irqqasn 11 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيساول بطرُس ف‑يبرّانيين

¹ سفلدن ءيرقّاسن د‑ايتماتن غ‑كولّو تامازيرت ن‑يودايا ف‑يبرّانيين ءيس‑ومژن ءولا نتني اوال ن‑ربّي.

² لّيغ يوورّي بطرُس س‑وروشاليم، نكرن سرس غويلّي تّيرينين اد‑ژّالّن مدّن ءي‑دّات‑نسن ءينين‑اس:

³ «ماخ ايلّيغ تگّوزت غ‑دار غويلّي ءور‑ژّولّينين، ار‑ديدسن‑تشتّات؟»

⁴ ءيساول بطرُس ءيمل‑اسن كولّو ما‑يجران زغ‑يسيزوار ييني‑اسن:

⁵ «لّيغ نكّي غ‑تمدينت ن‑يافّا ار‑تژالّاغ ار‑تضالابغ ربّي، س‑يّي‑د‑يسّبايّن كرا زوند تاوارگيت. ژرغ كرا ءيگّوز‑د فلّا، ءيرواس ءي‑ليزار ءيمقّورن ءيتياماژ زغ‑كّوژط‑تغمرين. ءيگّوز‑د زغ‑يگنوان ءيتّرس‑د غ‑لگدّام‑ينو.

⁶ سّماقّلغ گيس لمخلوقات، گان لوحوش د‑يبنكالن د‑يگضاض ن‑تاگانت،

⁷ س‑سفلدغ ءي‑يان‑واوال ءينّا‑يّي: ‹نكر ا‑بطرُس، تغرست تشّت.›

⁸ رارغ‑اس: ‹حاشا ا‑سيدي. ءور‑جّو‑مضيغ كرا‑ف‑ينّا شّرع ن‑موسا ءيحرم نغد ءيركا.›

⁹ ءيساول‑د‑داغ‑واوال‑ان زغ‑يگنوان ييني‑يّي: ‹ا‑ور‑تگت ما‑يسّحلّا ربّي د‑ما‑يحرمن.›

¹⁰ ءيجرو ماياد كراطّ‑توال، ءيتيالال ءيلمّا ليزار س‑يگنوان.

¹¹ تاساعت‑ان ا‑غ‑ن‑روحن كراض ءيرگازن تيگمّي لّي‑غ‑گّوزغ، تيازانّ‑ين سري زغ‑قايصريّا.

¹² ييني‑يّي رّوح لقودوس اد‑ديدسن‑مونغ بلا شكّاغ. مونّ ءيلمّا ديدنّغ سضيص ايتماتن‑اد. نكشم س‑تگمّي ن‑كورنيليوس.

¹³ ييني‑اغ نتّان ف‑مامنك ا‑يژرا يا‑لّمالاك ءيبيدّ غ‑تگمّي‑نس ييني‑اس: ‹ازن س‑يافّا، تسقسات غ‑يان‑ورگاز لّي‑مي ءيسم‑نس سيمعان، ار‑اس‑تّينين بطرُس.

¹⁴ راد‑اك‑د‑ياوي اوال ما‑س‑ا‑تّنجامت كيّي ءولا كولّو ايت‑تگمّي‑نّك.›

¹⁵ «بدوغ ار‑اسن‑ساوالغ، س‑د‑فلّاسن‑يگّوز رّوح لقودوس غمكلّي‑د‑فلّانّغ‑يگّوز نكُّني غ‑يسيزوار.

¹⁶ كتيغ‑د اوال ن‑سيديتنّغ لّي‑س‑اغ‑ينّا: ‹ءيكّا‑تّين يوحانّا ار‑يسّدّام مدّن غ‑وامان، ءيمّا كونّي را‑تدّمّ س‑رّوح لقودوس.›

¹⁷ ءيبايّن ءيس‑اسن‑د‑يفكا ربّي مايلّي‑اغ‑د‑يفكا نكُّني لّيغ نومن س‑سيديتنّغ ياسوع لماسيح. ماد‑گيغ نكّي ايلّيغ راد‑ضاضّغ ربّي؟»

¹⁸ لّيغ سفلدن مدّن‑ان ءي‑ما‑ينّا بطرُس ءور‑سول‑دارسن ما‑تّينين. الغن ربّي ءينين: «هاتي ءيفكا ربّي ءي‑يبرّانيين ءولا نتني اد‑د‑وورّين زغ‑كولّو ما‑يُخشنّ، كشمن‑د س‑تودرت‑اد ءيدومن.»

امناگّار ن‑يمومنّ غ‑انطاكيّا

¹⁹ ار‑تمودّون غويلّي اكوتنين ف‑سّيبت ن‑ترفوفنت تيگيرا لّموت ن‑ستيفانوس، ار‑تّيدون غ‑ووسّان‑ان ار تامازيرت ن‑فينيقيّا د‑يگزير ن‑قوبروس د‑تمدينت ن‑انطاكيّا، ار‑سّلكامن اوال ن‑ربّي غير ءي‑ويلّي گانين ايت‑يودايا.

²⁰ والاينّي كرا گيسن، گان ن‑ايت‑قوبروس د‑ايت‑كوريني، لّيغ روحن انطاكيّا بدون ار‑ساوالن س‑يبرّانيين ءولا نتني، ار‑اسن‑تّينين ف‑لخبار ءيفولكين ن‑سيديتنّغ ياسوع.

²¹ ءيعاون‑تن سيديتنّغ ايلّيغ ءومنّ مدّن گّوتنين امژن اغاراس ن‑سيديتنّغ.

²² سفلدن ايتماتن ن‑ومناگّار غ‑وروشاليم ف‑ماياد، ازنّ ءيلمّا بارنابا س‑انطاكيّا.

²³ لّيغ‑ن‑يلكم، ءيژر مامنك ا‑تن‑يبارك ربّي، ءيفرح ءيزّعام‑تن كولّوتن اد‑امژن غ‑سيديتنّغ س‑وول ءيزگان.

²⁴ ءيگا بارنابا ارگاز ءيفولكين، ءيعمّر س‑رّوح لقودوس ءولا ليمان. ءيگاتن غويلّي ءومژنين اغاراس ن‑سيديتنّغ غ‑ووسّان‑ان.

²⁵ ءيدّو بارنابا غاكودان س‑تمدينت ن‑طارسوس ا‑يسيگّل س‑شاول.

²⁶ لّيغ‑ت‑يوفا، ياوي‑ت ديدس س‑انطاكيّا. قامان غين اسگُّاس ار‑تمونون د‑ومناگّار ن‑ايتماتن ار‑سّلمادن مدّن گّوتنين. غ‑تمدينت ن‑انطاكيّا ا‑غ‑بدان مدّن ار‑تّينين ءي‑يمحضارن ‹ءيماسيحين›.

²⁷ غ‑ووسّان‑ان ا‑غ‑د‑وشكان كرا ن‑مدّن زغ‑وروشاليم س‑انطاكيّا، ار‑تّينين ءيواليون نّا‑ياسن‑يمالا ربّي.

²⁸ ءينكر يان گيسن ءيسم‑نس اگابوس، ءيگوّد‑ت رّوح لقودوس ييني‑اسن: «يان كرا را‑ييلي‑وغني ءيشقان غ‑دّونيت كولّوتّ.» (ءيجرا‑نّيت غمكان غ‑ووسّان ن‑وگلّيد كلوديوس.)

²⁹ مشاشكان‑د ءيمحضارن ف‑اد‑ازنّ كرا لّمعاونت ءي‑ايتماتن غ‑تمازيرت ن‑يودايا، ءيفك كود يان گيسن غونشك لّي‑مي‑يژضار.

³⁰ سكرن غمكان، ازن‑تّ ءي‑يمغارن غ‑وروشاليم ف‑وفوس ن‑بارنابا د‑شاول.