irqqasn 17 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءودووي غ‑تاسالونيكي

¹ زرين زغ‑تمدينت ن‑امفيبوليس ءولا ابولونيّا، لكمن تامدينت ن‑تاسالونيكي. تيلي غين يات‑تگمّي ن‑تژالّيت ن‑ايت‑يودايا.

² ءيكشم سرس بولُس غمكلّي ءيسكار غ‑تمدينين ياضني. كراض‑ووسّان ن‑وسونفو ار‑غين‑يساوال د‑مدّن، ار‑اسن‑يمالا ما‑يتياران غ‑وارّاتن ن‑ربّي

³ ار‑اسن‑يتّيني: «ءيقّان‑د غوالّي ءيگان لماسيح ا‑يرفوفن باهرا، ءينكر‑د ءيلمّا زغ‑لموت.» ار‑اسن‑يتّيني: «ياسوع لّي‑ف‑ا‑ياون‑تبرّاحغ، نتّان ا‑يگان لماسيح لّي‑س‑ا‑تّقلم.»

⁴ امنّ كرا ن‑ايت‑يودايا س‑مايلّي‑اسن‑يتّيني، نتني ءولا يان‑منّاو زغ‑يبرّانيين لّي‑تعبادنين ربّي، د‑كرا ن‑تمغارين ءيست‑تگُمّا مقّورنين غ‑تمدينت‑ان، وورّين كولّو بيدّن د‑بولُس د‑سيلا.

⁵ ءيمّا وييّاض غ‑ايت‑يودايا ءوسين فلّاسن تانوّاشت. اوين‑د كرا ن‑يرگازن أُخشنّين زغ‑سّوق، غرن ءي‑مدّن گّوتنين اد‑ديدسن‑مونّ، سّدووين‑د تامدينت كولّوتّ. ازّلن س‑تگمّي ن‑ياسون، ار‑سيگّيلن س‑بولُس د‑سيلا باش ا‑تن‑سّوفغن س‑وامّاس ن‑مدّن.

⁶ لّيغ ءور‑تن‑وفين، زوكرن ياسون د‑كرا ن‑ايتماتن ياضني س‑دار ءيمغارن ن‑تمدينت، ار‑تغوّاتن ار‑تّينين: «غويلّي سّگراولنين دّونيت كولّوتّ، هاتني ءوشكان‑د ءولا س‑غيد،

⁷ ءيشّكشم‑تن ياسون س‑تگمّي‑نس. فّوغن نتني زغ‑لقانون ن‑قايصر، ار‑تّينين ءيلّا يان‑وگلّيد ياضني ءيسم‑نس ياسوع.»

⁸ لّيغ سفلدن مدّن د‑يمغارن‑نسن ءي‑ماياد، مروين باهرا.

⁹ ضالبن ءيلمّا فلّاسن ضّمانت زغ‑ياسون د‑ايتماتن ياضني، رژمن‑اسن.

ايت‑بيريّا ار‑سيگّيلن غ‑وارّاتن ن‑ربّي

¹⁰ لّيغ‑د‑ضرنت تيلّاس، نكرن ايتماتن سافضن بولُس د‑سيلا س‑بيريّا. لّيغ لكمن تامدينت‑ان، كشمن س‑تگمّي ن‑تژالّيت ن‑ايت‑يودايا.

¹¹ مدّن‑ان ن‑بيريّا، ءور‑قّورن ءيخفاون‑نسن زوند ايت‑تاسالونيكي. ار‑تّيرين اد‑سفليدن ءي‑واوال ن‑سيديتنّغ ار‑تّ‑گيس‑تاوين باهرا، ار‑سيگّيلن غ‑وارّاتن ن‑ربّي اسّ ف‑واسّ، باش اد‑ژرن ءيس‑يُغژان مايلّي‑اسن‑يتّيني بولُس.

¹² ييگات ما‑يوورّين يومن زغ‑ايت‑يودايا ءولا كرا ن‑تمغارين تيبرّانيّين ءيست‑تگُمّا مقّورنين د‑يرگازن ءيبرّانيين گّوتنين.

¹³ ءيمّا ايت‑يودايا غ‑تاسالونيكي سفلدن ف‑مامنك ا‑يتبرّاح بولُس س‑واوال ن‑ربّي غ‑بيريّا. دّون سّهيّسن مدّن سّدووين ءولا تامدينت‑ان.

¹⁴ نكرن ايتماتن غاكودان، سافضن بولُس س‑تاما ن‑ومدا. ءيمّا سيلا د‑تيموتاوس قامان غ‑بيريّا.

¹⁵ ءيدّو بولُس، اوين‑ت ءيمدّوكُّال‑نس ار تامدينت ن‑اتينا، فلن‑ت‑ين غين وورّين س‑بيريّا. يوصّا‑تن بولُس اد‑ينين ءي‑سيلا د‑تيموتاوس ا‑ن‑دارس‑اشكين اد‑ور‑ماطلن.

تابرّاحت ن‑بولُس غ‑اتينا

¹⁶ لّيغ ا‑سرسن‑يتقل بولُس غ‑اتينا، ءيژر تامدينت‑ان تعمّر س‑لاصنام ار‑تن‑تعبادن مدّن. طيّر‑اس باهرا.

¹⁷ ءيكشم س‑تگمّي ن‑تژالّيت ار‑يساوال د‑ايت‑يودايا د‑يبرّانيين لّي‑تعبادنين ربّي. ار‑يساوال ءولا غ‑سّوق اسّ ف‑واسّ د‑وينّا گيس لّانين.

¹⁸ ءيمناگّار كرا ن‑يمسلمدن لّفالسافا، گان ‹ءيبيكوريين› ءولا ‹رواقيين›. كرا گيسن ءينّا فلّاس: «غواد ءيجروبّوجن، ما‑يرا ا‑ييني؟» ءينين وييّاض: «ءيرواس ءيس‑ا‑يساوال ف‑كرا ن‑يلاهات ار‑تن‑تعبادن مدّن غ‑تميزار ياضني.» غالن نتني ءيس‑ا‑يساوال ف‑سين ءيلاهات اشكو ار‑يادّر ‹ياسوع› ءولا ‹تانكرا›.

¹⁹ اوين‑ت ءيلمّا س‑وسگاور ن‑يمغارن ن‑تمدينت‑ان، ءيگا اسگاور لّي‑مي‑تّينين ‹اريوس‑باگوس›. ءينين ءي‑بولُس: «ءيس‑تريت اد‑اغ‑تملت ما‑يعنا‑ولمّود‑اد لّجديد لّي‑س‑ا‑تّبرّاحت؟

²⁰ اشكو ار‑تساوالت ف‑كرا ن‑تغاوسيوين ءور‑جّو‑نسفلد ءي‑زوند نتنتي. نرا ا‑نيسّان ما‑تگا لمعنا‑نسنت.»

²¹ غمكاد اد‑گان ايت‑اتينا ءولا كولّو ويلّي زدغنين غ‑تمدينت‑ان، ءور‑ا‑سّلهاون ءيخف‑نسن ابلا اد‑سفليدن ار‑ساوالن ف‑اينّا ءيگان تاغاوسا لّجديد.

²² ءيبيدّ بولُس غ‑وامّاس ن‑وسگاور ييني‑اسن: «واي‑ايت‑اتينا، ژريغ‑كُن ار‑باهرا‑تّوقّارم ءيلاهات مكنّا گان.

²³ لّيغ ا‑تفجّيجغ غ‑تمدينت‑نّون ار‑تمنادغ ءيدغارن لّي‑غ‑ا‑تّعبادم. افغ‑ن يان غ‑يژران لّي‑دار تّژالّام، تياران گيس ءيواليون‑اد ‹ءيلاه ءور‑يتياوسّانّ›. هان غوالّي تّعبادم بلا‑تي‑تسّنم، نتّان ا‑ف‑راد‑اون‑ساولغ.

²⁴ اشكو ربّي لّي‑يسكرن دّونيت ءولا كولّو ما‑گيس‑يلّان، نتّان ا‑يگان سيديس ن‑يگنّا ءولا وين‑واكال. ءور‑ا‑يزدّغ غ‑تگُمّا تياوسكارنين س‑يفاسّن ن‑بنادم.

²⁵ ءور‑ت‑يخصّا كرا نسكر نكُّني، اشكو ءور‑يحتاجّا يات. نتّان ا‑ياكّان ءي‑كولّو مدّن تودرت د‑ونفوس ءولا كرايگاتّ كرا.

²⁶ ءيسكر زغ‑تاروا ن‑يان‑ورگاز كولّو تاسوتين ن‑بنادم اد‑زدغن غ‑تميزار ن‑دّونيت كولّوتّ. ءيحودّا‑ياسن ءيسگُّاسن ن‑تودرت، ءيگلي‑اسن يووتّا ن‑يمزدغن‑نسن.

²⁷ ءيسكر‑اسن غمكان باش اد‑سيگّيلن س‑ربّي ا‑ور‑يميل مناگّارن ديدس ءيسّانّ‑ت. والاينّي راد‑اون‑ينيغ، هان نتّا ءور‑ن‑ياگّوگ ف‑يان گينّغ

²⁸ اشكو ‹نتّان ا‑غ‑ندّر نفتو نيلي.› غمكلّي نّان كرا ن‑ايت‑ومارگ‑نّون: ‹ءولا نكُّني نگا تاروا‑نس.›

²⁹ «لّيغ نگا نكُّني تاروا ن‑ربّي، ءيلّا فلّانّغ ا‑ور‑نغال ءيس‑يگا نتّان زوند كرا ءيتياوسكارن زغ‑وورغ نغد نّوقرت نغد اژرو س‑يفاسّن ءولا لعاقل ن‑بنادم.

³⁰ غايد ءيزرين ءيصبر ربّي د‑ويلّي ءور‑سّينّين مايان. ءيمّا غيلاد يومر كولّو مدّن غ‑كرايگاتّ ماني اد‑فلن كولّو ماد‑سكارن يُخشن.

³¹ اشكو ءيقصاد يان‑واسّ لّي‑غ‑را‑يوت لحوكم س‑لحقّ ف‑كولّو دّونيت ف‑وفوس ن‑يان‑ورگاز لّي‑يژلي، ءيمل سرس تاماتارت ءي‑كولّو مدّن لّيغ‑ت‑يد‑يسّنكر زغ‑لموت.»

³² لّيغ سفلدن ءي‑مايد ءينّا بولُس ف‑يان‑د‑ينكرن زغ‑لموت، كرا گيسن ار‑يضصّا. ءيمّا وييّاض نّان: «ار تاوالا ياضني تساولت‑اغ ف‑تغاوسا‑ياد.»

³³ ءيفّوغ ءيلمّا بولُس زغ‑دارسن.

³⁴ كرا گيسن يومن س‑ما‑س‑اسن‑ينّا، مونّ ديدس. ءيلّا گيسن يان زغ‑يمغارن ن‑وسگاور‑ان ءيسم‑نس ديونيسيوس. تيلي يات‑تمغارت ءيسم‑نس داماريس، ءيلين كرا ن‑مدّن ياضني.