irqqasn 16 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

بولُس ييوي ديدس تيموتاوس

¹ ار‑يتمودّو بولُس ايلّيغ ءيزري زغ‑تمدينت ن‑داربا ءيروح تامدينت ن‑ليسترا. ييلي غين يان‑ومحضار لّماسيح ءيسم‑نس تيموتاوس، ءيگ يوس ن‑يات‑تمومنت ءولّت‑يودايا ءيمّا باباس ءيگا گو‑يونان.

² ايتماتن غ‑ليسترا ءولا غ‑يقونيّا ار‑كولّو‑تّينين ف‑تيموتاوس ءيس‑يگا امومن ءيفولكين.

³ ييري بولُس ا‑ت‑ديدس‑ياوي. ءيژّالّ‑اس غاكودان ءي‑دّات‑نس، اشكو ايت‑يودايا غ‑تمدينت‑ان سّنّ ءيس‑يگا باباس ابرّاني.

⁴ دّون ءيلمّا ار‑تكّان تيمدينين، ار‑تاوين لخبار ءي‑ايتماتن ف‑مايلّي‑ف‑د‑مشاشكان ءيرقّاسن د‑يمغارن غ‑وروشاليم، ار‑تن‑توصّان اد‑سكارن س‑يواليون‑ان.

⁵ غمكاد ا‑س‑ا‑تدوسن ءيمناگّارن ن‑ايتماتن غ‑وغاراس لّماسيح، ار‑تّيگاتن اسّ ف‑واسّ.

تاوارگيت ن‑بولُس غ‑تمدينت ن‑تروّاس

⁶ ءور‑تن‑يودجي رّوح لقودوس اد‑تبرّاحن س‑واوال ن‑ربّي غ‑تمازيرت ن‑اسيّا. زايدن غاكودان ار‑تكّان تامازيرت ن‑فريجيّا ءولا گالاطيّا.

⁷ لّيغ لكمن تاما ن‑ميسيّا ءيرين اد‑كشمن س‑تمازيرت ن‑بيتينيّا، والاينّي ءور‑تن‑يودجي رّوح ن‑ياسوع.

⁸ زرين غاكودان ف‑ميسيّا، دّون س‑لمرسا ن‑تروّاس.

⁹ غ‑يض‑ان ا‑يوارگا بولُس يان‑ورگاز گو‑ماكيدونيّا ءيبيدّ ءيضالب‑ت باهرا ييني‑اس: «اشك‑يد س‑ماكيدونيّا تعاونت‑اغ.»

¹⁰ لّيغ ءيژرا بولُس تاوارگيت‑ان، نسكر ف‑ا‑ندّو غاكودان س‑تمازيرت ن‑ماكيدونيّا، اشكو نسّن ءيس‑اغ‑ن‑يغرا ربّي غمكان اد‑اسن‑ناوي لخبار ءيفولكين.

غمكلّي تومن ليديّا

¹¹ نامژ اناو نبّي زغ‑تروّاس س‑يگزير ن‑ساموتراكي. نديد ازكّا نلكم لمرسا ن‑نيابوليس.

¹² نامژ غين اغاراس س‑فيليبّي. تگا نتّات تامدينت ءيمقّورن غ‑تسگا‑يان ن‑ماكيدونيّا، بنان‑تّ رّومان. نگاور غين كرا ن‑ووسّان.

¹³ غ‑واسّ ن‑وسونفو نفّوغ س‑برّا ن‑تمدينت ندّو س‑تاما ن‑واسيف، اشكو ننّا د‑يخف‑نّغ را‑ييلي غين كرا ن‑ماني غ‑ا‑تمونون ايت‑يودايا ار‑گيس‑تژالّان. نسكيوس ار‑نساوال د‑تمغارين لّي‑ن‑مونّين غين.

¹⁴ تيلي گيسنت يات‑تمغارت ءيسم‑نس ليديّا، تگا ءولّت‑تاياتيرا ار‑تزّنزا تّوب اژگُّاغ. تگا زغ‑تيلّي تعبادنين ربّي. ءيخدم سيديتنّغ غ‑وول‑نس غ‑تاساعت‑ان ايلّيغ تومن س‑كولّو مايلّي ءينّا بولُس.

¹⁵ نسّدّم‑تّ ءيلمّا غ‑وامان نتّات د‑ايت‑تگمّي‑نس. تضالب زغ‑گينّغ: «ءيغ‑يّي‑تگام د‑تاد يومنّ س‑سيديتنّغ، اشكاد‑د تگّوزم غ‑تگمّي‑نو.» تامژ گينّغ.

غمكلّي يومن‑ونگابال لّحبس

¹⁶ يان‑واسّ نفّوغ نيري ادغار ن‑تژالّيت، س‑نمناگّار يات‑تفروخت تگا تيسمگت. ءيلّا گيس يا‑لّجنّ لّي‑دار تاحكيمت اد‑اس‑يمالا ما‑را‑يجرو. ءيد‑باب‑نس ار‑فلّاس‑تامژن ءيقاريدن گّوتنين زغ‑مدّن لّي‑رانين اد‑يسّانّ ما‑راد‑اسن‑ييلي.

¹⁷ ءيمّا نتّات، تضفار بولُس د‑وسمون‑نس ار‑تّغوّات ار‑فلّانّغ‑تّيني: «مدّن‑اد گان ءيخدّامن ن‑ربّي اماتّوي. ار‑اون‑تبرّاحن ف‑مامنك ا‑را‑تيژضارم ا‑تنجمّ.»

¹⁸ ار‑بدّا‑تسكار غمكان كيگان د‑ووسّان. ار يان‑واسّ طيّر‑اس ءي‑بولُس باهرا، ءيگراول گيس يامر لجنّ: «س‑يسم ن‑ياسوع لماسيح، فّوغ زغ‑گيس.» ءيفّوغ لجنّ غاكودان.

¹⁹ لّيغ ژران ءيد‑باب ن‑تسمگت ءيس‑ور‑سول‑را‑فلّاس‑تامژن يات، غوين بولُس د‑سيلا زوكرن‑تن س‑سّوق س‑دار غويلّي تحكامنين.

²⁰ دحين‑تن‑ين س‑لگدّام ن‑يمغارن لّمحكاما ن‑رّومان ءينين: «غويد گان ايت‑يودايا، سّمروين تامدينت‑نّغ باهرا.

²¹ ار‑تبرّاحن ف‑كرا ن‑تنباضين، ءور‑فلّانّغ‑يحلّا ا‑تنت‑نقبل ءولا‑دا‑سرسنت‑نسكار نكُّني ن‑ايت‑روما.»

²² بزگن فلّاسن غويلّي‑اسن‑سوتلنين. نكرن ءيمغارن لّمحكاما ءوصّان ءيمخزنيين اد‑فلّاسن‑بّين تيملسا سّغورشن‑تن.

²³ لّيغ‑تن‑وتن باهرا، گرن‑تن‑ين غ‑لحبس، ءوصّان انگابال لّحبس ا‑يسّدوس ءي‑يمي.

²⁴ لّيغ ءيسفلد‑ونگابال ءي‑لوصيت‑اد، ءيگ‑تن‑ين غ‑تحانوت ن‑والّاغ، ءيقّن ءيضارن‑نسن غ‑گر‑تفرسا ژّاينين.

²⁵ غ‑طوژّونت ن‑يض‑ان ار‑يتژالّا بولُس د‑سيلا ار‑تّيريرن ار‑تالغن ربّي. ار‑اسن‑سفليدن ءيحبّاسن ياضني.

²⁶ س‑يمّوسّا‑واكال س‑جّهد، ندودين ءيغوربان زغ‑لّساس، رژمن ءيماون لّحبس كولّوتن، فسينت سّناسل ف‑كرايگاتّ يان.

²⁷ ءيتّفاق‑د‑ونگابال، ءيژر ءيماون لّحبس رژمن، ءيغال ءيس‑روولن ءيحبّاسن. ءيلدي‑د تاژّيت ا‑ينغ ءيخف‑نس.

²⁸ ءيغر‑اس بولُس س‑جّهد ييني‑اس: «اد‑ور‑تهلكت ءيخف‑نّك. هاتي نلّا كولّواغ.»

²⁹ ءيغر‑ونگابال ءي‑ماد‑اس‑د‑يتاوين تيفاوت، يازّل س‑دارسن ءيضر‑ن ف‑يفادّن‑نس غ‑لگدّام ن‑بولُس د‑سيلا، ار‑سرس‑تكّات تاودا.

³⁰ ياوي‑تن ءيلمّا س‑برّا لّحبس ييني‑اسن: «وا‑يد‑سيدي، ما‑يّي‑د‑يقّانّ ا‑ت‑سكرغ باش اد‑نجمغ؟»

³¹ ءينين‑اس: «امن س‑سيديتنّغ ياسوع تنجمت كيّي د‑ايت‑تگمّي‑نّك.»

³² ساولن سرس س‑واوال ن‑سيديتنّغ نتّان د‑ايت‑تگمّي‑نس كولّوتن.

³³ ياوي‑تن غ‑تاساعت‑ان غ‑ييض، ءيسيرد‑اسن تيگّاس‑نسن. سّدّمن‑ت ءيلمّا غ‑وامان، نتّا د‑ايت‑تگمّي‑نس كولّوتن.

³⁴ ءيشّكشم‑تن س‑تگمّي ءيسرس‑اسن‑ين ماد‑شتّان، ءيفرح باهرا نتّا د‑كولّو ايت‑تگمّي‑نس اشكو وورّين ءومنّ س‑ربّي.

³⁵ زيكّ صباح نكرن ءيمغارن لّمحكاما ن‑رّومان، ازنّ كرا ن‑يمخزنيين س‑لحبس ءينين: «رژمات ءي‑يرگازن‑ان.»

³⁶ ياشك‑يد‑ونگابال س‑دار بولُس ييني‑اس: «ها‑يمغارن ءوزنّ‑د اوال اد‑اون‑رژمن. فّوغات غيلاد، تدّوم س‑سّلامت.»

³⁷ ءيمّا بولُس ءيساول س‑يمخزنيين ييني‑اسن: «ها‑نتني سّغورشن‑اغ غ‑لگدّام ن‑كولّو مدّن واخّا ءور‑گينّغ‑وفين كرا ءيفّوغن لقانون. دحين‑اغ‑د س‑لحبس، د‑نكُّني نگا زغ‑ويلّي طّافنين تاغامت غ‑ايت‑روما. ءيس‑ران اد‑اغ‑سّوفغن غيلاد س‑تنتلا؟ نكُّني ءور‑را‑نفّوغ. ءيخصّا ءيمغارن‑ان اد‑د‑اشكين سّوفغن‑اغ‑ن.»

³⁸ دّون ءيمخزنيين ءينين ءي‑يمغارن ف‑ماد‑نّان. ءيكساضن نتني لّيغ سفلدن ف‑بولُس د‑سيلا ءيس‑دارسن لحقّ ن‑ايت‑روما.

³⁹ اشكين‑د ضالبن زغ‑گيسن اد‑اسن‑صامحن، اوين‑تن ءيلمّا س‑برّا ضالبن‑تن اد‑فّوغن تامدينت.

⁴⁰ غمكان ا‑س‑فّوغن زغ‑لحبس، دّون ءيلمّا س‑تگمّي ن‑ليديّا. مناگّارن گيس د‑ايتماتن ار‑تن‑زّعامن، امژن ءيلمّا اغاراس.