iɛbrin 7 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

مالكيصادق ءيمناگّار ءيبراهيم

¹ مالكيصادق ءيكّا‑تّين ءيگا اگلّيد ن‑تمدينت ن‑ساليم، ءيگ انمغور ءيبيدّن غ‑گر مدّن د‑ربّي اماتّوي. نتّان ا‑ن‑يمناگّارن ءيبراهيم ءيبارك‑ت لّيغ‑د‑يوورّي ءيبراهيم زغ‑يميغ لّي‑غ‑ينرا ءيگلدان ياضني.

² ءيفك‑اس ءيبراهيم تيس مراوت زغ‑كولّو ما‑د‑يكّيس ءي‑يگلدان‑لّي. مالكيصادق، تگا لمعنا ن‑يسم‑نس ‹اگلّيد لّي‑يرضان ربّي›. ءيگ نتّا اگلّيد ن‑ساليم، تگا لمعنا‑نس ‹اگلّيد ن‑سّلامت›.

³ ءور‑يتيارا يات ف‑باباس نغد ءينّاس نغد ءيمزوورا‑نس، ءولا ءيتيارا يات ف‑تلاليت‑نس نغد لموت‑نس، والاينّي ءيرواس ءي‑يوس ن‑ربّي اشكو ءيگا‑بدّا انمغور ءيبيدّن غ‑گر مدّن د‑ربّي.

ءينمغورن ن‑ايت‑لاوي

⁴ ژرات منشك ا‑س‑يمقّور مالكيصادق، اشكو نتّان ا‑مي‑يفكا باباتنّغ ءيبراهيم تيس مراوت زغ‑كولّو ما‑د‑يكّيس ءي‑يگلدان.

⁵ نسّن ءيزد ايت‑لاوي ا‑يتياوژلاين غ‑شّرع ن‑موسا ف‑اد‑سكارن تاووري ن‑تگمّي ن‑ربّي، ار‑اسن‑اكّان مدّن تيس مراوت زغ‑كولّو ما‑دارسن‑يلّان، واخّا گان نتني ايتماتسن زغ‑تاسوت ن‑يبراهيم.

⁶ ءيمّا مالكيصادق، واخّا ءور‑يگي زغ‑ايت‑لاوي، يومژ زغ‑يبراهيم تيس مراوت، ءيفك ءيلمّا لباراكا‑نس ءي‑يبراهيم لّي‑يستي ربّي ا‑يوورت كولّو ما‑ف‑اس‑ينّا.

⁷ ءيبان ءيس‑يوگُر مالكيصادق ءيبراهيم، اشكو غوالّي ءيمقّورن ا‑ياكّان لباراكا ءي‑والّي ءيكّان دّاواس.

⁸ ءيمّا ايت‑لاوي لّي‑تامژنين تيس مراوت غيلاد، نتني بنادم كاد‑گان ار‑تمتاتن. والاينّي غوالّي مي ءيفكا ءيبراهيم تيس مراوت، ءيتيارا فلّاس ءيس‑يدّر.

⁹ ايت‑لاوي لّي‑تامژنين تيس مراوت، نژضار ا‑فلّاسن‑نيني ءيزد نتني ا‑يفكان تيس مراوت ءي‑مالكيصادق ف‑وفوس ن‑باباتسن ءيبراهيم.

¹⁰ اشكو سول‑ن‑يلّا لاوي غ‑وگُنس ن‑دّات ن‑يبراهيم، ءور‑تا‑جّو‑د‑يلول، ا‑يمناگّار د‑مالكيصادق.

¹¹ ربّي ءيسكر ءينمغورن زغ‑ايت‑لاوي باش اد‑زّگان شّرع. گان نتني زغ‑تاسوت ن‑ونمغور هارون. والاينّي مراد ءيس‑ژضارن اد‑شّكشمن مدّن س‑كولّو‑ما‑يقصاد ربّي، ءور‑راد‑حتاجّان مدّن اد‑اسن‑د‑ياشك يان‑ونمغور ياضني ءيگان زوند مالكيصادق.

¹² والاينّي لّيغ ءيبدّل ربّي ءينمغورن‑ان س‑ونمغور‑اد ياضني، ءيقّان‑د ا‑يتياوبدّال شّرع ءولا نتّا.

¹³ ءور‑يگي‑ونمغور‑اد زغ‑تقبيلت ن‑لاوي، والاينّي ءيگا زغ‑يات‑تقبيلت ياضني لّي‑زغ‑ور‑جّو‑يخديم كرا ن‑يان غ‑تووري ن‑وژرو ن‑تغرسي.

¹⁴ ءيمّا سيديتنّغ، نسّن ءيس‑يگا زغ‑تقبيلت ن‑ياهودا. ءور‑جّو‑يسكير موسا كرا ن‑ينمغورن زغ‑تقبيلت‑ان.

¹⁵ ءيملا‑ياغ مايان ءيس‑يگا سيديتنّغ يان‑ونمغور زوند مالكيصادق، ءورد زوند ايت‑لاوي.

¹⁶ يوورّي ءيگا انمغور س‑تحكيمت ن‑تودرت ءيدومن، ءورد س‑لوورت ن‑تاسوتين ن‑بنادم.

¹⁷ غمكلّي ءيتياران: «را‑تگت انمغور ءيدومن زوند مالكيصادق.»

¹⁸ ءور‑سول‑ا‑يتگّا ربّي ايت‑لاوي د‑ينمغورن‑نس، اشكو ءور‑ژضارن اد‑بيدّن غ‑گراس د‑مدّن غمكلّي ءيرا.

¹⁹ هان شّرع ن‑موسا ءور‑يكمّيل يات، والاينّي ربّي ءيفكا‑ياغ غيلاد يان‑رّجا ءيصحان لّي‑يوفن مايان، ار‑ن‑سرس‑نتاكمور ءي‑ربّي.

انمغور لّي‑نحتاجّا

²⁰ لّيغ ءيساول ربّي ف‑رّجا‑ياد، ءيزّگا اوال‑نس س‑يسم‑نس. ءينمغورن ياضني، ءور‑يزّگا ربّي اژلاي‑نسن س‑يسم‑نس،

²¹ والاينّي س‑يسم‑نس ا‑س‑يزّگا اژلاي ن‑ياسوع. غمكلّي ءيتياران: «س‑يسم‑نس ا‑س‑د‑يساول سيدي ربّي، ءور‑را‑يوورّي غ‑واوال‑نس، ييني‑اس ‹را‑تگت انمغور ءيدومن.› »

²² غمكان ا‑س‑يوورّي ياسوع ءيگا ضّامن ن‑يا‑لّعهد لّي‑باهرا‑يوفن لعهد‑ان ياضني.

²³ وورّين گّوتن ءينمغورن ن‑شّرع باهرا، اشكو ار‑تمتاتن ار‑د‑فالن تاووري‑نسن ءي‑ماد‑اسن‑يگُّران.

²⁴ ءيمّا ياسوع ءيگا واد ءور‑سار‑يتمّين، ءيگ انمغور ءيدومن.

²⁵ ماياد ا‑ف‑يژضار ا‑يجّنجم كولّو وينّا‑ن‑يسّروح ءي‑ربّي غيلاد ءولا كولّو مايد‑د‑يفتان، اشكو ءيدّر‑بدّا ا‑يتضالاب ربّي فلّاسن.

²⁶ وان انمغور‑اد ا‑نحتاجّا، ءيعمّر س‑وفولكي ن‑ربّي، ءيغوس‑وول‑نس، ءور‑گيس‑يلّي كرا لّعيب، ءيتياوژلاي زغ‑كولّو ما‑يسكارن دّنوب، ءيتيالال س‑يگّي ن‑يگنوان.

²⁷ ءور‑يگي زوند ءينمغورن ن‑شّرع، اشكو ءور‑ت‑يخصّا ا‑ن‑يسّاكمور تيغرسيو ءي‑ربّي اسّ ف‑واسّ ف‑دّنوب‑نس نتّا ءولا ف‑دّنوب ن‑مدّن ياضني. اشكو ياسوع، يات‑تغرسي ا‑ن‑يسّاكمور يات‑توال ف‑دّنوب‑نّغ كولّواغ لّيغ ءيفكا ءيخف‑نس ءيمّت.

²⁸ ضعفن ءينمغورن ن‑شّرع اشكو بنادم كاد‑گان. ءيمّا يوس ن‑ربّي، ءيتياوژلاي س‑يسم‑نس تيگيرا ن‑شّرع، ءيكمّل سرس ربّي كولّو ما‑سرس‑يقصاد.