iɛbrin 9 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اخيّام ن‑ربّي غ‑دّونيت‑اد

¹ لعهد امزوارو، لّانت گيس لوصيّات ف‑مامنك ا‑س‑را‑تعبادن مدّن، ءولا مامنك ا‑س‑راد‑سكرن يان‑ودغار ءيتياوژلاين ءي‑ربّي غ‑دّونيت‑اد.

² سّغلين غمكان يان‑وخيّام، تيلي گيس يات‑تحانوت، ار‑اس‑تّينين ‹تاحانوت تامژلايت›، لّي‑غ‑تلّا لحسكا ءولا طّبلا لّي‑ف‑ا‑سراسن اغروم غ‑لگدّام ن‑ربّي.

³ غ‑وگَنس ن‑تحانوت‑ان، غ‑تغوردين ن‑تيس سنات لخوامي، ا‑غ‑ن‑تلّا يات‑تحانوت ياضني، ار‑اس‑تّينين ‹تاحانوت ءيتياوقداسن›.

⁴ تلّا گيس طّبلا ن‑وورغ لّي‑ف‑ا‑تبخّارن، ءولا صّندوق لّعهد لّي‑يدلن س‑وورغ زغ‑كرايگاتّ تاسگا. غ‑صّندوق‑ان ا‑غ‑تلّا يات تاطّاست ن‑وورغ توسي اغروم ن‑‹مانّا›، ءولا اعمود ن‑هارون لّي‑يمغين، ءولا تيلواح ن‑وژرو لّي‑ف‑تيارانت لوصيّات لّعهد.

⁵ لّان سين ‹كاروبيم› ف‑وفلّا ن‑صّندوق، ار‑سّبايّانّ لمجد ن‑ربّي. دلن نتني س‑يفراون‑نسن ءيلّي‑زغ‑ا‑تيتّين دّنوب ن‑مدّن. ءيمّا تيغاوسيوين‑ان، ءور‑راد‑باهرا‑نساول غيلاد ف‑مامنك اد‑گانت.

⁶ والاينّي لّيغ كولّو نگادّانت‑تغاوسيوين‑ان، ار‑كشّمن ءينمغورن س‑تحانوت تامزواروت اد‑سكارن تاووري‑نسن.

⁷ ءيمّا تاحانوت تيس سنات، ءور‑ا‑سرس‑يكشّم يان. غير انمغور ءيهيّان ا‑سرس‑يكشّمن يات‑توال غ‑كرايگاتّ اسگُّاس، ار‑ديدس‑يتاوي ءيدامّن، ار‑تن‑ين‑يسّاكمور ءي‑ربّي ف‑سّيبت ن‑دّنوب‑نس ءولا دّنوب لّي‑سكرن مدّن‑نس بلا سّنّ ءيس‑تن‑سكرن.

⁸ غمكاد ا‑س‑اغ‑يملا رّوح لقودوس ءيس‑ور‑تا‑يوجاد‑وغاراس لّي‑يتاوين س‑تحانوت ءيتياوقداسن، ماحدّ سول تقاما‑تحانوت تامزواروت ن‑وخيّام.

⁹ لمعنا‑ياد تملا‑ياغ مامنك اد‑گان ايت‑يودايا سول س‑غاسّاد. ار‑ن‑سّاكمورن تيوافكيو د‑تغرسيو لّي‑ور‑ژضارنين اد‑سّغوسنت ءولاون ن‑ويلّي‑سرسنتي‑تعبادنين.

¹⁰ اشكو ءور‑گينت غير تين‑ومشّو د‑تيسّي د‑يسيريدن. تيغاوسيوين‑ان، غير تين دّات اد‑گانت. ءور‑راد‑قامانت غير ار اكود نّا‑يبدّل ربّي كولّو مايان س‑كرا ءيگان لجديد.

ءيدامّن لّماسيح

¹¹ ءيمّا لماسيح يوشكا‑د ا‑يگ انمغور ءيهيّان لّباراكات لّي‑اغ‑يلّان غيلاد. اخيّام لّي‑غ‑يسكر تاووري‑نس يوف غوالّي‑ستّين‑يكّان، ياگُر‑ت باهرا. ءورد غ‑دّونيت‑اد ا‑غ‑يلّا، ءولا ءيتياوسكار س‑يفاسّن ن‑بنادم.

¹² غير يات‑توال ا‑سرس‑يكشم نتّا، ءورد س‑يدامّن ن‑واغاضن ءولا وين ءيموگاين والاينّي س‑يدامّن ن‑دّات‑نس. غمكاد ا‑س‑اغ‑يفرا زغ‑دّنوب‑نّغ س‑وجنجم ءيدومن.

¹³ نسّن وانّا ءيسكرن كرا ءيحرمن، ار‑تي‑تروشّن ءينمغورن ن‑ايت‑يودايا س‑يدامّن ن‑واغاضن نغد وين ءيموگاين نغد س‑يغد ن‑تگيزت ءيتياوجدارن، باش ا‑تغوس دّات‑نسن زغ‑لحرام.

¹⁴ والاينّي ءوگُّار ن‑غمكان ا‑راد‑اغ‑يسّغوس لماسيح س‑يدامّن‑نس. اشكو ءيسرس‑ن ءيخف‑نس لّي‑كولّو‑يصفان غ‑لگدّام ن‑ربّي س‑تحكيمت ن‑رّوح لّي‑يدومن. ءيسّغوس ءولاون‑نّغ زغ‑يسكّيرن مّوتنين باش ا‑نوورّي نگ ءيخدّامن ن‑ربّي لّي‑يدّرن.

¹⁵ غمكان ا‑يسكر لماسيح يا‑لّعهد لّجديد غ‑گر ربّي د‑بنادم، ءيشّكشم سرس غويلّي مي‑د‑يغرا ربّي س‑لوورت ءيدومن لّي‑ف‑اسن‑ينّا راد‑اسن‑ييلي. ءيمّوت لماسيح باش ا‑يفرو مدّن زغ‑دّنوب لّي‑سكرن لّيغ سول لّان غ‑لعهد امزوارو.

لوورت ءولا اروشّ س‑يدامّن

¹⁶ نسّن لوصيت نّا‑يلّان ف‑لوورت ءيس‑ور‑ژضارن اد‑سرس‑سكرن مدّن ارد ءيسّانّ ءيس‑يمّوت غوالّي يوصّان ف‑لوورت.

¹⁷ اشكو لوصيت ءور‑تگي يات ماحدّ سول ءيدّر باب لّوصيت. ءور‑را‑سرس‑سكرن مدّن ارد ءيمّت.

¹⁸ مايان ا‑ف‑د‑يقّان ءولا لعهد ن‑ربّي امزوارو ا‑يزگا س‑يدامّن لّموت.

¹⁹ لّيغ ءيكمّل موسا ءيواليون‑نس لّي‑س‑يوصّا كولّو مدّن‑نس ف‑لوصيّات ن‑شّرع، ياوي ءيدامّن ن‑يموگاين ءولا وين‑واغاضن ءيزايد‑اسن امان، ياسي تيصطّوين ن‑وزوكُّني ياسّ‑تنت س‑تاضوت ءيژگُّاغن، ءيروشّ سرسن ارّا ن‑شّرع ءولا مدّن كولّوتن

²⁰ ييني‑اسن: «ءيدامّن‑اد ا‑يزّگان لعهد لّي‑ف‑كُن‑يوصّا ربّي ا‑سرس‑تسكارم.»

²¹ ءيزايد ار‑يتروشّ اخيّام س‑يدامّن ءولا كولّو ءيروكوتن لّي‑س‑ا‑گيس‑تعبادن مدّن.

²² غمكان ا‑يگا شّرع، ءيقّان‑د كرايگاتّ كرا‑يلّان ا‑يتغوس س‑وروشّ ن‑يدامّن. ءيدروس ما‑ور‑يتغوسن غمكان. ءيغ‑ور‑فّين ءيدامّن، ءور‑را‑تيتّين دّنوب.

لماسيح ءيسّيتّي دّنوب ف‑بنادم

²³ غمكان ا‑س‑د‑يقّان ا‑تغوسنت‑تغاوسيوين‑ان، واخّا ءور‑گينت غير امالو ءيرواسن ما‑يلّان غ‑يگنّا. والاينّي ءيقّان‑د تيغاوسيوين ن‑يگنّا اد‑غوسنت س‑كرا ن‑تغرسي يوفن ختين.

²⁴ اشكو لماسيح ءور‑يكشيم س‑تحانوت تامژلايت لّي‑يتياوسكارن س‑يفاسّن ن‑بنادم، تگ غير امالو ن‑تالّي ءيلّان غ‑يگنّا. والاينّي س‑يگنّا ا‑س‑يكشم نتّا، ييلي گيس غيلاد، ءيبيدّ ف‑سّيبت‑نّغ غ‑لگدّام ن‑ربّي.

²⁵ نسّن ءيس‑ا‑يكشّم‑ونمغور ءيهيّان ن‑ايت‑يودايا كرايگاتّ اسگُّاس س‑تحانوت ءيتياوقداسن، ار‑ديدس‑يتاوي ءيدامّن لّي‑ور‑گينين وينس. ءيمّا لماسيح، ءورد كيگان د‑تواليو ا‑يكشم س‑يگنّا ا‑ن‑يسرس ءيخف‑نس.

²⁶ اشكو ءور‑ت‑يد‑يقّان ا‑يمّت كيگان د‑تواليو زغ‑لّيغ تّياوخلاق دّونيت. والاينّي يات‑توال ا‑د‑يوشكا غ‑يسيگُّرا ن‑دّونيت، باش ا‑يمّت ءيسّيتّي دّنوب ف‑بنادم.

²⁷ ءيقّان‑د كولّو مدّن اد‑مّتن يات‑توال، لكمن ءيلمّا لحوكم.

²⁸ غمكان ا‑س‑يفكا لماسيح ءولا نتّا ءيخف‑نس يات‑توال باش ا‑ياسي دّنوب ن‑مدّن گّوتنين. را‑د‑يوورّي تيس سنات‑توال، ءورد باش ا‑ياسي دّنوب والاينّي باش ا‑يجّنجم كولّو وينّا سرس تقلنين رجون‑ين گيس.