irqqasn 14 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تابرّاحت ن‑بولُس د‑بارنابا غ‑يقونيّا

¹ ءيكشم بولُس د‑بارنابا س‑تگمّي ن‑تژالّيت ن‑ايت‑يودايا غ‑يقونيّا غمكلّي سكارن غ‑تمدينين ياضني، ساولن ءي‑مدّن ايلّيغ يوورّي ءيگّوت ما‑يومنّ س‑ياسوع، گان زغ‑ايت‑يودايا ءولا ءيبرّانيين.

² ءيمّا ايت‑يودايا لّي‑ور‑رينين اد‑امنّ، نكرن ار‑سّهيّاسن ءيبرّانيين باش اد‑اسين تانوّاشت ف‑ايتماتن.

³ ءيقاما غين بولُس د‑بارنابا كيگان د‑ووسّان، ار‑ساوالن ف‑سيديتنّغ س‑زّعامت. ءيفك‑اسن سيديتنّغ تاحكيمت اد‑سكارن لمعجيزات د‑تميتار تجهّدنين غ‑لگدّام ن‑مدّن‑ان، باش اد‑يسّانّ ءيزد لحقّ ا‑يگا‑واوال لّباراكا لّي‑س‑ا‑تبرّاحن.

⁴ ايت‑تمدينت‑ان بضان ف‑سين. كرا ءيبيدّ د‑ايت‑يودايا، كرا ءيبيدّ د‑يرقّاسن.

⁵ مشاوارن ءيلمّا كرا ن‑مدّن زغ‑يبرّانيين د‑ايت‑يودايا د‑يمغارن‑نسن، سكرن ف‑اد‑سّرفوفنّ بولُس د‑بارنابا، ءيرين ا‑تن‑كّاتن س‑يژران نغن‑تن.

⁶ ءيمّا نتني سفلدن ف‑غايلّي فلّاسن نوّان، روولن س‑تمدينين ن‑ليسترا د‑داربا غ‑تمازيرت ن‑ليكونيّا ءولا س‑تسگيو ياضني ن‑تمازيرت‑ان،

⁷ ار‑غين‑تبرّاحن س‑لخبار ءيفولكين.

تابرّاحت غ‑ليسترا ءولا داربا

⁸ ءيلّا يان‑ورگاز غ‑ليسترا، كوشمن‑اس ءيضارن زغ‑لّيغ ءيلول، ءور‑جّو‑يفتي.

⁹ ءيسكيوس ار‑يسفليد ءي‑مايلّي ءيتّيني بولُس ءي‑مدّن. ءيسّماقّل گيس بولُس، ءيژر‑ت يومن ايلّيغ ءيژضار ا‑يجّي.

¹⁰ ييني‑اس س‑واوال ءيتجهّدن: «نكر‑د، تبيدّت ف‑يضارن‑نّك،» س‑يوكُي ءيبيدّ ف‑يضارن‑نس ءيفتو.

¹¹ لّيغ ژران مدّن ما‑يسكر بولُس، الّن اوال‑نسن ءينين س‑واوال ن‑ايت‑ليكونيّا: «هاتي گّوزن‑د ءيلاهات‑نّغ س‑دارنّغ، وورّين س‑سّيفت ن‑بنادم.»

¹² غالن ءيس‑يگا بارنابا ‹زافس›، ءيگ بولُس ‹هارماس› اشكو نتّان ا‑يساوالن س‑وگُّار.

¹³ تلّا‑تگمّي ن‑‹زافس› غ‑برّا ن‑تمدينت. ياشك‑يد‑ونمغور ن‑ويلّي تعبادنين ءيلاه‑ان، ياوي‑د ءيزگارن س‑يمي ن‑تمدينت، اگُلن‑اسن تاگُّاتين ن‑يجدّيگن. ييري نتّان ءولا كولّو وييّاض ا‑ن‑سرسن تيغرسيو غ‑لگدّام ن‑بارنابا د‑بولُس ار‑تن‑تعبادن.

¹⁴ لّيغ سفلدن ءيرقّاسن ءي‑مايان، بّين تيملسا‑نسن ازّلن س‑وامّاس‑نسن ءينين‑اسن س‑جّهد:

¹⁵ «مايد را‑تناولم؟ هاتي بنادم كا‑نگا زوند كونّي. نوشكا‑د ناوي‑اون‑د لخبار ءيفولكين باش ا‑تفلم تيغاوسيوين‑اد خوانين لّي‑تسكارم، توورّيم تيسّانم ربّي لّي‑يدّرن. نتّان ا‑يسكرن ءيگنوان د‑واكال د‑يمدوان ءولا كولّو ما‑گيسن‑يلّان.

¹⁶ كولّو مايد ءيزرين يودجا مدّن غ‑كرايگاتّ تامازيرت اد‑زايدن غ‑وغاراس نّا‑ران.

¹⁷ والاينّي ءور‑كُن‑يفيل بلا تاماتارت ن‑يس‑يلّا نتّان، اشكو ءيملا‑ياون‑د منشك ا‑باهرا‑يفولكي. ار‑اون‑د‑ياكّا انژار زغ‑يگنوان ءولا تامگرا غ‑وزمز‑نس. ار‑يشّباع اديس‑نّون س‑ومشّو ءيعمّر ءول‑نّون س‑لفرح.»

¹⁸ غمكاد ا‑ينّا بارنابا د‑بولُس، والاينّي بحرا ءور‑حصارن مدّن‑ان كولّوتن اد‑ور‑غرسن غ‑لگدّام‑نسن.

¹⁹ اشكين‑د ءيلمّا كرا ن‑ايت‑يودايا زغ‑انطاكيّا ن‑بيسيديّا د‑يقونيّا. سّهيّسن مدّن‑ان گّوتنين، ايلّيغ نكرن ار‑كّاتن بولُس س‑يژران. زوكرن‑ت س‑برّا ن‑تمدينت، غالن ءيس‑يمّوت.

²⁰ مونّ‑د ءيلمّا ءيمحضارن لولّين‑اس، س‑ينكر بولُس يوورّي س‑تمدينت. نديد ازكّا ءيفّوغ نتّان د‑بارنابا دّون س‑تمدينت ن‑داربا.

يوورّي بولُس د‑بارنابا س‑انطاكيّا

²¹ ار‑يتبرّاح بولُس د‑بارنابا س‑لخبار ءيفولكين غ‑داربا، ايلّيغ ءيگّوت ما‑يوورّين گان ءيمحضارن ءي‑لماسيح. وورّين ءيلمّا نتني س‑تمدينين ن‑ليسترا د‑يقونيّا د‑انطاكيّا ن‑بيسيديّا،

²² ار‑سّدوسن ءولاون ن‑يمحضارن ار‑تن‑زّعامن اد‑زگان غ‑وغاراس لّماسيح، ار‑اسن‑تّينين: «س‑ترفوفنت ءيگّوتن ا‑س‑د‑يقّان ا‑نكشم س‑تگلديت ن‑ربّي.»

²³ ءيستي بولُس د‑بارنابا غ‑كرايگاتّ امناگّار ماد‑اسن‑يتگّان ءيمغارن. ار‑تژالّان ار‑تاژومن ار‑تن‑فالن غ‑وفوس ن‑سيديتنّغ لّي‑س‑ومنّ.

²⁴ زرين زغ‑تمازيرت ن‑بيسيديّا س‑تمازيرت ن‑بامفيليّا.

²⁵ ار‑تبرّاحن س‑واوال ن‑ربّي غ‑تمدينت ن‑بارگا، زايدن ءيلمّا س‑لمرسا ن‑اتّاليّا.

²⁶ امژن اناو سّودون غ‑ومدا ايلّيغ روحن انطاكيّا. تامدينت‑ان ا‑زغ‑تن‑سافضن ايتماتن غ‑يسيزوار لّيغ‑تن‑فكان غ‑وفوس ن‑ربّي ا‑يبارك غ‑تووري‑نسن. غمكان ا‑س‑كمّلن تاووري‑ان.

²⁷ لّيغ كشمن س‑انطاكيّا، سّمونّ‑د ايت‑ومناگّار. ءينين‑اسن ف‑كولّو ما‑سرسن‑يسكر ربّي، ءولا مامنك ا‑يرژم ءيمي ءي‑ايت‑تميزار ياضني اد‑امژن اغاراس لّماسيح.

²⁸ قامان د‑يمحضارن ن‑غين كرا ن‑ييرن.