iɛbrin 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اسونفو لّي‑را‑ييلي ءي‑مدّن ن‑ربّي

¹ ءيساول ربّي س‑واوال ءيزگان، ييني ءيس‑را‑يفك اسونفو ءي‑مدّن‑نس. ءيمّا غيلاد، ءيلّا فلّانّغ ا‑نرار لعاقل ا‑ور‑گينّغ‑ييلي ما‑ور‑را‑ييژضار ا‑سرس‑يكشم.

² اشكو لخبار ن‑وسونفو‑اد لّي‑مي‑نسفلد، سفلدن‑اس‑ياد ءيمزوورا‑نّغ والاينّي ءور‑ومينّ اوال لّي‑مي‑سفلدن. مايان ا‑ف‑ور‑زگيس‑ومژن كرا لّفايتّ.

³ ءيمّا نكُّني لّي‑ت‑يومنّ، نكشم غيلاد س‑وسونفو لّي‑ف‑اسن‑ينّا: «س‑لغاضاب ا‑س‑نّيغ اوال‑اد ءيزگان ‹نتني ءور‑سار‑راد‑كشمن س‑وسونفو‑نو.› » ءيقصاد ربّي اسونفو‑اد زغ‑لّيغ ءيخلق دّونيت.

⁴ ءيتيارا غ‑يان‑وگزّوم غ‑وارّا‑نس: «ويس سّا‑ووسّان ا‑يسونفا ربّي زغ‑كولّو ما‑يسكر.»

⁵ والاينّي ءيتيارا‑داغ: «نتني ءور‑سار‑راد‑كشمن س‑وسونفو‑نو.»

⁶ هاتي ءور‑كشيمن غويلّي ءيروح لخبار غ‑ووسّان‑ان اشكو ءور‑سرس‑سكيرن. والاينّي سول لّان وييّاض راد‑كشمن.

⁷ ماياد ا‑ف‑يسكر ربّي اسّ ياضني لّي‑مي‑ينّا ‹غاسّاد›، اشكو تيغوردين ن‑يسگُّاسن گّوتنين ءيساول‑داغ ف‑يمي ن‑داود ييني ءيواليون‑لّي: «غاسّاد ءيغ‑تسفلدم ءي‑واوال‑نس، اد‑ور‑تسّيقارم ءيخف‑نّون.»

⁸ مراد ءيس‑تن‑يشّكشم ياشوع س‑وسونفو، ءور‑را‑يساول ربّي تيگيرا ف‑يان‑واسّ ياضني.

⁹ ءيمّا غيلاد را‑سول‑يفك ربّي اسونفو ءيكمّلن ءي‑مدّن‑نس، غمكلّي ءيسونفا نتّا غ‑ويس سّا‑ووسّان.

¹⁰ اشكو وانّا ءيكشمن س‑وسونفو ن‑ربّي، نتّان ا‑يسونفان زغ‑كولّو ما‑يسكر غمكلّي ءيسونفا ربّي.

¹¹ ءيمّا غيلاد ءيلّا فلّانّغ ا‑باهرا‑نتّيري ا‑نكشم س‑وسونفو‑اد، ا‑ور‑يضر يان گينّغ غمكلّي ضرن نتني، فّوغن زغ‑واوال ن‑ربّي.

اوال ن‑ربّي

¹² هاي‑اوال ن‑ربّي ءيدّر ءيتجهّد، ءيمساد ءوگُّار ن‑تاژّيت لّي‑يمسادن زغ‑سنات‑تسگيو، ار‑يتبّي غ‑وگُنس ن‑بنادم ارد ءيبضو نّفست زغ‑رّوح، ءيبضو اديف زغ‑تّمي ن‑يخسان، ار‑يسّبايّان نّييت ن‑وول ءولا ما‑يقصاد.

¹³ ءور‑يرگس يات ف‑ربّي غ‑كولّو ما‑يخلق. هاتي ءيبايّن كولّو غ‑يژري ن‑والّي مي‑د‑يقّان ا‑نرار لحساب.

لماسيح ءيگا انمغور‑نّغ ءيهيّان

¹⁴ ءيلّا فلّانّغ ا‑نزگا غ‑ليمان‑اد غ‑نومژ، اشكو ءيلّا‑ياغ يان‑ونمغور ءيهيّان لّي‑يكشمن س‑يگنّا، ا‑ت‑يگان د‑ياسوع يوس ن‑ربّي.

¹⁵ ءيلّا‑ياغ يان‑ونمغور ءيهيّان لّي‑يژضارن ا‑يحنّو ف‑ضّعف‑نّغ، اشكو ءيتيارام ءولا نتّا زغ‑كرايگاتّ تاسگا زوند نكُّني، والاينّي ءور‑جّو‑يسكير كرا ن‑دّنب.

¹⁶ ف‑ماياد ا‑ف‑راد‑ينيغ: ا‑نزعم غيلاد ا‑ن‑ناكمور س‑لعرش ن‑ربّي ءيحنّان، اد‑اغ‑يرحم ءيحنّو فلّانّغ ءيعاون‑اغ غ‑تاساعت لّي‑غ‑نحتاجّا.