irqqasn 19 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

امودّو ويس كراض ن‑بولُس ءي‑تبرّاحت

¹ غاكود لّيغ ءيلّا ابولُس غ‑كورينتوس، ءيزري بولُس زغ‑طوژّونت ن‑تمازيرت‑ان، ءيلكم تامدينت ن‑افسوس. ياف‑ن غين كرا ن‑يمحضارن،

² ءيسقسا‑تن: «ءيس‑اون‑د‑يتياوفكا رّوح لقودوس لّيغ تومنم؟» ءينين‑اس: «ءور‑جّو‑نسفلد ءيس‑يلّا كرا ن‑رّوح لقودوس.»

³ ءيسقسا‑تن ءيلمّا: «ما‑يگا‑ودوم لّي‑س‑تدّمّ؟» ءينين‑اس: «ءودوم لّي‑س‑ا‑يسّدّام يوحانّا.»

⁴ ييني‑اسن بولُس: «ءيكّا‑تّين يوحانّا ار‑يسّدّام غويلّي رانين اد‑فلن دّنوب‑نسن وورّين س‑ربّي، والاينّي ءيساول‑اسن ف‑والّي را‑د‑ياشك تيگيرا‑نس، ا‑ت‑يگان د‑ياسوع. يوصّا‑تن اد‑سرس‑امنّ.»

⁵ لّيغ سفلدن ءيمحضارن‑ان ءي‑مايد‑اسن‑ينّا بولُس، ءيسّدّم‑تن غ‑وامان س‑يسم ن‑سيديتنّغ ياسوع.

⁶ ءيسرس فلّاسن ءيفاسّن‑نس، س‑د‑فلّاسن‑يگّوز رّوح لقودوس، ار‑ساوالن س‑يواليون ءيغريبن ار‑تبرّاحن س‑ماد‑اسن‑يمالا ربّي.

⁷ ما‑يتگّان سين د‑مراو ن‑ورگاز اد‑گان.

تابرّاحت ن‑بولُس غ‑افسوس

⁸ كراض‑ييرن ا‑يكشّم بولُس س‑تگمّي ن‑تژالّيت ار‑يساوال د‑مدّن س‑زّعامت، ءيگ‑ن تيقّي‑نس اد‑اسن‑يمل ءيس‑يُغژان مايلّي‑اسن‑يتّيني ف‑تگلديت ن‑ربّي.

⁹ والاينّي كرا گيسن وورّين سّيقارن ءيخف‑نسن، ءور‑رين اد‑امنّ. ار‑رگّمن غ‑وغاراس لّماسيح غ‑لگدّام ن‑كولّو وييّاض. غاكودان ا‑يفّوغ بولُس زغ‑دارسن، ياوي ديدس ءيمحضارن، يوورّي س‑لمدرست ن‑تيرانّوس ار‑غين‑يساوال د‑مدّن اسّ ف‑واسّ.

¹⁰ غمكان ا‑يزّري سين ءيسگُّاسن، ايلّيغ سفلدن كولّو ءيمزدغن ن‑اسيّا ءي‑واوال ن‑سيديتنّغ، ايت‑يودايا ءولا ءيبرّانيين.

غايلّي ءيجران ءي‑تاروا ن‑سكاوا

¹¹ ار‑يسكار ربّي لمعجيزات ف‑وفوس ن‑بولُس، ءور‑جّو‑ژرين مدّن زوند نتنتي.

¹² ار‑تّاوين ءيشرويضن ءولا تيبانّكيو زغ‑وفوس‑نس ءي‑يموضان‑نسن، ار‑تجّين ار‑زگيسن‑تفّوغن لجنون أُخشنّين.

¹³ ءيلين غين كرا ن‑ايت‑يودايا ار‑تلولّين ار‑سّوفوغن لجنون. غالن ءيس‑ژضارن اد‑سّوفوغن لجنون س‑يسم ن‑سيديتنّغ ياسوع، ار‑تن‑تامرن: «فّوغات س‑يسم ن‑ياسوع لّي‑س‑ا‑يتبرّاح بولُس.»

¹⁴ غمكان اد‑سكارن سّا ن‑ايتماتن، تاروا ن‑يان‑ونمغور ن‑تگمّي ن‑ربّي ءيسم‑نس سكاوا.

¹⁵ والاينّي ءيرور‑اسن لجنّ‑ان: «ياسوع سّنغ‑ت، ءولا بولُس سّنغ ما‑يگا، والاينّي ما‑تگام كونّي؟»

¹⁶ ياكُي‑ن‑فلّاسن‑ومجنون ار‑گيسن‑يكّات ءينرو‑تن كولّوتن. روولن زغ‑تگمّي، تياگّاسن بّينت‑تملسا‑نسن.

ءيسحّارن لّي‑ومنّين

¹⁷ سفلدن كولّو ءيمزدغن ن‑افسوس ف‑ما‑يجران، ايت‑يودايا ءولا ءيبرّانيين. وورّين ءيكساضن كولّوتن، ءوقّرن ءيسم ن‑سيديتنّغ ياسوع باهرا.

¹⁸ ءيمّا غويلّي ءومنّين، ءيگّوت گيسن ما‑د‑يوشكان ار‑تقرّان س‑يسكّيرن أُخشنّين لّي‑ستّين‑كّان ار‑تن‑سكارن.

¹⁹ كيگان د‑يسحّارن ا‑د‑يسّمونّ ارّاتن‑نسن جدرن‑تن غ‑لگدّام ن‑مدّن. لّيغ حاسبن اتيگ ن‑وارّاتن‑ان، افن‑ين سمّوس ءيد‑مراو ن‑يد‑والف (000‏.50) ن‑وقاريد ن‑نّوقرت.

²⁰ غمكان ا‑س‑ا‑يتزاياد‑واوال ن‑سيديتنّغ س‑جّهد، يوورّي ءيتياوسّان غ‑كرايگاتّ ماني.

ءودووي ن‑يسيّاخن غ‑افسوس

²¹ تيگيرا ن‑مايان ءيسوانگم بولُس، ءيمل‑اس رّوح لقودوس ءيس‑ت‑يد‑يقّان ا‑يزري زغ‑ماكيدونيّا د‑اخايا س‑وروشاليم. ءينّا: «تيگيرا ن‑ماد‑كّيغ غين، ءيقّان‑يّي‑د اد‑ژرغ ءولا تامدينت ن‑روما.»

²² يازن ءيلمّا سين ءيمعاوانّ‑نس تيموتاوس د‑اراستوس ا‑ت‑زوورن س‑ماكيدونيّا، ءيمّا نتّا سول‑ن‑يقاما يان كرا غ‑اسيّا.

²³ والاينّي غ‑ووسّان‑ان تنكر لفرتونت ءيگّوتن ف‑سّيبت ن‑وغاراس لّماسيح.

²⁴ ءيلّا غين يان‑وسيّاخ ءيسم‑نس ديميتريوس ار‑يتعدال تيگُمّا مژّينين زغ‑نّوقرت زوند تيگمّي لّي‑غ‑ا‑تعبادن ءيلاها ‹ارطاميس›. ار‑تامژن ءيسيّاخن ما‑يگّوتن ف‑تووري‑ان.

²⁵ ءيسّمون‑تن‑د كولّو ديميتريوس ييني‑اسن: «وا‑يرگازن، تسّنم ءيس‑ا‑نتامژ لخير ف‑تووري‑اد‑نّغ.

²⁶ والاينّي تسفلدم ءي‑غوان مي تّينين بولُس تژرم غايلّي ءيسكار، ار‑يتّيني ءيلاهات لّي‑سكرن ءيفاسّن ن‑بنادم ءورد ءيلاهات اد‑گان. هاتي ءيرور مدّن گّوتنين ءيجلو‑تن غيد غ‑افسوس ءولا غ‑كولّو تامازيرت ن‑اسيّا.

²⁷ ءورد غير تاووري‑نّغ ا‑را‑يخسر، والاينّي راد‑وورّين مدّن ار‑رگّمن ءولا غ‑تگمّي ن‑يلاها ءيمقّورن ارطاميس، ءينين ءيس‑ور‑تگي يات ختالّي كولّو تعبادن مدّن غ‑اسيّا ءولا دّونيت كولّوتّ.»

²⁸ لّيغ سفلدن ءي‑يواليون‑اد نكرن‑د گيسن ءيريين ار‑سّغويّون ار‑تّينين: «تامقّورت ا‑تگا ارطاميس ن‑ايت‑افسوس.»

²⁹ دووين باهرا، ايلّيغ تقربل‑تمدينت كولّوتّ. نكرن مدّن گّوتنين غوين سين ايت‑ماكيدونيّا زغ‑وسمون ن‑بولُس، ءيسماون‑نسن گايوس د‑اريستارخوس، زوكرن‑تن س‑وسايس لّي‑غ‑ا‑تمونون ايت‑تمدينت‑ان.

³⁰ بولُس ءيرا ا‑يفتو س‑وامّاس ن‑مدّن‑ان ا‑سرسن‑يساول، والاينّي ءور‑ت‑ودجين ايتماتن.

³¹ كرا ن‑يمدّوكُّال ن‑بولُس، گان ءودماون مقّورنين ن‑تمازيرت‑ان، ازنّ‑اس ماد‑اس‑يتّينين: «ا‑ور‑تسّبايّنت ءيخف‑نّك غ‑وسايس ن‑تمدينت.»

³² مروين مدّن ار‑سّغويّون، كود يان د‑ما‑يتّيني. ءيگّوت گيسن ما‑ور‑يسّينّ ما‑ف‑ن‑مونّ.

³³ ءينكر كرا گيسن غاكودان ءينين ءيزد يان‑ورگاز ءيسكاندر اد‑دار اوال، دحين‑ت‑ين ايت‑يودايا س‑لگدّام ن‑مدّن ا‑سرسن‑يساول. يالّ افوس‑نس ا‑تن‑يسّفسّا ييري اد‑اسن‑يمل ءيس‑ورد ايت‑يودايا ا‑يسّنكرن ءودووي.

³⁴ والاينّي لّيغ ژران ءيزد گو‑يودايا ا‑يگا، نكرن‑داغ ار‑سّغويّون ار‑تّينين: «تامقّورت ا‑تگا ارطاميس ن‑ايت‑افسوس.» زايدن سنات تاساعين اد‑سّغويّون س‑واوال‑ان.

³⁵ قامان غمكان ايلّيغ ءينكر‑وكتاتبي لّمحكاما. ءيسّفسّا‑تن ييني‑اسن: «واي‑ايت‑افسوس. ءيس‑يلّا ما‑ور‑يسّينّ تامدينت ن‑افسوس ا‑يگابلن تيگمّي ن‑ارطاميس تامقّورت د‑وژرو ن‑صّورت‑نس لّي‑د‑يضرن زغ‑يگنّا؟

³⁶ كولّو دّونيت تسّن تيغاوسيوين‑اد. ءور‑يژضار يان اد‑اسنت‑يانف. ءيمّا غيلاد ءيلّا فلّاون ا‑تفسّام، ا‑ور‑تسكرم كرا ف‑ا‑كُن‑تّيگُراژ.

³⁷ ها‑كونّي تيويم‑د ءيرگازن‑اد س‑غيد واخّا ءور‑وكيرن تيگُمّا لّي‑غ‑ا‑نتعباد ءولا‑دا‑رگّمن غ‑يلاها‑نّغ.

³⁸ ءيغ‑يرا ديميتريوس ءولا ءيمدّوكُّال‑نس اد‑صرضن ءي‑كرا ن‑يان، ءيلّا فلّاسن اد‑دّون س‑لمحكاما. اشكو سكرن ءيمغارن لّمحكاما ءوسّان ا‑گيسن‑سفليدن ءي‑مدّن. را‑تيژضارم ا‑ن‑دارسن‑تمصاراضم،

³⁹ نغد ءيغ‑ترام كرا ياضني، ءيخصّا‑كُن ا‑تي‑تسّنفاصالم ءي‑نگراتون غ‑دار ءيمغارن ن‑تمدينت.

⁴⁰ والاينّي غايد دارنّغ ءيجران غاسّاد، ءيلّا گيس ما‑ف‑ا‑نتيكساض، ا‑ور‑سرنّغ‑اشتكّان لحوكّام ن‑رّومان، ءينين ءيزد نتني ا‑ف‑ينكر‑ودووي‑اد. ءور‑دارنّغ ما‑نتّيني ف‑يمرواين‑اد، اشكو ءور‑نژضار ا‑نيني ما‑ف‑د‑مونّ مدّن‑اد گّوتنين.»

⁴¹ لّيغ ءينّا ماياد، ءيسّمسر‑تن س‑تگُمّا‑نسن.