irqqasn 13 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

امودّو امزوارو ءي‑تبرّاحت

¹ لّان كرا ن‑مدّن غ‑ومناگّار ن‑ايتماتن غ‑انطاكيّا، ار‑تّينين ءيواليون نّا‑ياسن‑يمالا ربّي ار‑سّلمادن. ءيلّا بارنابا د‑سيمعان لّي‑مي‑تّينين ‹اسگّان›، ييلي لوكيوس گو‑كوريني د‑ماناين لّي‑يمقّورن د‑وگلّيد هيرودوس غ‑يات‑تگمّي، ييلي شاول.

² يان‑واسّ اژومن ار‑تعبادن سيديتنّغ، س‑اسن‑ينّا رّوح لقودوس: «فكات‑يّي‑د بارنابا د‑شاول اد‑قاسان كرا ن‑تووري، غريغ‑اسن سرس.»

³ زايدن ءيلمّا غ‑وژوم د‑تژالّيت، سرسن فلّاسن ءيفاسّن‑نسن سافضن‑تن.

اسحّار د‑لحاكم غ‑قوبروس

⁴ دّون نتني غمكلّي‑اسن‑يملا رّوح لقودوس س‑لمرسا ن‑سالوكيّا، سّودون غ‑ومدا س‑يگزير ن‑قوبروس.

⁵ كشمن س‑تمدينت ن‑سالاميس ار‑تبرّاحن س‑واوال ن‑ربّي غ‑تگُمّا ن‑تژالّيت ن‑ايت‑يودايا. ءيوين ديدسن يوحانّا لّي‑مي‑تّينين مارقُس، ار‑تن‑يتعاوان غ‑تووري.

⁶ ار‑تكّان ءيگزير كولّوت ايلّيغ لكمن تامدينت ن‑بافوس، افن‑ين گيس يان‑وسحّار گو‑يودايا ءيسم‑نس بارياشوع، ار‑يتّيني ءيس‑يگا نّابي والاينّي ار‑يسّكيركيس.

⁷ نتّان ار‑يتگاوار دار لحاكم ن‑يگزير ءيسم‑نس سارجيوس‑بولُس. ءيگا لحاكم‑ان باب لّعاقل. يازن س‑بارنابا د‑شاول ءيضالب‑تن اد‑د‑اشكين س‑دارس، اشكو ءيرا ا‑زگيسن‑يسفلد ءي‑واوال ن‑ربّي.

⁸ ءيمّا اسحّار‑ان، ءيسم‑نس اليماس س‑واوال ن‑ايت‑يونان، ءينكر سرسن ييري ا‑يحصار لحاكم ا‑ور‑يامژ اغاراس لّماسيح.

⁹ غاكودان شاول لّي‑مي‑نتّيني بولُس ءيعمّر س‑رّوح لقودوس، ءيمناد غ‑وسحّار

¹⁰ ييني‑اس: «وا‑يوس ن‑يبليس، تگيت امضاضّ ءي‑كولّو ما‑يرا ربّي. تعمّرت س‑تكركاس د‑تيلّاي أُخشنّين. ار‑بدّا‑تسّلولّيت ءيغاراسن أُغژانّين ن‑سيديتنّغ.

¹¹ هاتي ءيلّا‑فلّاك‑وفوس ن‑سيديتنّغ. را‑تبوكضت ءور‑را‑تيسفيوت ار ازمز ياضني.» غاكودان ا‑فلّاس‑يضر‑ومدلو د‑تيلّاس، ار‑يتلّي س‑ماد‑اس‑يتامژن افوس.

¹² ءيمّا لحاكم، لّيغ ءيژرا مايد ءيجران، ءيتعجّب باهرا. يامن س‑ماد‑اس‑سّلمدن ف‑سيديتنّغ.

تابرّاحت غ‑انطاكيّا ن‑بيسيديّا

¹³ ءيفّوغ بولُس د‑وسمون‑نس زغ‑بافوس، سّودون غ‑ومدا س‑تمدينت ن‑بارگا غ‑تمازيرت ن‑بامفيليّا. ءيبضو ديدسن يوحانّا لّي‑مي‑تّينين مارقُس، يوورّي س‑وروشاليم.

¹⁴ زايدن نتني زغ‑بارگا س‑تمدينت ن‑انطاكيّا ن‑بيسيديّا. كشمن س‑تگمّي ن‑تژالّيت غ‑واسّ ن‑وسونفو، سكيوسن گيس.

¹⁵ ءيمغارن ن‑تگمّي ن‑تژالّيت، تيگيرا ن‑ماد‑غران زغ‑شّرع ن‑موسا د‑وارّاتن لّانبيا، غرن‑اسن: «واي‑ايتماتنّغ، نكراد‑د تساولم ءيغ‑دارون كرا ن‑يواليون ما‑س‑ا‑تسّدوسم مدّن‑نّغ.»

¹⁶ ءينكر بولُس يالّ افوس‑نس ييني‑اسن: «واي‑ايت‑ربّي د‑يبرّانيين لّي‑تعبادنين ربّي، سفلدات‑يّي.

¹⁷ ربّي ن‑ايت‑دارنّغ ءيژلي ءيمزوورا‑نّغ، ءيسّيگات‑تن باهرا غ‑يسگُّاسن لّي‑غ‑لّان غ‑تمازيرت ن‑ميصر. ءيسّوفغ‑تن‑د ءيلمّا زغ‑غين س‑وفوس‑نس ءيتجهّدن.

¹⁸ ءيبيدّ ديدسن كّوژ ءيد‑مراو ن‑وسگُّاس غ‑لخلا.

¹⁹ ءيهلك سّا ن‑تگلداي غ‑تمازيرت ن‑كانعان، ءيفك‑اسن تامازيرت‑ان ا‑ستّ‑وورتن.

²⁰ غمكان ا‑س‑يزري ما‑يتگّان كّوژ ءيد‑ميّا د‑سمّوس ءيد‑مراو (450) ن‑وسگُّاس. ءيفك‑اسن ءيلمّا ءيمغارن تجهّدنين ا‑فلّاسن‑تحكامن ار ءوسّان ن‑نّابي صامويل.

²¹ ضالبن‑ت غاكودان ا‑زگيسن‑يژلي يان اد‑اسن‑يگ اگلّيد، ءيمل‑اسن ربّي شاول يوس ن‑قيش زغ‑تقبيلت ن‑بنيامين. ءيزايد نتّان ار‑فلّاسن‑يتحكام كّوژ ءيد‑مراو ن‑وسگُّاس.

²² ءيسّيتّي‑ت ءيلمّا ربّي، ءيگ داود د‑وگلّيد‑نسن. نتّان ا‑ف‑يفكا ربّي توگّا‑نس ءينّا: ‹ءوفيغ‑ن غ‑داود يوس ن‑ياسّا ما‑ن‑ياكمورن س‑وول‑ينو. را‑يسكار كولّو ماد‑ريغ.›

²³ ءيمّا غيلاد، زغ‑تاسوت ن‑داود ا‑زغ‑د‑يفكا ربّي يان ياضني ا‑يگ انجّام ءي‑ايت‑ربّي غمكلّي‑س‑ينّا غايد ءيزرين، ا‑ت‑يگان د‑ياسوع.

²⁴ لّيغ ءور‑تا‑يگري ياسوع غ‑تووري‑نس، ءيكّا‑تّين يوحانّا امسدّام ار‑يتبرّاح ار‑يتّيني ءي‑كولّو ايت‑ربّي اد‑فلن ماد‑سكارن يُخشن ار‑تن‑يسّدّام غ‑وامان.

²⁵ لّيغ‑د‑ياكمور‑وزمز ا‑يكمّل يوحانّا تاووري‑نس، ءيسقسا مدّن‑ان: ‹ما‑تّينيم گيغ‑ت نكّي؟ هاتي ءورد نكّين ا‑يگان غوالّي‑س‑ا‑تّقلم، والاينّي را‑د‑ياشك تيگيرا‑نو. ءور‑ستهلّاغ نكّي اد‑رژمغ ءيفالان ن‑تورژيّين‑نس.›

²⁶ «واي‑ايتما زغ‑تاسوت ن‑يبراهيم د‑يبرّانيين لّي‑تعبادنين ربّي، نكُّني كولّواغ ا‑مي‑د‑يوزن ربّي اوال ف‑مامنك ا‑راد‑اغ‑يجّنجم.

²⁷ ءيمّا ءيمزدغن ن‑وروشاليم د‑ينمغورن‑نسن ءور‑سّينّ ءيزد ياسوع ا‑يگان انجّام لّي‑س‑ا‑تقلن. ءور‑فهيمن ءيواليون لّانبيا لّي‑اقران كرايگاتّ اسّ ن‑وسونفو، والاينّي سّووفان ءيواليون‑ان لّيغ فلّاس حكامن.

²⁸ واخّا ءور‑گيس‑وفين ما‑ف‑ا‑ت‑نقّان، ضالبن زغ‑بيلاطوس ا‑ت‑ينغ.

²⁹ غاكود لّيغ سكرن نتني كولّو مايلّي فلّاس ءيتياران زغ‑يسيزوار، زّوگزن‑ت زغ‑وگّجدي، سرسن‑ت‑ين غ‑ومضّال.

³⁰ «ءيمّا ربّي هاتي ءيسّنكر‑ت‑يد زغ‑لموت،

³¹ ار‑د‑يتبان كيگان د‑ووسّان ءي‑ويلّي ديدس مونّين زغ‑جاليل س‑وروشاليم. گن نتني ءيناگان، ار‑اكّان توگّا ءي‑ايت‑ربّي ف‑ماد‑ژران.

³² ءولا نكُّني نوشكا‑د ناوي‑اون‑د لخبار‑اد ءيفولكين، اشكو مايلّي ءينّا ربّي ءي‑يمزوورا‑نّغ ف‑ما‑را‑يسكر،

³³ هاتي ءيسكر‑ت غيلاد غ‑دارنّغ نكُّني لّي‑يگان تاروا‑نسن. اشكو ءيسّنكر‑د ياسوع زغ‑لموت غمكلّي ءيتياران غ‑ويس سين ءيموريگن، ءينّا ربّي: ‹كيّي تگيت ءيوي. باباك اد‑گيغ غاسّاد.›

³⁴ ءيتيارا ءولا ف‑مامنك ا‑را‑ت‑يد‑يسّنكر زغ‑لموت ا‑ور‑سار‑تركم دّات‑نس، ييني: ‹هاتي را‑كُن‑باركغ س‑لباراكات صفانين زگانين لّي‑ف‑نّيغ ءي‑داود.›

³⁵ ييني‑داغ غ‑وارّا ياضني: ‹ءور‑را‑تادجت امژلاي‑نّك ا‑يركم غ‑ومضّال.›

³⁶ نسّن داود غ‑ووسّان‑نس ءيس‑يسكر ما‑يرا ربّي، ءيمّت ءيلمّا ءيتياومضال غ‑گر ءيمزوورا‑نس، تركم دّات‑نس.

³⁷ ءيمّا غواد‑د‑يسّنكر ربّي، ءور‑ت‑يودجي ا‑يركم.

^38-39 «واي‑ايتما، نرا ا‑تيسّانم لخبار‑اد ءيفولكين. اشكو ف‑سّيبت ن‑غواد‑د‑ينكرن ا‑س‑يوجاد ربّي ا‑فلّاون‑يسّيتّي دّنوب‑نّون. كولّو وانّا سرس يومنّ، را‑ت‑يسّغوس زغ‑كولّو غايلّي مي ءور‑يژضار شّرع ن‑موسا ا‑ت‑زگيس‑يسّغوس.

⁴⁰ ءيمّا غيلاد، رارات لعاقل‑نّون اد‑اون‑ور‑يجرو غمكلّي نّان لانبيا:

⁴¹ ‹ژرات ا‑يطنّاژن، ار‑تّعجّابم تّهلكم. اشكو راد‑سكرغ كرا ءيهيّان غ‑ووسّان‑نّون. ءيغ‑يلّا ماد‑اون‑فلّاس‑ينّان، ءور‑را‑تي‑تامنم.› »

⁴² ءيفّوغ ءيلمّا بولُس د‑بارنابا زغ‑تگمّي ن‑تژالّيت. ضالبن‑تن مدّن ا‑ن‑وورّين ءيمال اسّ‑ان ن‑وسونفو اد‑اسن‑ساولن س‑وگُّار ف‑تغاوسيوين‑اد.

⁴³ لّيغ كولّو فّوغن، ءيگّوت گيسن ما‑يمونّ د‑بولُس د‑بارنابا زغ‑ايت‑يودايا د‑يبرّانيين لّي‑ومژنين اغاراس ن‑ايت‑ربّي. ءيساول سرسن بولُس د‑بارنابا، زّعامن‑تن اد‑زگان غ‑لباراكا ن‑ربّي.

⁴⁴ ءيمال اسّ‑ان ن‑وسونفو مونّ‑د ايت‑تمدينت كولّوتن، ءيرين اد‑سفلدن ءي‑واوال ن‑ربّي.

⁴⁵ ءيمّا ايت‑يودايا لّي‑زدغنين غين، لّيغ ژران مدّن‑ان گّوتنين، اسين تانوّاشت ف‑يرقّاسن، ژين د‑بولُس ف‑واوال‑نس رگمن‑ت.

⁴⁶ ءيرار‑اسن ءيلمّا بولُس د‑بارنابا س‑زّعامت ءينين‑اسن: «نيوي‑اون‑د اوال ن‑ربّي غمكلّي‑اغ‑د‑يقّانّ باش ا‑تزوورم كونّي. ءيمّا غيلاد ءور‑تي‑تريم، تگم ءيخفاون‑نّون د‑ويلّي ءور‑يستهلّان اد‑كشمن س‑تودرت ءيدومن. را‑كُن‑نفل غيلاد ناوي‑تّ غ‑يبرّانيين،

⁴⁷ اشكو غمكاد ا‑س‑اغ‑يوصّا سيدي ربّي. ءينّا: ‹گيغ‑ك د‑تيفاوت ءي‑ايت‑تميزار اگّوگنين، ا‑تجّنجمت مدّن ار تّمي ن‑واكال.› »

⁴⁸ لّيغ سفلدن ءيبرّانيين ءي‑ماياد، فرحن باهرا الغن اوال ن‑سيدي ربّي. وورّين امنّ س‑ياسوع كولّو ويلّي ءيژلي ربّي اد‑كشمن س‑تودرت ءيدومن.

⁴⁹ سفلدن مدّن ءي‑لخبار ن‑سيديتنّغ غ‑كولّو تامازيرت‑ان.

⁵⁰ ءيمّا ايت‑يودايا سّهيّسن تيمغارين تيبرّانيّين ءيست‑تگُمّا مقّورنين لّي‑تعبادنين ربّي د‑وودماون مقّورنين ن‑تمدينت‑ان، ايلّيغ نكرن مدّن گّوتنين ار‑سّرفوفونّ بولُس د‑بارنابا سّمسرن‑تن زغ‑تمازيرت‑ان.

⁵¹ ءيسّوس فلّاسن بولُس د‑بارنابا اگدرور ن‑يضارن‑نسن اد‑اسن‑يگ تاماتارت، فتون س‑تمدينت ن‑يقونيّا.

⁵² ءيمّا ءيمحضارن لّي‑فلن غ‑انطاكيّا، عمّرن نتني س‑لفرح ءولا س‑رّوح لقودوس.