irqqasn 10 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تاوارگيت ن‑بطرُس

¹ ءيلّا يان‑ورگاز غ‑تمدينت ن‑قايصريّا ءيسم‑نس كورنيليوس، ءيگا لقبطان زغ‑رّبعت ن‑يعسكرين ن‑رّومان لّي‑مي‑تّينين ‹رّبعت ن‑يطاليا›.

² ار‑يتعباد ربّي ييري بدّا ا‑ت‑يرضو، نتّان ءولا كولّو ايت‑تگمّي‑نس. ار‑ياكّا ما‑يگّوتن ءي‑يمژلاض ن‑ايت‑يودايا، ار‑بدّا‑يتژالّا ار‑يتضالاب ربّي.

³ يان‑واسّ غ‑تاساعت تيس كراطّ ن‑تدگُّات ءيبان‑اس‑د يا‑لّمالاك ن‑ربّي، يوشكا‑د دارس ييني‑اس: «وا‑كورنيليوس.»

⁴ ءيسّماقّل گيس كورنيليوس ييكساض باهرا ييني: «ماد‑داري‑تريت ا‑سيدي؟» ءيزايد لمالاك ييني‑اس: «هاتي ءيقبل ربّي تيژولّا‑نّك ءولا مايلّي تاكّات ءي‑يمژلاض، ءيرضو فلّاك.

⁵ نكر غيلاد تازنت كرا ن‑يرگازن س‑تمدينت ن‑يافّا اد‑د‑اوين يان‑ورگاز لّي‑مي ءيسم‑نس سيمعان بطرُس.

⁶ هاتين ءيگّوز غ‑تگمّي ن‑يان‑ودبّاغ ءيسم‑نس سيمعان غ‑تاما ن‑ومدا.»

⁷ لّيغ‑ت‑يفل لمالاك ءيغر كورنيليوس ءي‑سين ءيمقاسان ن‑تگمّي‑نس ءولا يان‑وعسكري‑نس لّي‑يتعبادن ربّي.

⁸ ييني‑اسن ف‑كولّو ما‑يجران يازن‑تن ءيلمّا س‑يافّا.

⁹ نديد ازكّا سول لّان غ‑وغاراس اكمورن‑ين س‑يافّا، ءيغلي بطرُس س‑وكفاف ن‑تگمّي ا‑يژّالّ. تگا تاساعت تيس سنات د‑مراوت غ‑طوژّونت ن‑واسّ

¹⁰ س‑ت‑ياغ لاژ ييري ما‑يشتّا. سول خدمن غ‑تيرمت س‑ا‑س‑د‑يسّبايّن ربّي كرا زوند تاوارگيت.

¹¹ ءيژر ءيگنوان رژمن، ءيگّوز‑د فلّاس كرا ءيرواس ءي‑ليزار ءيمقّورن ءيتياماژ زغ‑كّوژط‑تغمرين، ءيتّرس‑د س‑واكال.

¹² ءيلين گيس كيگان د‑لوحوش د‑يبنكالن د‑يگضاض ن‑تاگانت.

¹³ ءيساول‑د يان‑واوال ييني: «نكر ا‑بطرُس، تغرست تشّت.»

¹⁴ ءيرار‑اس بطرُس: «حاشا ا‑سيدي. ءور‑جّو‑شّيغ ما‑ف‑ينّا شّرع ن‑موسا ءيحرم نغد ءيركا.»

¹⁵ ءيساول‑د‑داغ‑واوال‑ان ييني‑اس: «ا‑ور‑تگت ما‑يسّحلّا ربّي د‑ما‑يحرمن.»

¹⁶ ءيجرو غمكان كراطّ‑توال، ءيتيالال ءيلمّا ليزار س‑يگنوان.

¹⁷ سول ا‑يسوينگيم بطرُس غ‑ما‑تگا لمعنا ن‑توارگيت‑ان س‑د‑روحن ءيرگازن لّي‑د‑يوزن كورنيليوس. ار‑سقسان غ‑تگمّي ن‑سيمعان ايلّيغ‑ن‑بيدّن غ‑يمي‑نس.

¹⁸ غرن ءي‑ايت‑تگمّي سقسان‑تن: «ءيس‑دارون يان‑ورگاز ءيسم‑نس سيمعان بطرُس؟»

¹⁹ نتّان سول ا‑يسوينگيم غ‑لمعنا ن‑توارگيت س‑اس‑ينّا رّوح لقودوس: «ها‑كراض ءيرگازن ار‑سرك‑سيگّيلن.

²⁰ نكر غيلاد تگّوزت، تمونت ديدسن بلا تشكّات، اشكو نكّي ا‑تن‑د‑يوزنّ.»

²¹ ءيگّوز بطرُس غاكودان ييني‑اسن: «هاتي نكّي ا‑س‑ا‑تسيگّيلم. ماد‑داري‑ترام؟»

²² ءينين‑اس: «يوزن‑اغ‑د لقبطان كورنيليوس. ءيگا ارگاز ءيفولكين، ار‑يتعباد ربّي ار‑تي‑توقّارن كولّو ايت‑يودايا. ءيبان‑اس‑د يا‑لّمالاك ن‑ربّي، ييني‑اس اد‑اك‑د‑يغر س‑تگمّي‑نس باش ا‑يسفلد ءي‑ما‑راد‑اس‑تينيت.»

²³ ءيشّكشم‑تن بطرُس غاكودان س‑تگمّي، ءيگ‑تن د‑ينبگيون‑نس. نديد ازكّا ءيمون ديدسن، نتّان ءولا كرا ن‑ايتماتن ياضني زغ‑تمدينت ن‑يافّا.

²⁴ نديد ازكّا ءيروح تامدينت ن‑قايصريّا. ار‑سرس‑يتقل كورنيليوس، نتّان د‑ايت‑دارس د‑يمدّوكُّال‑نس، اشكو ءيسّمون‑تن‑د كولّوتن غ‑تگمّي‑نس.

²⁵ ءيلكم بطرُس تيگمّي س‑ت‑يد‑يمناگّار كورنيليوس ءيكنو س‑واكال غ‑دار ءيضارن‑نس.

²⁶ ءيسّنكر‑ت‑يد بطرُس ييني‑اس: «نكر، نكّي بنادم كاد‑گيغ.»

²⁷ ءيزايد ار‑ديدس‑يساوال، ءيكشم ءيلمّا س‑تگمّي ياف‑ن مدّن گّوتنين ا‑غين‑يمونّ.

²⁸ ييني‑اسن بطرُس: «تسّنم شّرع ن‑موسا ءيس‑ور‑يودجي يان ءيگان زغ‑ايت‑يودايا ا‑يكشم س‑دار ءيبرّانيين ءولا ءيمون ديدسن. والاينّي ءيملا‑يّي ربّي ا‑ور‑گغ يان د‑ما‑يحرمن ءولا ما‑يركان.

²⁹ ف‑مايان ا‑ف‑د‑وشكيغ لّيغ‑ن‑سري‑توزنم، ءور‑سول‑مشاوارغ د‑يخف‑ينو. ءيمّا غيلاد ريغ اد‑يّي‑تملم ما‑ف‑يّي‑دي‑تغرام.»

³⁰ ءيساول كورنيليوس ييني‑اس: «كراض‑ووسّان اياد، زوند تاساعت‑اد ءيگان تيس كراطّ ن‑تدگُّات، ار‑تژالّاغ ار‑تضالابغ ربّي غ‑تگمّي‑نو، س‑ژريغ يان‑ورگاز ءيبيدّ غ‑لگدّام‑ينو س‑تملسا سّمرغانين.

³¹ ييني‑يّي: ‹وا‑كورنيليوس، ءيسفلد ربّي ءي‑تژولّا‑نّك، ءور‑يتّو مايلّي تاكّات ءي‑يمژلاض.

³² ازن غيلاد س‑يافّا تسقسات غ‑يان‑ورگاز لّي‑مي ءيسم‑نس سيمعان، ار‑اس‑تّينين بطرُس. ءيگّوز غ‑تگمّي ن‑يان‑ودبّاغ ءيسم‑نس سيمعان غ‑تاما ن‑ومدا.›

³³ ازنغ‑ن سرك غاكودان. هاتي تسكرت گيگي ما‑يفولكين لّيغ‑د‑توشكيت. ءيمّا غيلاد ها‑نكُّني كولّواغ غ‑لگدّام ن‑ربّي، نرا ا‑نسفلد ءي‑كولّو ما‑ف‑ك‑يوصّا سيديتنّغ اد‑اغ‑تي‑تملت.»

اوال ن‑بطرُس غ‑تگمّي ن‑كورنيليوس

³⁴ ءيساول بطرُس ييني: «سّنغ غيلاد ءيزد س‑صّاحت ءور‑ا‑يسكار ربّي س‑وودماون.

³⁵ اشكو ار‑يتقبال كولّو وانّا‑ت‑يتوقّارن ار‑يسكار ما‑ت‑يرضان، كرا تگا‑تمازيرت‑نس.

³⁶ غمكاد ا‑يگا‑واوال لّي‑د‑يوزن ربّي ءي‑مدّن‑نس ن‑ايت‑ياعقوب، ءيمل‑اسن‑د لخبار ءيفولكين ن‑سّلامت غ‑گراس ديدسن ف‑وودم ن‑ياسوع لماسيح لّي‑يگان سيديس ن‑كولّو ما‑يلّان.

³⁷ تسفلدم ف‑ما‑يجران غ‑كولّو تامازيرت ن‑يودايا، ءيبدو زغ‑جاليل تيگيرا ن‑ما‑يتبرّاح يوحانّا ار‑يسّدّام مدّن غ‑وامان.

³⁸ تيسّانم ف‑ياسوع گو‑ناصيرا ءيس‑ت‑يعمّر ربّي س‑رّوح لقودوس د‑تحكيمت ءيتجهّدن، ار‑يتكّا كرايگاتّ ماني ار‑يسكار افولكي ار‑يجّوجّي كولّو ويلّي تياوكرّافنين س‑يسكراف ن‑يبليس، اشكو ءيلّا ديدس ربّي.

³⁹ نكُّني نگا فلّاس ءيناگان، نژرا كولّو ما‑يسكار غ‑تمازيرت ن‑يودايا ءولا غ‑وروشاليم. نغن‑ت ءيلمّا ف‑وگّجدي،

⁴⁰ والاينّي غ‑ويس كراض‑ووسّان ءيسّنكر‑ت‑يد ربّي زغ‑لموت ءيسّبايّن‑ت‑يد.

⁴¹ ءور‑د‑يبان ءي‑كولّو مدّن والاينّي غير ءي‑ويلّي ءيستي ربّي اد‑گن ءيناگان، ا‑تن‑يگان د‑نكُّني لّي‑ديدس‑يشّان نسو ديدس تيگيرا ن‑ما‑د‑ينكر زغ‑لموت.

⁴² يوصّا‑ياغ ا‑نتبرّاح ار‑ناكّا توگّا‑نّغ ن‑يزد نتّان ا‑يژلي ربّي ا‑يوت لحوكم ف‑ويلّي دّرنين ءولا غويلّي مّوتنين.

⁴³ نتّان ا‑ف‑ساولن لانبيا كولّوتن ار‑اكّان توگّا‑نسن ار‑تّينين: س‑يسم‑نس ا‑س‑را‑يسّيتّي ربّي دّنوب ف‑كولّو وانّا سرس يومنّ.»

ءوگوز ن‑رّوح لقودوس ف‑يبرّانيين

⁴⁴ سول ا‑يساوال بطرُس س‑د‑يگّوز رّوح لقودوس ف‑كولّو ويلّي‑اس‑سفليدنين.

⁴⁵ ار‑تعجّابن ءيمومنّ ن‑ايت‑يودايا لّي‑د‑مونّين د‑بطرُس لّيغ ژران مامنك ا‑يفكا ربّي لباراكا ن‑رّوح لقودوس ءي‑يبرّانيين ءولا نتني.

⁴⁶ اشكو سفلدن‑اسن ار‑ساوالن س‑يواليون ءيغريبن ار‑تالغن ربّي. ييني ءيلمّا بطرُس:

⁴⁷ «ءيس‑يلّا ما‑راد‑اغ‑يكّيس ا‑نسّدّم مدّن‑اد غ‑وامان؟ اشكو ءولا نتني، ءيفكا‑ياسن ربّي رّوح لقودوس غمكلّي‑اغ‑ت‑يفكا نكُّني.»

⁴⁸ يوصّا‑تن اد‑دّمن غ‑وامان س‑يسم ن‑ياسوع لماسيح. ضالبن‑ت ءيلمّا ا‑ديدسن‑يگاور كرا ن‑ووسّان.