irqqasn 18 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تاووري ن‑بولُس غ‑كورينتوس

¹ تيگيرا ن‑مايان ءيفّوغ بولُس زغ‑اتينا ءيدّو س‑تمدينت ن‑كورينتوس.

² ءيمناگّار غين يان‑ورگاز گو‑يودايا ءيسم‑نس اكيلا، ءيگ لاصل‑نس زغ‑تمازيرت ن‑بونتوس. ءيكّا‑د تامازيرت ن‑يطاليا غ‑ووسّان‑ان، نتّا د‑تمغارت‑نس بريسكيلّا، اشكو قايصر كلوديوس يومر كولّو ايت‑يودايا اد‑فّوغن تامدينت ن‑روما. ءيدّو دارسن بولُس س‑تگمّي،

³ ءيگاور دارسن ار‑ديدسن‑يتخدام، اشكو يات ا‑تگا‑تووري‑نسن نتني د‑بولُس، ار‑گنّون ءيخيّامن.

⁴ كرايگاتّ اسّ ن‑وسونفو ار‑يتّيدو بولُس س‑تگمّي ن‑تژالّيت، ار‑يساوال د‑ايت‑يودايا د‑يبرّانيين، ءيگ‑ن تيقّي‑نس ا‑تن‑يرار اد‑امنّ زوند نتّا.

⁵ لّيغ‑د‑يلكم سيلا د‑تيموتاوس زغ‑تمازيرت ن‑ماكيدونيّا، افن‑ين بولُس ءيلها س‑تبرّاحت ن‑واوال ن‑ربّي، ار‑يساوال س‑ايت‑يودايا س‑لمعقول ييني‑اسن: «ياسوع ا‑يگان لماسيح لّي‑س‑ا‑تّقلم.»

⁶ والاينّي ژين ديدس ايت‑يودايا رگمن‑ت ايلّيغ فلّاسن ءيسّوس تيملسا‑نس ييني‑اسن: «دّنوب‑نّون ف‑يخف‑نّون. نكّي برّاغ گيگون. هاتي زغ‑غيلاد راد‑دّوغ س‑يبرّانيين.»

⁷ ءيفّوغ زغ‑دارسن، ءيكشم س‑تگمّي ن‑يان‑وبرّاني ءيسم‑نس تيتيوس‑يوسطوس. ءيگا يان زغ‑ويلّي تعبادنين ربّي، تيلي‑تگمّي‑نس غ‑تاما ن‑تگمّي ن‑تژالّيت.

⁸ ءيمّا كريسبوس امغار ن‑تگمّي ن‑تژالّيت، نتّا د‑ايت‑تگمّي‑نس كولّوتن، وورّين ءومنّ س‑سيديتنّغ. گّوتن وييّاض غ‑تمدينت‑ان ن‑كورينتوس وورّين ءومنّ لّيغ سفلدن ءي‑ماد‑اسن‑يتّيني بولُس. سّدّمن‑تن ءيلمّا ايتماتن غ‑وامان.

⁹ يان‑ييض ءيساول‑د سيديتنّغ س‑بولُس غ‑توارگيت ييني‑اس: «اد‑ور‑تيكساطّ. زايد ار‑تساوالت د‑مدّن ا‑ور‑تفسّات.

¹⁰ هاتي لّيغ ديدك، ءور‑يلّي ما‑را‑ك‑يلكم س‑گار، اشكو گّوتن مدّن‑ينو غ‑تمدينت‑اد.»

¹¹ ءيقاما بولُس غين اسگُّاس د‑مناصّ، ار‑اسن‑يسّلماد اوال ن‑ربّي.

¹² والاينّي غ‑ووسّان لّي‑غ‑يگا گاليون لحاكم غ‑تمازيرت‑ان ن‑اخايا، نكرن ايت‑يودايا كولّوتن غوين بولُس اوين‑ت س‑لمحكاما

¹³ ءينين فلّاس: «ارگاز‑اد ار‑يترارا مدّن اد‑فّوغن زغ‑شّرع ن‑موسا ار‑تعبادن ربّي س‑مامنك ياضني.»

¹⁴ ييري بولُس ا‑فلّاسن‑يرار اوال، س‑ينكر گاليون غاكودان ييني ءي‑ايت‑يودايا: «مراد ءيس‑تگا‑تغاوسا‑ياد تين كرا ءيفّوغن لقانون نغد كرا لّباضل يُخشنّ، راد‑اون‑سفلدغ.

¹⁵ والاينّي ءور‑تگي ختاد غير تاغاوسا ن‑يواليون د‑يسماون ءولا شّرع‑نّون. زايدات تسّنفاصالم‑ت كونّي ءي‑نگراتون. ءور‑راد‑تحكامغ نكّي ف‑وان تيغاوسيوين‑اد.»

¹⁶ ءيسّمسر‑تن زغ‑لمحكاما.

¹⁷ فّوغن كولّو، غوين سوستانيس امغار ن‑تگمّي ن‑تژالّيت، ار‑ت‑كّاتن غ‑تاما لّمحكاما. ءيمّا لحاكم گاليون ءور‑تّ‑اكُّ‑گيسن‑ييوي.

يوورّي بولُس س‑انطاكيّا

¹⁸ ءيقاما بولُس غ‑دار ايتماتن غ‑كورينتوس يان منّاو‑ووسّان. لّيغ‑ديدسن‑يمسافاض، ءيدّو س‑لمرسا ن‑كانخاريّا. غين ا‑غ‑يسّماكّرد اگايّو‑نس، ءيگ مايان تاماتارت ن‑كرا‑س‑يقاول ءي‑ربّي. يامژ ءيلمّا اناو ءيسّودو غ‑ومدا س‑تمازيرت ن‑سوريّا، ياوي ديدس اكيلا د‑بريسكيلّا.

¹⁹ روحن تامدينت ن‑افسوس، ءيفل‑تن. ءيكشم نتّان س‑تگمّي ن‑تژالّيت ار‑يساوال د‑ايت‑يودايا.

²⁰ ضالبن زغ‑گيس ا‑ديدسن‑يقاما، والاينّي ءور‑يري ا‑يماطل غين.

²¹ ءيمسافاض ديدسن ييني‑اسن: «ءيغ‑يرا ربّي راد‑د‑وورّيغ س‑دارون.» ءيفّوغ افسوس ءيسّودو غ‑ومدا،

²² ايلّيغ ءيلكم لمرسا ن‑قايصريّا. يامژ اغاراس س‑وروشاليم، ءينسالّام د‑ايتماتن ن‑ومناگّار ن‑غين، ءيكمّل ءيلمّا س‑انطاكيّا.

²³ ءيقاما گيس كرا ن‑ووسّان، ءيمودّو ءيلمّا ار‑يتكّا تامازيرت ن‑گالاطيّا ءلا فريجيّا ار‑يسّدوس ءيمحضارن كولّوتن.

تابرّاحت ن‑ومسلمد ابولُس

²⁴ غ‑ووسّان‑ان ا‑غ‑د‑يوشكا يان گو‑يودايا ءيسم‑نس ابولُس س‑افسوس. ءيگا لاصل‑نس زغ‑تمدينت ن‑يسكانداريّا. ءيگ واد باهرا ءيسّنّ مامنك ا‑يساوال، ييسّان ارّاتن ن‑ربّي باهرا.

²⁵ ءيسفلد ف‑ولمّود ن‑وغاراس ن‑سيديتنّغ، ار‑يساوال س‑مدّن س‑زّعامت ءيگّوتن. ار‑تن‑يسّلماد ف‑يسكّيرن ن‑ياسوع د‑يواليون‑نس غمكلّي گان، والاينّي ءور‑يسّين ف‑ودوم ابلا غوالّي‑س‑ا‑يسّدّام يوحانّا.

²⁶ يان‑واسّ ار‑يساوال س‑زّعامت غ‑تگمّي ن‑تژالّيت، تسفلد‑اس بريسكيلّا د‑اكيلا. اوين‑ت س‑تگمّي، ملن‑اس ءوگُّار ف‑وغاراس ن‑ربّي باش ا‑ت‑ييسّان غمكلّي ءيگا.

²⁷ ييري ءيلمّا ا‑يبّي امدا س‑تمازيرت ن‑اخايا. زّعامن‑ت ايتماتن ا‑يسكر غمكان، اران يات‑تبرات ءي‑يمحضارن غ‑اخايا، ضالبن‑تن ا‑ت‑ين‑شّكشمن س‑گراتسن. لّيغ ءيروح نتّان اخايا، ار‑باهرا‑يتعاوان غويلّي ءيبارك ربّي ءومنّ س‑لماسيح.

²⁸ اشكو ار‑يساوال س‑ايت‑يودايا غ‑لگدّام ن‑كولّو مدّن، ايلّيغ ءور‑ژضارن نتني ا‑فلّاس‑رارن اوال. ار‑اسن‑يمالا زغ‑وارّاتن ن‑ربّي ءيزد ياسوع ا‑يگان لماسيح لّي‑س‑ا‑تقلن.