ف‑ينكر ءودووي‑ان. يامر ءيلمّا اد‑اوين بولُس س‑لقصر.

³⁵ سّروحن‑ت ءيعسكرين س‑تاما ن‑يسكفال، والاينّي ار‑تن‑باهرا‑سّنوكمون مدّن ايلّيغ‑تن‑د‑يقّان اد‑اسين بولُس.

³⁶ ژّون گيس مدّن كولّوتن ار‑سّغويّون ار‑تّينين: «نغات‑ت، نغات‑ت.»

³⁷ لّيغ‑ن‑لكمن ءيمي لّقصر ءيساول بولُس س‑ونمغور ن‑يعسكرين ييني‑اس: «ءيس‑راد‑يّي‑تصامحت اد‑اك‑ينيغ كرا؟» ءيرار‑اس‑ونمغور: «ماخ، تسّنت ا‑تساولت س‑واوال ن‑ايت‑يونان؟

³⁸ ءيس‑ورد گو‑ميصر ا‑تگيت لّي‑يسّدووين مدّن ف‑سّولطا ن‑رّومان، ياوي ديدس كّوژ ءيد‑والف ن‑يان س‑لخلا، د‑كولّوتن ءوسين ديدسن ءوزّال؟»

³⁹ ييني‑اس بولُس: «گو‑يودايا اد‑گيغ زغ‑طارسوس غ‑تمازيرت ن‑كيليكيّا. طّافغ تاغامت ن‑ايت‑تمدينت‑ان، د‑نتّات ءورد تامدينت ءيمژّين ا‑تگا. ادج‑يّي اد‑ساولغ د‑مدّن‑اد.»

⁴⁰ يادج‑ت‑يلمّا‑ونمغور. ءيبيدّ بولُس غ‑يگّي ن‑يسكفال يالّ افوس‑نس ا‑تن‑يسّفسّا. لّيغ فسّان كولّوتن، ءيساول سرسن س‑واوال ن‑ايت‑يودايا.