iɛbrin 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لماسيح يوگُر موسا

¹ واي‑ايتما ءيمژلاين لّي‑مي‑د‑يغرا ربّي اد‑كشمن س‑تامونت‑اد، سوينگيماد‑د ياسوع لّي‑د‑يتيازانّ ا‑يگ انمغور ءيهيّان لّيمان لّي‑غ‑نومژ.

² ءيسكر كولّو ما‑گيس‑يرا ربّي لّي‑ت‑يژلين ءي‑تووري‑اد، غمكلّي ءيسكر موسا كولّو ما‑گيس‑يرا غ‑وامّاس ن‑ايت‑تگمّي ن‑ربّي.

³ والاينّي نسّن ءيس‑يستهلّا ياسوع لوقر ءوگُّار ن‑موسا. اشكو ابنّاي، ار‑تي‑توقّارن مدّن ءوگُّار ن‑تگمّي لّي‑يبنا.

⁴ كرايگاتّ تيگمّي تّياوبنا ف‑وفوس ن‑كرا ن‑يان، ءيمّا ربّي ءيگا ابنّاي ن‑كولّو ما‑يلّان.

⁵ موسا ءيسّووفا كولّو ما‑گيس‑يرا ربّي، ءيگ اخدّام غ‑وامّاس ن‑ايت‑تگمّي ن‑ربّي، ءيمل‑اسن ما‑را‑ييني ربّي غ‑مايلّي‑د‑يفتان.

⁶ ءولا لماسيح ءيسّووفا كولّو ما‑گيس‑يرا ربّي، ءيمّا نتّا ءيگا يوس ن‑تگمّي، تيلي‑تگمّي كولّوتّ غ‑دّو‑وفوس‑نس. ءيمّا ايت‑تگمّي‑نس، نكُّني ا‑تن‑يگان ءيغ‑نزگا نزعم، نامژ‑بدّا غ‑رّجا‑ياد دارنّغ ءيلّان.

اد‑ور‑تسّيقارم ءيخف‑نّون

⁷ غمكلّي‑س‑ينّا رّوح لقودوس: «غاسّاد ءيغ‑تسفلدم ءي‑واوال‑نس،

⁸ اد‑ور‑تسّيقارم ءيخف‑نّون زوند ءيمزوورا‑نّون لّي‑گيگي‑رگّمنين غ‑ووسّان لّي‑غ‑ا‑يّي‑تارمن غ‑لخلا.

⁹ كّوژ ءيد‑مراو ن‑وسگُّاس ا‑يّي‑تارمن، ار‑تمنادن كولّو ماد‑سكارغ.

¹⁰ مايان ا‑ف‑حاشاغ مدّن‑ان ءينيغ فلّاسن ‹ار‑بدّا‑جلّون ءيخفاون‑نسن. ءور‑جّو‑سّينّ اغاراس‑ينو.›

¹¹ س‑لغاضاب ا‑س‑نّيغ اوال‑اد ءيزگان، ‹نتني ءور‑سار‑راد‑كشمن س‑وسونفو‑نو.› »

¹² واي‑ايتما، رارات لعاقل ا‑ور‑گيگون‑ييلي ما‑مي‑يُخشن‑وول‑نس ياگُي ا‑يامن ءيرار تيغوردين‑نس س‑ربّي لّي‑يدّرن.

¹³ والاينّي زّعامات ءي‑نگراتون كرايگاتّ اسّ، ماحدّ لّان‑ووسّان، ا‑ور‑گيگون‑ييلي ما‑ن‑لدّين دّنوب ارد ءيقار ءيخف‑نس ءيجلو.

¹⁴ اشكو راد‑بدّا‑نقاما غ‑تامونت لّماسيح ءيغ‑نزگا غمكلّي نومن زغ‑يسيزوار ار ءيسيگُّرا.

¹⁵ غمكلّي ءينّا: «غاسّاد ءيغ‑تسفلدم ءي‑واوال‑نس، اد‑ور‑تسّيقارم ءيخف‑نّون زوند ءيمزوورا‑نّون لّي‑گيگي‑رگّمنين.»

¹⁶ والاينّي مانوي سفلدنين ءي‑واوال ن‑ربّي رگمن گيس؟ ا‑تن‑يگان د‑ويلّي‑د‑يسّوفغ موسا زغ‑تمازيرت ن‑ميصر.

¹⁷ مانوي ءيحاشا ربّي كّوژ ءيد‑مراو ن‑وسگُّاس؟ ا‑تن‑يگان د‑ويلّي سكرنين دّنوب مّتن ءيلمّا غ‑لخلا.

¹⁸ مانوي مي ءينّا ربّي س‑واوال ءيزگان ءور‑سار‑راد‑كشمن س‑وسونفو‑نس؟ ا‑تن‑يگان د‑ويلّي فّوغنين زغ‑واوال‑نس.

¹⁹ غايان اد‑اغ‑يملان ءيزد ف‑سّيبت ن‑ماد‑اگُين اد‑امنّ ا‑ف‑ور‑ژضارن اد‑د‑كشمن س‑وسونفو ن‑ربّي.