irqqasn 12 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تارفوفنت ف‑وفوس ن‑هيرودوس

¹ غ‑ووسّان‑ان ا‑يومژ‑وگلّيد هيرودوس كرا زغ‑ايتماتن ن‑ومناگّار، ييري ا‑تن‑يسّرفوفن.

² يامژ ياعقوب گماس ن‑يوحانّا ءينغ‑ت س‑تاژّيت.

³ لّيغ ءيژرا مامنك اد‑فرحن ايت‑يودايا س‑غايان، ءيزايد يامژ بطرُس ءولا نتّان غ‑ووسّان لّعيد ن‑ورخصيص.

⁴ ءيگ‑ت‑ين غ‑لحبس، ار‑تي‑تگابالن كّوژط رّبايع ن‑يعسكرين، ءيلين كّوژ غ‑كرايگاتّ رّبعت. ييري هيرودوس ا‑فلّاس‑يوت لحوكم غ‑لگدّام ن‑كولّو مدّن تيگيرا لّعيد ن‑وسورف.

⁵ ءيقاما بطرُس غ‑لحبس، ءيمّا ايت‑ومناگّار ار‑تژالّان ار‑باهرا‑فلّاس‑تضالابن ربّي.

غمكلّي ءيفّوغ بطرُس زغ‑لحبس

⁶ ءيض لّي‑يزوارن اسّ لّي‑غ‑را‑ت‑ين‑يسّحاضر هيرودوس غ‑لگدّام ن‑مدّن، ءيطّاس بطرُس غ‑گر سين ءيعسكرين، ءيقّن س‑سنات سّناسل. ءيلين ءينگابالن ياضني غوين تيضاف غ‑يمي لّحبس،

⁷ س‑يبيدّ يا‑لّمالاك ن‑سيدي ربّي غ‑تحانوت لّي‑غ‑يلّا بطرُس. تسّمرغا س‑تيفاوت ءيتجهّدن. ءيسّماسّ‑ت لمالاك زغ‑تغروطّ‑نس ءيسّفاق‑ت‑يد ييني‑اس: «نكر غيل غيل،» س‑ضرنت سّناسل زغ‑يفاسّن‑نس.

⁸ ييني‑اس لمالاك: «بكيس تقّنت تورژيّين‑نّك.» ءينكر بطرُس ءيسكر مايان. ييني‑اس لمالاك: «سّمون اسلهام‑نّك تضفورت‑يّي.»

⁹ ءيضفور‑ت بطرُس ءيفّوغ زغ‑تحانوت. ءور‑يسّين كولّو ماين ءيسكار لمالاك ءيزد صّاحت ا‑يگا. ءيغال ءيزد غير كرا ن‑توارگيت ايان.

¹⁰ زرين ف‑ينگابالن زوارنين، زرين ف‑ويس سين، لكمن تيفلوت ن‑ووزّال لّي‑يقامان اد‑فّوغن س‑تمدينت. ترژم‑تفلوت ءي‑يخف‑نس، فّوغن. زرين‑ين تاسوكت‑ان، س‑فلّاس‑ييتّي لمالاك ءيفل‑ت غين.

¹¹ غاكودان ا‑يفهم بطرُس ماد‑اس‑يجران ييني: «سّنغ غيلاد ءيزد س‑صّاحت يوزن‑د سيدي ربّي لمالاك‑نس ا‑يّي‑د‑يفوكّو زغ‑وفوس ن‑هيرودوس ءولا زغ‑كولّو ماد‑ران مدّن‑ان ن‑ايت‑يودايا ا‑ت‑فلّا‑زّرين.»

¹² لّيغ ءيفاق بطرُس ءي‑ماد‑اس‑يجران، ءيفتو س‑تگمّي ن‑ماريام ءينّاس ن‑يوحانّا لّي‑مي‑تّينين مارقُس. لّان غين مدّن گّوتنين مونّ‑د كولّو ار‑تژالّان ار‑تضالابن ربّي.

¹³ ءيسّضوقّر بطرُس غ‑يمي ن‑برّا. تاشك‑يد يات‑تخدّامت ءيسم‑نس رودا، باش ا‑تژر ما‑يسّضوقّرن.

¹⁴ غير توكُز اوال ن‑بطرُس تفرح باهرا ايلّيغ تتّو ءيمي ءيس‑يقّن، توورّي س‑تيزّلا س‑وگُنس تيني‑اسن: «هاتي بطرُس ايد ءيبيدّن غ‑يمي.»

¹⁵ رارن‑اس‑د: «ءيس‑تفّوغت ءيخف‑نّم؟» تيني‑اسن‑داغ: «بطرُس ا‑يگا.» رارن‑اس: «ءوهو، حاقّان لمالاك‑نس كايان.»

¹⁶ سول ءيقاما بطرُس غ‑يمي ار‑يسّضوقّور. رژمن‑اس افن‑ت‑ين بطرُس ا‑يگا، ءيضر‑اسن لعجب.

¹⁷ يالّ افوس‑نس ا‑تن‑يسّفسّا، ييني‑اسن ءيلمّا ف‑مامنك ا‑ت‑يد‑يسّوفغ سيديتنّغ زغ‑لحبس. يوصّا‑تن: «ءينيات كولّو ماياد ءي‑ياعقوب د‑ايتماتن.» ءيفل‑تن غاكودان، ءيدّو س‑ماني ياضني.

¹⁸ لّيغ ءيفاو لحال، دوهدون ءينگابالن لّحبس باهرا، ار‑سّمقسان ءي‑نگراتسن: «ما‑يگا غاياد؟ ماني ءيكّا بطرُس؟»

¹⁹ يازن هيرودوس ما‑سرس‑يسيگّيلن، والاينّي ءور‑ت‑وفين. ءيسقسا ءينگابالن باهرا، ءيسّوفغ‑تن ءيلمّا ا‑تن‑نغن. ءيفّوغ هيرودوس تامازيرت ن‑يودايا ءيدّو س‑قايصريّا ءيگاور غين.

لموت ن‑هيرودوس

²⁰ غ‑ووسّان‑ان ءيژي هيرودوس د‑يمزدغن ن‑صور د‑صايدا. اشكين‑د ايت‑تمدينين‑ان س‑يان‑واوال، ءيرين اد‑ديدس‑ساولن، اشكو ءيقّان‑تن‑د اد‑اوين ماد‑شتّان زغ‑تمازيرت ن‑وگلّيد. مشاشكان‑د زوار د‑لوازير ءيسم‑نس بلاستوس، باش اد‑ضالبن زغ‑هيرودوس سّلامت.

²¹ لّيغ ءيلكم‑واسّ لّي‑غ‑را‑تن‑يژر، ءيلسا هيرودوس اسلهام ن‑تگلديت‑نس، ءيسكيوس غ‑لكورسي لّحوكم ءيساول ءي‑مدّن‑ان.

²² الّن نتني اوال‑نسن ءينين: «اوال ن‑يان‑يلاه اياد، ءورد اوال ن‑بنادم.»

²³ غاكودان ا‑ت‑يد‑يوت يا‑لّمالاك ن‑سيدي ربّي س‑تووكّا ار‑ت‑تشتّا غ‑وگُنس‑نس ايلّيغ ءيمّوت، اشكو يومژ لمجد لّي‑يگان وين ربّي.

²⁴ ار‑باهرا‑يتزاياد‑واوال ن‑ربّي غ‑ووسّان‑ان، ءيگّوت ما‑سرس‑يسفليدن.

²⁵ ءيمّا بارنابا د‑شاول، لّيغ سّلكمن لامانت‑نسن س‑وروشاليم، وورّين س‑انطاكيّا. اوين ديدسن يوحانّا لّي‑مي‑تّينين مارقُس.