iɛbrin 5 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اژلاي لّماسيح ءولا تامّارا‑نس

¹ كولّو وانّا ءيگان انمغور ءيهيّان، ءيتياوستاي زغ‑گر مدّن ياضني، ءيتياوژلاي ا‑يبيدّ غ‑گراتسن د‑ربّي ار‑ن‑يسّاكمور تيغرسيو د‑توافكيو ءي‑ربّي ما‑س‑ا‑ن‑فلّاسن‑يسّيتّي دّنوب‑نسن.

² ءيژضار‑ونمغور ا‑يترخو د‑ويلّي ءور‑سّينّين اغاراس د‑ويلّي زگيس جلانين، اشكو ءيگا بنادم ءولا نتّان ءيضعف.

³ مايان ا‑ف‑ت‑يد‑يقّان ا‑ن‑يسّاكمور ءي‑ربّي تيغرسيو ف‑دّنوب‑نس نتّا، غمكلّي‑تنت‑ين‑يسّاكمور ف‑دّنوب ن‑وييّاض.

⁴ ءور‑يلّي ما‑يژلين ءيخف‑نس ءي‑تووري‑ان ءيهيّان، والاينّي ربّي ا‑يژلاين وانّا ءيرا، غمكلّي ءيژلي انمغور هارون.

⁵ ءولا لماسيح ءور‑يسّمقّور ءيخف‑نس ا‑يناول تاووري ن‑ونمغور ءيهيّان، والاينّي ربّي ا‑ت‑سرس‑يژلين ييني‑اس: «كيّي تگيت ءيوي. باباك اد‑گيغ غاسّاد.»

⁶ ييني‑اس‑داغ غ‑وگزّوم ياضني: «را‑تگت انمغور ءيدومن زوند مالكيصادق.»

⁷ غ‑ووسّان لّي‑غ‑يطّاف ياسوع دّات ن‑بنادم، ار‑يتژالّا ار‑يتضالاب س‑تغويّا د‑يمطّاون ءي‑والّي ءيژضارن ا‑ت‑يسّانف ءي‑لموت. ءيسفلد‑اس ربّي اشكو ءيفكا ءيخف‑نس ا‑يسكر ما‑ت‑يرضان.

⁸ ءيمّا نتّا، واخّا ءيگا يوس ن‑ربّي، س‑تمّارا ا‑س‑ا‑يتلماد ا‑يسكار س‑واوال ن‑ربّي.

⁹ والاينّي لّيغ ءيكمّل كولّو ما‑فلّاس‑يلّان، ءيجّنجم غويلّي سكارنين س‑واوال‑نس س‑وجنجم ءيدومن،

¹⁰ ءيگ‑ت ربّي د‑ونمغور ءيهيّان زوند مالكيصادق.

اكُّفاي د‑ومشّو

¹¹ ءيگّوت داري ماد‑اون‑تّينيغ ف‑ماياد، والاينّي را‑يشقو ا‑تي‑تفهمّ، اشكو وورّين ژّاين ءيمزگان‑نّون.

¹² هان ءيلّا ف‑كولّو وينّا زّرينين ءونشك‑اد لّوقت لّي‑تزّريم كونّي، اد‑يژضارن اد‑سّلمادن وييّاض. ءيمّا كونّي، هاتي سول تحتاجّام ماد‑اون‑يسّلمادن تينباضين تيمزوورا ن‑وغاراس ن‑ربّي. ها‑كونّي سول‑كُن‑يخصّا‑وكُّفاي، ءور‑تا‑تژضارم ءي‑ومشّو.

¹³ اشكو وانّا ءور‑يسّان غير اكُّفاي ءور‑تا‑يسّين مامنك ا‑س‑را‑يرضو ربّي، اشكو سول ءيمژّي.

¹⁴ ءيمّا امشّو ءيگا وين ءيمقّورن لّي‑ميارنين اد‑سوينگيمن ار‑اطّون ما‑يشوان زغ‑ما‑يُخشنّ.