irqqasn 15 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تامونت ن‑يرقّاسن د‑يمغارن غ‑وروشاليم

¹ اشكين‑د كرا ن‑مدّن زغ‑تمازيرت ن‑يودايا س‑انطاكيّا، بدون ار‑سّلمادن ايتماتن ار‑تّينين: «ءيغ‑ور‑تژّولّيم ءي‑دّات‑نّون غمكلّي ءيتّيني شّرع ن‑موسا، ءور‑را‑تيژضارم ا‑تنجمّ.»

² ءيژي ديدسن بولُس د‑بارنابا ف‑واوال‑اد ار‑ديدسن‑تمجاحادن، ايلّيغ سكرن ايتماتن ن‑ومناگّار ف‑اد‑ازنّ بولُس د‑بارنابا د‑كرا غ‑وييّاض س‑وروشاليم، باش اد‑سقسان ءيرقّاسن د‑يمغارن ف‑تغاوسا‑ياد.

³ سافضن‑تن غاكودان، زرين غ‑تميزار ن‑فينيقيّا د‑ساميرا، اوين لخبار ءي‑ايت‑تميزار‑ان ف‑مامنك اد‑ومژن ءيبرّانيين اغاراس لّماسيح. فرحن ايتماتن كولّوتن لّيغ سفلدن ءي‑لخبار‑اد.

⁴ لّيغ روحن ءوروشاليم سّمرحبان سرسن ايت‑ومناگّار د‑يرقّاسن د‑يمغارن. ييني‑اسن بولُس د‑بارنابا ف‑كولّو ما‑سرسن‑يسكر ربّي.

⁵ والاينّي نكرن كرا ن‑يمومنّ لّمدهب ن‑يفاريسين ءينين‑اسن: «ءيقّان‑كُن‑د ا‑توصّام ءيبرّانيين اد‑ژّالّن ءي‑دّات‑نسن ار‑سكارن س‑شّرع ن‑موسا.»

⁶ مناگّارن ءيلمّا ءيرقّاسن د‑يمغارن باش اد‑مشاوارن ف‑تغاوسا‑ياد.

⁷ ييگات‑واوال ايلّيغ ءينكر بطرُس ييني‑اسن: «واي‑ايتما، تسّنم غ‑ووسّان زوارنين ءيستي‑يّي ربّي زغ‑گيگون باش اد‑سفلدن ءيبرّانيين ف‑يمي‑نو ءي‑لخبار ءيفولكين امنّ سرس.

⁸ ربّي ءيسّنّ ما‑يلّان غ‑وول ن‑كولّو مدّن، ءيمل‑اغ غاكودان ءيس‑يرضا ف‑يبرّانيين، اشكو ءولا نتني ءيفكا‑ياسن رّوح لقودوس غمكلّي‑اغ‑ت‑يفكا نكُّني.

⁹ ءور‑تن‑يبضي ديدنّغ، اشكو ءيسّغوس ءولاون‑نسن ءولا نتني لّيغ ءومنّ س‑ياسوع.

¹⁰ ءيمّا غيلاد، ماخ ايلّيغ ترام ا‑تژيم د‑ربّي، تگم تاژايت ف‑يمحضارن‑ان لّي‑مي‑ور‑نژضار ا‑ستّ‑ناسي نكُّني ءولا ءيمزوورا‑نّغ؟

¹¹ ءوهو، نومن ءيزد لحنانت ن‑سيديتنّغ ياسوع ا‑س‑ننجم، د‑غمكاد ا‑س‑راد‑نجمن ءولا نتني.»

¹² فسّان ايتماتن‑ان كولّوتن، سفلدن ءيلمّا ءي‑ماد‑اسن‑يتّيني بارنابا د‑بولُس ف‑لمعجيزات د‑تميتار تجهّدنين لّي‑يسكر ربّي ف‑وفوس‑نسن غ‑گر ايت‑تميزار ياضني.

¹³ لّيغ كمّلن اوال‑نسن، ءينكر ياعقوب ييني‑اسن: «واي‑ايتما سفلدات‑يّي.

¹⁴ ءينّا‑ياغ سيمعان ف‑مامنك اد‑اغ‑يملا ربّي غ‑يسيزوار ءيس‑يرا ا‑يژلي زغ‑گر ءيبرّانيين كرا ن‑مدّن اد‑گن وينس.

¹⁵ غمكاد اد‑نّان ءولا لانبيا غ‑وارّاتن ن‑ربّي ءينّا:

¹⁶ ‹تيگيرا ن‑مايان راد‑د‑وورّيغ، بنوغ تيگمّي ءيخُلان ن‑داود، بنوغ ءيغوربان‑نس لّي‑ضرنين. را‑ستّ‑يد‑سّنكرغ

¹⁷ باش اد‑وورّين كولّو ايت‑تميزار ياضني ار‑سيگّيلن س‑سيدي ربّي، ءولا كولّو ءيبرّانيين لّي‑مي‑غريغ اد‑گن وينو.

¹⁸ غمكاد ا‑س‑ينّا سيدي ربّي لّي‑يسكارن كولّو ماياد، ءيتياوسّان دارس زغ‑يسيزوار.› »

¹⁹ ءيزايد ياعقوب ييني‑اسن: «ف‑ماياد ا‑ف‑راد‑ينيغ نكّي: را‑ياف ا‑ور‑نتشقو د‑ايت‑تميزار ياضني لّي‑ومژنين اغاراس ن‑ربّي،

²⁰ والاينّي اد‑اسن‑نازن يات‑تبرات نيني‑اسن اد‑تانفن ءي‑يركان لّاصنام ءولا لفساد، ءولا‑دا‑شتّان تيفيّي ن‑ما‑يقاجّين ءولا ءيدامّن.

²¹ اشكو ميارن مدّن غ‑كرايگاتّ تامدينت ا‑فلّاسن‑اقران شّرع ن‑موسا غ‑تگُمّا ن‑تژالّيت، ار‑تن‑توصّان ا‑سرس‑سكارن، كرايگاتّ اسّ ن‑وسونفو زغ‑تاسوت ن‑تاسوتين سول س‑غيلاد.»

تابرات ءي‑يمومنّ ءيبرّانيين

²² مشاشكان‑د ءيلمّا ءيرقّاسن د‑يمغارن د‑ايت‑ومناگّار كولّوتن، سكرن ف‑اد‑ستين كرا ن‑مدّن‑نسن اد‑مونّ د‑بولُس د‑بارنابا س‑انطاكيّا. ستين ياهودا لّي‑مي‑تّينين بارسابا، نتّان د‑سيلا. نتني، ار‑تن‑توقّارن ايتماتن كولّوتن.

²³ ازنّ ديدسن يات‑تبرات، تياران گيس ءيواليون‑اد: «زغ‑ايتماتون ءيرقّاسن ءولا ءيمغارن، ءي‑ايتماتنّغ ن‑تميزار ياضني غ‑انطاكيّا د‑سوريّا د‑كيليكيّا. اد‑اون‑تيلي سّلامت.

²⁴ نسفلد ف‑كرا ن‑مدّن ءوشكان‑ين زغ‑دارنّغ ءينين‑اون كرا‑س‑اون‑ت‑سّطيّرن ايلّيغ توسيم تاغوفت ف‑يواليون‑نسن. والاينّي ءورد نكُّني ا‑تن‑ين‑يوزنّ.

²⁵ مايان ا‑ف‑د‑نمناگّار غيلاد، نمشاشكا‑د كولّواغ ا‑نستي كرا ن‑مدّن نازن‑تن‑ين س‑دارون، ا‑ن‑مونّ د‑ايتماتنّغ عزّانين بارنابا د‑بولُس

²⁶ لّي‑فكانين ءيخفاون‑نسن ف‑يسم ن‑سيديتنّغ ياسوع لماسيح.

²⁷ غمكاد ا‑ف‑ن‑نوزن ياهودا د‑سيلا اد‑اون‑ينين ف‑كولّو مايد‑اون‑ين‑نورا.

²⁸ اشكو ءيملا‑ياغ‑د رّوح لقودوس ءولا ءيخف‑نّغ، ا‑ور‑فلّاون‑نگ كرا ن‑تاژايت ابلا تيغاوسيوين‑اد هيّانين:

²⁹ ا‑ور‑تشتّام ما‑يتياوغراسن ءي‑لاصنام ءولا ءيدامّن ءولا تيفيّي ن‑ما‑يقاجّين، تاگّوگم زغ‑لفساد. افولكي ا‑راد‑اون‑ييلي، ءيغ‑ا‑تّانفم ءي‑تغاوسيوين‑اد. ا‑كُن‑يعاون ربّي.»

³⁰ سافضن‑تن ءيلمّا س‑انطاكيّا. لّيغ‑ن‑لكمن تامدينت‑ان، سّمونّ‑د ايت‑ومناگّار كولّوتن فكن‑اسن تابرات.

³¹ لّيغ‑تّ‑غران نتني، فرحن س‑يواليون ن‑يرقّاسن لّي‑س‑تن‑زّعامن.

³² ءيساول ءيلمّا ياهودا د‑سيلا س‑ايتماتن‑ان، ار‑تن‑زّعامن ار‑تن‑سّدوسن، اشكو گان ءولا نتني زغ‑ويلّي ءيتّينين ءيواليون نّا‑ياسن‑يمالا ربّي.

^33-34 تيگيرا ن‑ما‑دارسن‑گاورن كرا ن‑ووسّان، سافضن‑تن ايتماتن س‑سّلامت، وورّين س‑دار غويلّي‑تن‑وزنّين.

³⁵ ءيمّا بولُس د‑بارنابا قامان غ‑انطاكيّا، ار‑سّلمادن ار‑تبرّاحن س‑واوال ن‑سيديتنّغ نتني د‑وييّاض گّوتنين.

امودّو ويس سين ن‑بولُس ءي‑تبرّاحت

³⁶ يان‑واسّ ءيساول بولُس س‑بارنابا ييني‑اس: «ا‑نوورّي س‑دار ايتماتن غ‑تمدينين كولّوتنت لّي‑غ‑نبرّح س‑واوال ن‑سيديتنّغ، ا‑نژر مامنك اد‑گان.»

³⁷ ءيرا بارنابا اد‑ديدسن‑اوين يوحانّا لّي‑مي‑تّينين مارقُس.

³⁸ ءيمّا بولُس ءينّا‑ياس: «ءور‑يشوي ا‑ديدنّغ‑ناوي غوالّي‑اغ‑ن‑يفلن تاوالا‑لّي غ‑تمازيرت ن‑بامفيليّا، ءور‑ديدنّغ‑يكمّيل تاووري.»

³⁹ ءور‑ژضارن اد‑د‑مشاشكان ف‑تغاوسا‑ياد، بضون ءيفل يان يان. بارنابا ييوي ديدس مارقُس، ءيسّودو غ‑ومدا س‑يگزير ن‑قوبروس.

⁴⁰ ءيمّا بولُس ءيستي سيلا ا‑يگ اسمون‑نس. فكن‑تن ءيلمّا ايتماتن غ‑وفوس ن‑سيديتنّغ ا‑گيسن‑يبارك، فّوغن زغ‑غين.

⁴¹ ار‑تكّان تامازيرت ن‑سوريّا ءولا كيليكيّا ار‑سّدوسن ءيمناگّارن ن‑ايتماتن.