iɛbrin 8 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تاووري ن‑ونمغور‑نّغ غ‑يگنّا

¹ كولّو ماياد ءيملا‑ياغ ءيس‑دارنّغ انمغور ءيهيّان لّي‑نحتاجّا، ءيسكيوس ف‑وفاسي لّعرش ن‑ربّي لّمجد غ‑يگنّا.

² ار‑يسكار تاووري ن‑تحانوت تامژلايت غ‑وخيّام ءيصحان لّي‑يبنا سيدي ربّي، ءورد غ‑غوالّي ءيتّبنان س‑يفاسّن ن‑بنادم.

³ انمغور نّا‑يلّان، هاتي ءيتياوژلاي ف‑ا‑ن‑يسّاكمور تيوافكيو د‑تغرسيو ءي‑ربّي. مايان ا‑ف‑د‑يقّان ياسوع ءولا نتّا ا‑ن‑يسّاكمور كرا.

⁴ مراد ءيس‑را‑يقاما ياسوع غ‑دّونيت‑اد ءور‑را‑يسكار تاووري ن‑تگمّي ن‑ربّي غ‑دّونيت‑اد، اشكو لّان گيس غويلّي‑ن‑سّاكمورنين تيوافكيو س‑مكلّي‑ف‑يوصّا شّرع.

⁵ تاحانوت تامژلايت لّي‑غ‑ا‑سكارن تاووري‑نسن ءور‑تگي ابلا زوند يات‑تماتارت ءولا يان‑ومالو ن‑ما‑يلّان غ‑يگنّا. مايان ا‑ف‑يوصّا ربّي موسا لّيغ ءيسكر ف‑ا‑يبنو اخيّام، ييني‑اس: «رار لعاقل ا‑تسكرت كولّو زوند مايلّي‑اك‑مليغ ف‑يگّي ن‑ودرار.»

⁶ ءيمّا تاووري ن‑ياسوع توگُر تين ءينمغورن‑ان ياضني، غمكلّي يوگُر لعهد لّي‑د‑ييوي ياسوع لعهد‑نسن، اشكو لباراكات لّي‑د‑سرس‑يفكا ربّي ءوگُرنت تين لعهد‑ان اقديم.

لعهد اقديم ءولا لعهد لّجديد

⁷ لعهد اقديم، مراد ءيس‑يكمّل كولّو ما‑يقصاد ربّي، ءيكون ءور‑را‑يسكر يا‑لّعهد لّجديد.

⁸ والاينّي سيدي ربّي ءيژرا مدّن‑نس ءور‑سّووفين كولّو ما‑گيسن‑يرا. ييني ءيلمّا: «راد‑د‑اشكين‑ووسّان لّي‑غ‑راد‑سكرغ يا‑لّعهد لّجديد د‑مدّن‑ينو ن‑ايت‑ياعقوب د‑ايت‑يودايا.

⁹ ءور‑را‑يگ زوند لعهد لّي‑سكرغ د‑يمزوورا‑نسن لّيغ‑اسن‑ومژغ افوس سّوفغّ‑تن‑د زغ‑ميصر. اشكو نتني ءور‑سول‑قامان ف‑لعهد‑ان. ف‑مايان ا‑ف‑وورّيغ فلغ‑تن.

¹⁰ والاينّي غمكاد ا‑را‑يگ لعهد لّي‑راد‑سكرغ د‑مدّن‑ينو غ‑ووسّان‑ان. را‑ن‑گغ تينباضين‑ينو غ‑يخفاون‑نسن، اراغ‑تنت ف‑وولاون‑نسن. راد‑گغ ربّي‑نسن، گن نتني مدّن‑ينو.

¹¹ ءور‑را‑ييني يان ءي‑گو‑تمازيرت‑نس ءولا ءي‑گو‑تگمّي‑نس ‹ءيخصّا‑ك ا‑تيسّانت سيدي ربّي،› اشكو را‑يّي‑يسّانّ كولّوتن، زغ‑يمژّيين ار ءيمقّورن.

¹² را‑فلّاسن‑سّيتّيغ دّنوب‑نسن، ءور‑سار‑راد‑د‑سوانگمغ لخُشانات لّي‑سكرن.»

¹³ ءيمّا لعهد‑اد، لّيغ‑ت‑يگا ربّي د‑لجديد، ءيبان‑ومزوارو ءيس‑يگا اقديم. اينّا ءيگان اقديم، هاتي ءيمدا. غير ءيميكّ را‑ت‑لاح.