irqqasn 20 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيلولّيين ن‑بولُس غ‑ماكيدونيّا ءولا اخايا

¹ لّيغ تهنّا‑تمدينت، يازن بولُس ما‑د‑يسّمونون ءيمحضارن، ءيساول سرسن ءيزّعام‑تن. ءيمسافاض ديدسن، يامژ اغاراس س‑تمازيرت ن‑ماكيدونيّا.

² ار‑يتكّا تيسگيو‑ان ار‑يساوال س‑مدّن ار‑تن‑يزّعام، ايلّيغ ءيلكم تامازيرت ن‑يونان.

³ ءيقاما غين كراض‑ييرن. والاينّي لّيغ ءيسكر ف‑ا‑يبّي امدا ا‑يوورّي س‑تمازيرت ن‑سوريّا، ءيسفلد ف‑كرا ن‑ايت‑يودايا ءيس‑د‑فلّاس‑مشاشكان ا‑ت‑هلكن. ييني ءيلمّا د‑يخف‑نس: «يوف اد‑وورّيغ د‑وغاراس‑ينو زريغ زغ‑ماكيدونيّا.»

⁴ مونّ ديدس كرا ن‑ايتماتن. ءيلّا سوباتروس يوس ن‑بيروس زغ‑بيريّا، ييلي اريستارخوس د‑ساكوندوس زغ‑تاسالونيكي، ييلي گايوس زغ‑داربا نتّا د‑تيموتاوس، ييلي تيخيكوس د‑تروفيموس زغ‑اسيّا.

⁵ دّون نتني زوورن‑اغ س‑تمدينت ن‑تروّاس ار‑سرنّغ‑تقلن.

⁶ ءيمّا نكُّني، لّيغ ءيزري لعيد ن‑ورخصيص نامژ اناو زغ‑فيليبّي، نسّودو سمّوس‑ووسّان ايلّيغ‑ن‑ديدسن‑نمناگّار غ‑تروّاس. نقاما غين سّا ن‑ووسّان.

ءيساول بولُس ءي‑ومناگّار غ‑تروّاس

⁷ غ‑واسّ لّحدّ نمناگّار‑د كولّواغ ا‑نبّي اغروم. ءيساول‑اغ بولُس، ييري ا‑يامژ اغاراس نديد ازكّا. ءيزايد ار‑يساوال ار طوژّونت ن‑ييض.

⁸ ءيگاتنت تيفاوين غ‑وحانو ن‑وفلّا لّي‑غ‑نمناگّار.

⁹ ييلي غين يان‑وعيّال ءيسم‑نس افتيخوس، ءيسكيوس غ‑يان‑وارّياح ار‑يتنودّوم. ءيزايد بولُس ف‑واوال‑نس ايلّيغ ءيسّايك ءيطس ف‑وعيّال‑ان، ءيضر زغ‑سنات‑تدوليو س‑واكال. اسين‑ت افن‑ت‑ين ءيمّوت.

¹⁰ ءيمّا بولُس ءيگّوز ءيكنو‑ن فلّاس يامژ گيس، ييني‑اسن: «اد‑ور‑تاسيم تاغوفت، هاتي ءيدّر.»

¹¹ يوورّي‑د ءيلمّا بولُس س‑وفلّا، ءيبّي اغروم ءيشّ ديدنّغ. ءيزايد ار‑يساوال ايلّيغ‑دي‑تغلي تافوكت. غاكودان ا‑يفّوغ ءيمون د‑وغاراس.

¹² ءيمّا اعيّال ءيدّر، اوين‑ت س‑تگمّي‑نس وورّين فجّيجن باهرا.

زغ‑تروّاس س‑ميليتوس

¹³ نفل بولُس نامژ اناو نسّودو س‑لمرسا ن‑اسّوس، اشكو ءيسكر ديدنّغ ا‑ن‑ديدس‑نمناگّار غين، ييري نتّان ا‑ن‑ياشك ف‑وضار‑نس.

¹⁴ لّيغ‑اغ‑ن‑يلكم غ‑اسّوس ناوي‑ت ديدنّغ غ‑واناو، نسّودو غ‑ومدا س‑لمرسا ن‑ميتيليني.

¹⁵ نديد ازكّا نزايد نسّودو س‑تاما ن‑يگزير ن‑خيّوس. نديد ازكّا نبّي س‑يگزير ن‑ساموس. نديد ازكّا نلكم لمرسا ن‑ميليتوس.

¹⁶ ييري بولُس ا‑يانف ءي‑افسوس ا‑ور‑ن‑يماطل غ‑تمازيرت ن‑اسيّا، اشكو ءيرا باهرا ا‑ييلي غ‑وروشاليم غ‑لعيد ن‑وين سمّوس ءيد‑مراو ءيغ‑يژضار ا‑ن‑گيس‑ييلي.

اوال ن‑بولُس ءي‑يمغارن ن‑افسوس

¹⁷ لّيغ ءيلّا بولُس غ‑ميليتوس يازن س‑يمغارن ن‑ومناگّار غ‑افسوس، ءيضالب‑اسن ادّ‑دارس‑اشكين.

¹⁸ لّيغ‑د‑وشكان ييني‑اسن: «تسّنم كولّو ماد‑سكارغ زغ‑واسّ امزوارو لّي‑غ‑د‑دارون‑كشمغ س‑تمازيرت ن‑اسيّا.

¹⁹ ار‑تخدامغ ءي‑سيديتنّغ س‑صّبر ءيگّوتن د‑يمطّاون ءولا غ‑ترفوفنت لّي‑يّي‑مدّين ايت‑يودايا.

²⁰ تسّنم ءيس‑ا‑ياون‑مالاغ كولّو ما‑را‑كُن‑ينفعا، ءور‑حصارغ ءيخف‑ينو. ار‑اون‑ت‑سّلمادغ غ‑لگدّام ن‑مدّن ءولا غ‑تگُمّا‑نّون.

²¹ ار‑بدّا‑تّينيغ س‑لمعقول ءي‑ايت‑يودايا ءولا ءيبرّانيين اد‑فلن كولّو ماد‑سكارن يُخشن، وورّين س‑ربّي امنّ س‑سيديتنّغ ياسوع.

²² «ءيمّا غيلاد ءيدحي‑يّي رّوح لقودوس اد‑دّوغ س‑وروشاليم. ءور‑سّينغ ما‑راد‑يّي‑يجرو غين.

²³ يات‑تغاوسا كاد‑سّنغ: غ‑كرايگاتّ تامدينت ار‑يّي‑يتّيني رّوح لقودوس س‑لمعقول ءيزد غين ا‑غ‑ا‑سري‑تقلن ءيسكراف ءولا تارفوفنت.

²⁴ ءيمّا نكّي ءور‑ا‑تحاسابغ تودرت‑ينو ءيس‑تگا كرا. ءور‑ريغ ابلا ا‑تازّالغ ارد روحغ تّمي ن‑وغاراس‑ينو، كمّلغ تاووري لّي‑يّي‑يفكا سيديتنّغ ياسوع، سّلكمغ لخبار ءيفولكين ف‑لباراكا ن‑ربّي.

²⁵ «ءيمّا كونّي كولّوكن لّي‑دار‑تلولّيغ ار‑اون‑تبرّاحغ ف‑تگلديت ن‑ربّي، سّنغ ءيس‑ور‑سار‑را‑تژرم ءودم‑ينو.

²⁶ والاينّي راد‑اون‑ينيغ غاسّاد: ءيغ‑يلّا ما‑گيگون‑يتّهلكن، ءورد نكّي ا‑ف‑لّان ءيدامّن‑نس.

²⁷ اشكو ءور‑حصارغ ءيخف‑ينو والاينّي مليغ‑اون ف‑كولّو ما‑گيگون‑يرا ربّي.

²⁸ اويات‑ستّ غيلاد غ‑يخف‑نّون، تاويم‑تّ ءولا غ‑تووروت كولّوتّ لّي‑ف‑كُن‑يرور رّوح لقودوس اد‑اس‑تگم ءينگابالن، تكسم امناگّار ن‑ربّي لّي‑يسغا س‑يدامّن‑نس.

²⁹ سّنغ ءوسّان لّي‑غ‑را‑كُن‑فلغ نكّي، را‑ن‑كشمن‑ووشّانّ شقانين س‑گراتون، راد‑سّياگّاسن تاوروت.

³⁰ راد‑نكرن ءولا كرا ن‑مدّن غ‑گراتون، ار‑سّگريويلن لحقّ باش ا‑ن‑لدّين ءيمحضارن ا‑تن‑تابعان.

³¹ ف‑مايان ا‑ف‑راد‑اون‑ينيغ، رارات لعاقل‑نّون ار‑دي‑تسوينگيمّ مامنك ا‑ديدون‑سكارغ كراض ءيسگُّاسن غ‑ييض ءولا ازال ار‑بدّا‑تنصاحغ كرايگاتّ يان گيگون ار ءيمطّاون.

³² «ءيمّا غيلاد را‑كُن‑فلغ غ‑وفوس ن‑ربّي، فلغ دارون اوال لّباراكا‑نس لّي‑يژضارن ا‑كُن‑يسّدوس ءيشّكشم‑كُن س‑تميخار گّوتنين لّي‑را‑ييلي ءي‑كولّو ويلّي ءيژلي اد‑گن وينس.

³³ ءور‑جّود نكّي ا‑ن‑يضمعن نّوقرت نغد ءورغ نغد تيملسا ن‑كرا ن‑يان گيگون.

³⁴ تسّنم ءيزد س‑يفاسّن‑ينو ا‑س‑ا‑دي‑تراراغ ماد‑حتاجّاغ نكّي ءولا اسمون‑ينو.

³⁵ كولّو ماد‑سكارغ، ار‑اون‑سرس‑مالاغ ءيس‑فلّانّغ‑يلّا ا‑نتنهاتاف غمكاد باش ا‑نعاون وينّا ضعفنين، ار‑نسوينگيم غ‑واوال ن‑سيديتنّغ ياسوع لّيغ ءينّا ‹امباركي ا‑يگا غوالّي ياكّان، ءوگُّار ن‑والّي ءيتامژن.› »

³⁶ غير ءيكمّل بولُس اوال‑اد، ءيضر نتّا ديدسن ف‑يفادّن‑نسن، ءيژّالّ ءيضالب ربّي.

³⁷ حبّلن‑ت‑يد ار‑گيس‑سّودونّ ار‑الّان كولّوتن.

³⁸ طيّر‑اسن باهرا اشكو ءينّا‑ياسن ءور‑سول‑را‑ت‑ژرن. مونّ ديدس ءيلمّا ار اناو.