iɛbrin 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اجنجم ءيهيّان

¹ مايان ا‑س‑فلّانّغ‑يلّا ا‑ستّ‑نتاوي س‑وگُّار غ‑ما‑مي‑نسفلد، ا‑ور‑نجلو زغ‑وغاراس.

² اشكو شّرع لّي‑د‑يوشكان ءي‑يمزوورا‑نّغ ف‑يمي لّمالايكا، ءور‑يژضار يان گيسن اد‑اس‑يانف، والاينّي تضر لعقوبيت س‑لحقّ ف‑كولّو وانّا زگيس ءيفّوغن ءولا كولّو وانّا ءور‑سرس‑يسكارن.

³ ءيمّا غيلاد، مامنك ا‑را‑ننجم ءيغ‑ور‑تّ‑نيوي غ‑وجنجم‑اد ءيهيّان؟ سيديتنّغ ياسوع ا‑يزوارن ءينّا‑ياغ فلّاس، ساولن فلّاس ءولا غويلّي سفلدنين ءي‑سيديتنّغ ملن‑اغ ءيس‑يگا لحقّ.

⁴ ءيزّگا‑ت ربّي س‑لمعجيزات د‑لعجايب د‑لقوّات گّوتنين ءولا س‑توافكيو ن‑رّوح لقودوس لّي‑يفكا ءي‑مدّن غمكلّي ءيرا.

لماسيح يوورّي ءيطّاف دّات ن‑بنادم

⁵ ءورد لمالايكا ا‑مي‑يفكا ربّي اد‑تحكامن غ‑دّونيت لّي‑را‑ييلي، ا‑ستّ‑يگان د‑دّونيت لّجديد لّي‑ف‑ا‑نساوال غيلاد.

⁶ والاينّي غمكلّي ءينّا يان غ‑وارّا ن‑ربّي: «ما‑يگا بنادم ايلّيغ ا‑گيس‑تسوينگيمت، ءولا يوس ن‑بنادم ايلّيغ‑تّ‑گيس‑تيويت؟ ءيمّا كيّي تگيت‑ت‑يد غ‑دّو لّمالايكا يان ءيميكّ، تفكت‑اس تّاج لّمجد د‑لهيبت،

⁸ ترارت كولّو ما‑يلّان غ‑دّو ءيضارن‑نس.» غمكاد ا‑س‑يملا ربّي ءيس‑يرور كولّو ما‑يلّان غ‑دّو ءيضارن ن‑بنادم باش ا‑ت‑يحكام. ءيمّا غيلاد ءيبان ءيس‑ور‑تا‑يلّي كولّو غ‑دّو ءيضارن ن‑بنادم.

⁹ والاينّي نژرا ياسوع لّي‑يوورّين ءيلّا‑د غ‑دّو لّمالايكا يان ءيميكّ، نژر‑ت ياتّوي س‑لمجد د‑لهيبت ف‑سّيبت لّموت لّي‑س‑يمّوت ا‑سرس‑يسّروح رّحمت ن‑ربّي ءي‑كولّو مدّن.

¹⁰ ربّي ا‑يخلقن كولّو ما‑يلّان، ءيگ كولّو وينس. ءيسكر ما‑يفولكين لّيغ ءيقصاد ا‑يمجّد انجّام‑نّغ س‑ورفوفن، ءيرار مدّن گّوتنين اد‑گن تاروا‑نس كشمن ديدس س‑لمجد‑نس.

¹¹ ءور‑يحشيم ياسوع اد‑اغ‑يگ د‑ايتماس، اشكو غوالّي ءيسّغوسن ءولا غويلّي ءيسّغوس، باباتسن ءيگا يان.

¹² ءينّا نتّان ءي‑باباس: «راد‑ينيغ ءي‑ايتما ف‑كولّو ما‑تسكرت، الغّ‑ك غ‑وامّاس ن‑ومناگّار.»

¹³ ييني‑داغ: «را‑ن‑رجوغ ءولا نكّي غ‑ربّي.» ييني‑داغ: «ها‑نكّي د‑تاروا‑ياد ن‑ربّي لّي‑يّي‑يفكا.»

¹⁴ نكُّني‑اد ءيگان تاروا، نطّاف دّات ن‑تفيّي د‑يدامّن. مايان ا‑ف‑يوورّي ءولا نتّا ءيطّاف دّات زوند نكُّني، باش ا‑يمّت ءيهلك ءيبليس لّي‑دار لقوّا لّموت.

¹⁵ ءيفسي ءي‑كولّو ويلّي زّراينين ءوسّان‑نسن غ‑يسكراف ن‑تكساض لّموت.

¹⁶ ءيبان ءيس‑ورد لمالايكا ا‑ف‑يسكر مايان والاينّي «ءيسكر‑ت ف‑مدّن ن‑تاسوت ن‑يبراهيم.»

¹⁷ ماياد ا‑ف‑د‑يقّان ياسوع ا‑يرواس ءي‑ايتماس زغ‑كرايگاتّ تاسگا، باش اد‑اسن‑يگ انمغور ءيهيّان ءيحنّو گيسن ءيسكر كولّو مايلّي حتاجّان، ءيبيدّ غ‑گراتسن د‑ربّي ا‑ن‑يسرس تيغرسي لّي‑را‑يسّيتّي دّنوب ف‑بنادم.

¹⁸ ءيمّا غيلاد ءيژضار ا‑يعاون كولّو وانّا تارمنت لخُشانات، اشكو ءيرفوفن ءولا نتّا ءيتيارام ف‑ا‑يسكر ما‑يُخشنّ.