iɛbrin 6 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ ءيمّا غيلاد، ا‑نزري زغ‑تغاوسيوين‑ان تيمزوورا ن‑ولمّود ف‑لماسيح، نزايد س‑ما‑يگان وين ءيمقّورن. ا‑ور‑داغ‑نتّيري ا‑نزّوگز لّساس لّي‑ياد‑نزّوگز غايد ءيزرين ف‑مامنك ا‑س‑را‑د‑نوورّي زغ‑يسكّيرن خوانين ن‑بنادم نامن س‑ما‑يسكر ربّي.

² ا‑ور‑داغ‑نساوال غير ف‑يسيريدن نغد اسروس ن‑يفاسّن نغد تانكرا ن‑ويلّي مّوتنين نغد لحوكم لّيخرت.

³ را‑نزري زغ‑تغاوسيوين‑ان، نزايد س‑كرا ياضني ءيغ‑يرا ربّي.

لمعنا ن‑يكالّن ءولا صّابت

⁴ ءيمّا غويلّي ژرانين تيفاوت، مضين لباراكا ن‑يگنّا، كشمن س‑تامونت ن‑رّوح لقودوس،

⁵ فرحن س‑واوال ن‑ربّي ءولا لقوّات ن‑وزمز لّي‑را‑د‑ياشك،

⁶ ءيغ‑رورن نتني تيغوردين‑نسن س‑ربّي تيگيرا ن‑كولّو مايان، ءور‑سار‑راد‑يژضارن ا‑د‑داغ‑وورّين س‑وغاراس. اشكو ملان ءي‑كولّو مدّن ءيس‑حگرن يوس ن‑ربّي، اگُلن‑ت ف‑وگّجدي تيس سنات‑توال.

⁷ اشكو اكال نّا‑يسّان انژار لّي‑د‑فلّاس‑يطّارن، ار‑ياكّا صّابت ءيشوان ءي‑ويلّي‑ت‑كرزنين، را‑گيس‑تيلي لباراكا ن‑ربّي.

⁸ ءيمّا اكال نّا‑ور‑يسّمغاين ابلا ازگُّار د‑تسكرا، ءور‑ينفعا س‑يات. تاكمور‑د سرس نّعلت، د‑وجدّار ا‑س‑راد‑اس‑تگُّرو.

⁹ واي‑ايتما عزّانين، واخّا سرون نساول غمكاد، نسّن ءيس‑گيگون‑يلّا ما‑يوفن غايان، اشكو تگام ويد ءيجّنجم ربّي.

¹⁰ نتّان، س‑لحقّ ا‑س‑ا‑يتحكام. ءور‑را‑يتّو تاووري لّي‑تسكرم ءولا ءيتّو مامنك ا‑توسيم ءيسم‑نس س‑لفرح تعاوانم ءيمژلاين‑نس، ار‑تن‑سول‑تّعاوانم.

¹¹ ءيمّا غيلاد نرا كود يان گيگون ا‑يتزاياد غمكان س‑زّعامت ار ءيسيگُّرا، باش ا‑تكشمّ كولّوكن س‑لباراكا لّي‑ن‑نترجو.

¹² ا‑ور‑تّرمايم تفلم ما‑كُن‑د‑يقّانّ، والاينّي سكارات زوند كولّو ويلّي ءومنّين صبرن ايلّيغ كشمن س‑تميخار لّي‑ف‑اسن‑ينّا ربّي.

ءيزّگا ربّي اوال‑نس س‑يسم‑نس

¹³ لّيغ ءيساول ربّي س‑يبراهيم ف‑ما‑راد‑اس‑يفك، ييني‑اس‑ت س‑يسم‑نس، اشكو ءور‑يلّي كرا ن‑يسم يوگُرن ءيسم ن‑ربّي.

¹⁴ ييني‑اس: «را‑ك‑باركغ فكغ‑اك تاروا گّوتنين.»

¹⁵ ءيقل ءيبراهيم ءيصبر ايلّيغ‑اس‑يتياوفكا مايلّي‑س‑اس‑ينّا ربّي.

¹⁶ هاتي س‑يسم ن‑ما‑تن‑يوگُرن ا‑س‑اقران مدّن، باش اد‑زّگان ءيواليون‑نسن، ا‑ور‑سول‑گيسن‑تشكّون وييّاض.

¹⁷ غمكان ا‑يسكر ربّي، ييري ا‑يسّمل ءي‑ويلّي را‑يوورت تيميخار‑نس ءيس‑ور‑را‑يوورّي غ‑واوال لّي‑س‑اسن‑ينّا. مايان ا‑ف‑يزوويد ءيسم‑نس ءي‑واوال‑نس.

¹⁸ اشكو سين‑اد، ءور‑يلّي ما‑يژضارن ا‑تن‑يگلّب ءولا ءيژضار ربّي ا‑فلّاسن‑يسّكاركس. غمكان ا‑يسكر ف‑سّيبت‑نّغ نكُّني لّي‑گيس‑يزاوگن، باش ا‑باهرا‑نزعم نامژ س‑وگُّار غ‑رّجا لّي‑اغ‑يفكا.

¹⁹ رّجا ءيصحان ءيزگان اياد، سّرصان گيس‑وولاون‑نّغ ارد‑اغ‑يشّكشم زغ‑لخاميا س‑تحانوت ءيتياوقداسن،

²⁰ س‑يلّيس ءيكشم ياسوع لّي‑اغ‑يزوارن ا‑بدّا‑يگ انمغور ءيهيّان ف‑سّيبت‑نّغ غ‑لگدّام ن‑ربّي غمكلّي ءيگا مالكيصادق.