iɛbrin 13 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

حوبّوات ار‑تّفولكيم ءي‑نگراتون

¹ زايدات ار‑بدّا‑تّحوبّوم ءي‑نگراتون غمكلّي تمحوبّون ايتماتن.

² ا‑ور‑تتّوم ا‑تسّمرحبام س‑يغريبن، اشكو غايد ءيزرين سّمرحبان كرا ن‑مدّن س‑لمالايكا، ءور‑سّينّ ءيزد لمالايكا اد‑گان.

³ سوينگيمات غ‑ايتماتون لّي‑ن‑لّانين غ‑لحبس زوند ءيغ‑ن‑ديدسن‑تلّام، ار‑تسوينگيمّ غ‑غويلّي ترفوفونّين زوند ءيغ‑ا‑ديدسن‑تّرفوفونم.

⁴ ءيلّا ف‑كود يان ا‑يگ ليتّيهال د‑تغاوسا ءيفولكين ءيهيّان، ءولا‑دا‑يشّكشام يان ما‑يهرشن س‑تيسي‑نسن. اشكو ربّي را‑يوت لحوكم ف‑وانّا ءيفسادن ءولا وانّا ءيزنان.

⁵ زريات تودرت‑نّون بلا‑دا‑تّحوبّوم ءيقاريدن، تقنعوم س‑ونشك نّا‑دارون‑يلّان. اشكو ءينّا ربّي: «ءور‑سار‑ك‑ين‑فلغ ءولا وورّيغ‑د فلّاك.»

⁶ مايان اد‑اغ‑يزّعامن ا‑نتّيني: «سيدي ربّي ا‑يگان اعوين‑ينو. ءور‑كسوضغ يات. ما‑راد‑يّي‑يسكر بنادم؟»

⁷ سوينگيماد‑د ءيمغارن لّي‑اون‑ين‑سّلكمنين اوال ن‑ربّي، ار‑دي‑تسوينگيمّ لفايتّ ن‑تودرت‑نسن، تامنم اوال ن‑ربّي غمكلّي ءومنّ نتني.

⁸ ءيمّا ياسوع لماسيح، غمكلّي ءيگا ا‑راد‑بدّا‑يگ، زوند ءيضگام زوند غاسّ زوند كولّو ما‑د‑يفتان.

⁹ ا‑ور‑تادجم كرا ن‑يلمّودن ءيغريبن ا‑كُن‑جلّون زغ‑وغاراس لّحقّ. را‑يشوو ا‑تسّدوسم ءولاون‑نّون س‑لباراكا ن‑ربّي، ءورد س‑تنباضين ن‑ومشّو لّي‑غ‑ور‑تلّي كرا لّفايتّ ءي‑ويلّي سرسنت سكارنين.

¹⁰ ءور‑ژضارن غويلّي سكارنين تاووري ن‑وخيّام ن‑ربّي اد‑شّن زغ‑تغرسي لّي‑دارنّغ‑يلّان.

¹¹ انمغور‑نسن ءيهيّان ار‑يتاوي ءيدامّن لّبهايم س‑تحانوت تامژلايت باش ا‑غين‑يسّيتّي دّنوب ف‑مدّن‑نس. ءيمّا تيفيّي د‑يخسان ن‑تغرسيو‑ان ار‑تن‑جدّرن مدّن غ‑برّا ن‑ودغار لّي‑غ‑بنان ءيخيّامن‑نسن.

¹² مايان ا‑ف‑يمّوت ءولا ياسوع غ‑برّا ن‑تمدينت باش ا‑يسّغوس مدّن س‑يدامّن‑نس.

¹³ ءيمّا غيلاد ءيلّا فلّانّغ ا‑دارس‑نفّوغ س‑برّا ن‑يخيّامن ا‑ن‑ديدس‑نيلي غ‑ترگّام لّي‑س‑ت‑رگمن.

¹⁴ اشكو ءور‑دارنّغ كرا ن‑تمدينت ءيدومن غ‑دّونيت‑اد، والاينّي ار‑ن‑نترجو تامدينت لّي‑راد‑اغ‑ييلي غ‑مايد‑د‑يفتان.

¹⁵ ءيمّا غيلاد ءيلّا فلّانّغ ا‑ن‑بدّا‑نسّاكمور ءي‑ربّي تاوافكا ن‑شّوكر ف‑وودم ن‑ياسوع، ا‑ستّ‑يگان د‑لغلّت ن‑ينفورن‑نّغ لّي‑س‑ا‑نتوقّار ءيسم‑نس.

¹⁶ ا‑ور‑تتّوم ا‑تسكارم افولكي ار‑تمعاوانم ءي‑نگراتون، اشكو وان تيوافكيو‑ان ا‑س‑ا‑يترضو ربّي.

¹⁷ سفليدات س‑يمغارن‑نّون ار‑تسكارم س‑واوال‑نسن، اشكو ار‑بدّا‑سرون‑تراران لعاقل. ءيقّان‑تن‑د اد‑فلّاون‑فكن لحساب ءي‑ربّي. سكارات س‑واوال‑نسن باش اد‑فرحن س‑تووري‑نسن، ءورد ا‑تن‑فلّاس‑تيگُراژ. اشكو ءيغ‑تن‑تژّيگُراژم ءور‑راد‑اون‑تيلي لفايتّ.

¹⁸ ژّالّات ار‑تّضالابم ربّي ف‑سّيبت‑نّغ نكُّني. نسّن ءيس‑يغوس‑وول‑نّغ، نيري ا‑نسكار افولكي غ‑كولّو ما‑نتناوال.

¹⁹ غمكاد ا‑س‑كُن‑وصّاغ س‑لمعقول ا‑تضالبم ربّي فلّا باش ا‑يّي‑ن‑يسّوورّي س‑دارون غ‑مايد‑د‑ياكمورن.

²⁰ ءيمّا غيلاد، ضالبغ ءي‑ربّي ن‑سّلامت لّي‑د‑يسّنكرن زغ‑لموت امكسا ءيمقّورن سيديتنّغ ياسوع لّي‑يتگابالن ءولّي‑نس، ءيسكر لعهد‑اد ءيدومن غ‑گراتنّغ د‑ربّي س‑يدامّن‑نس.

²¹ ضالبغ‑اس اد‑اون‑ياكّا كولّو ما‑يگان افولكي، باش ا‑تسكارم ما‑يتّيري. ضالبغ‑اس ا‑گينّغ‑يسكر كولّو ما‑ت‑يترضون س‑يسم ن‑ياسوع لماسيح. نتّان ا‑باهرا‑نتالغ غيلاد ءولا كولّو مايد‑د‑يفتان. امين.

²² واي‑ايتما، ريغ اد‑اون‑ضالبغ ا‑تقبلم ءيواليون‑اد لّي‑س‑كُن‑وصّاغ، اشكو ءور‑باهرا‑تغزّيف‑تبرات‑اد.

²³ ءيمّا غيلاد ريغ ا‑تيسّانم ءيس‑د‑يفّوغ گماتنّغ تيموتاوس زغ‑لحبس. ءيغ‑د‑داري‑يوشكا غ‑مايد‑د‑ياكمورن، را‑ن‑ديدي‑يمون س‑دارون ا‑كُن‑نژر.

²⁴ سلّمات‑ن ف‑يمغارن‑نّون كولّوتن ءولا ف‑كولّو ءيمژلاين ن‑ربّي. ار‑ن‑فلّاون‑تسلّامن ايتماتن ن‑يطاليا.

²⁵ اد‑اون‑تيلي لباراكا ن‑ربّي كولّوكن.