iɛbrin 12 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

سوانگماد‑د ياسوع

¹ ءيمّا غيلاد غ‑اغ‑تلولّي‑تمدلوت‑اد ن‑يناگان، ءيلّا فلّانّغ ا‑نلوح كولّو ماد‑اغ‑يژّوژّاين، نفل دّنوب لّي‑بدّا‑تّيرينين اد‑اغ‑سّموكروسن، باش ا‑نتازّال بلا‑دا‑نترماي غ‑وغاراس لّي‑يرژمن غ‑لگدّام‑نّغ.

² ءيلّا فلّانّغ ا‑ن‑نتمناد غ‑ياسوع لّي‑اغ‑يسكرن اغاراس‑اد س‑نومن، راد‑اغ‑گيس‑ياوي ار تّمي. ءيصبر نتّان ءي‑لموت ف‑وگّجدي، ءور‑تّ‑ييوي غ‑تدالّيت، اشكو ءيژرا‑ن لفرح لّي‑راد‑اس‑ييلي تيگيرا. ءيسكيوس ءيلمّا ف‑وفاسي لّعرش ن‑ربّي.

ربّي ار‑يتربّا وانّا دارس ءيعزّان

³ سوانگماد‑د ياسوع لّي‑يصبرن ءي‑تنوّاشت ءيگّوتن ف‑يفاسّن ن‑مدّن أُخشنّين، باش ا‑ور‑يرمي‑وول‑نّون ءيهروصّي.

⁴ اشكو غ‑يميغ‑اد غ‑ا‑تّمّاغم د‑لخُشانت، ءور‑تا‑گيس‑تلكيمّ تيزي لّموت.

⁵ ءيس‑تتّوم اوال لّي‑س‑كُن‑يزّعام ربّي لّيغ‑كُن‑يگا د‑تاروا‑نس؟ ييني: «وا‑يوي، ءيغ‑ك‑يصلح سيدي ربّي، اد‑ور‑تينيت د‑يخف‑نّك ‹غاياد ءور‑يگي يات.› نغد ءيغ‑ك‑يژي، اد‑ور‑تينيت ‹نكّي ءور‑گيغ يات.›

⁶ اشكو سيدي ربّي ار‑يتربّا وانّا دارس ءيعزّان، ار‑يسّروات وانّا ءيگا د‑يوس.»

⁷ ءيلّا فلّاون ا‑تصبرم ءيغ‑ا‑كُن‑يتربّا، اشكو ار‑ديدون‑يسكار غمكلّي ءيسكار‑ورگاز د‑تاروا‑نس. ءيس‑يلّا ما‑ور‑يتّربّان ف‑وفوس ن‑باباس؟

⁸ مراد ءيس‑ا‑كُن‑ور‑يتربّا ربّي غمكلّي تّربّان كولّو مدّن، ءور‑را‑تگم تاروا‑نس، والاينّي زوند تاروا ن‑تسوكت ا‑را‑تگم.

⁹ نكُّني كولّواغ دارنّغ ءيد‑باباتنّغ ن‑دّونيت‑اد، ار‑اغ‑تربّان ار‑تن‑نتوقّار، والاينّي ءيس‑ور‑يوف ا‑نسفليد ءولا س‑باباتنّغ ن‑يگنّا باش ا‑ندّر؟

¹⁰ يات لوقت ءيدروسن اد‑اغ‑تربّان نتني س‑مكلّي‑اسن‑يبان ءيشوا، ءيمّا ربّي ار‑اغ‑يتربّا س‑مكلّي راد‑اغ‑يصلح باش ا‑نفولكي غمكلّي ءيفولكي نتّا.

¹¹ ءور‑يلّي ما‑يتفراحن غاكود لّيغ ا‑ت‑يتربّا باباس. ار‑اس‑تطيّار غ‑تاساعت‑ان، والاينّي راد‑اس‑تيلي لغلّت ن‑وفولكي د‑لهنا تيگيرا ءي‑وانّا ءيتّربّان غمكاد.

اويات‑ستّ غ‑ما‑س‑ا‑تّرضوم ربّي

¹² ف‑مايان ا‑ف‑راد‑اون‑ينيغ، الّات ءيفاسّن‑نّون الوانين، تزّگام ءيفادّن‑نّون تغاشانين.

¹³ سّنگادّات تيغاراسين ءي‑يضارن‑نّون، ا‑ور‑يضر يان ءيسّبيضيرن والاينّي ا‑يجّي.

¹⁴ گات‑ن تيقّي‑نّون ا‑تگم سّلامت ءي‑كولّو مدّن، تعمّرم س‑وفولكي اشكو يان غ‑ور‑يلّي ءور‑سار‑را‑يژر سيديتنّغ.

¹⁵ اويات‑ستّ غ‑يخفاون‑نّون ا‑ور‑يجلو يان گيگون زغ‑لباراكا ن‑ربّي، ءولا ءيمغي‑د‑وامود ن‑واسمّوم غ‑گراتون، ارد ءيسّدووي مدّن ءيسّهرش ما‑يگّوتن.

¹⁶ ا‑ور‑ييلي يان گيگون ءيتفسادن، ءولا يان ءيتراران تيغوردين‑نس س‑ربّي زوند عيسو لّي‑يگان ءيخفدّي ءيزّنز لحقّ‑نس ف‑يات تيرمت.

¹⁷ تسّنم ءيس‑يوورّي تيگيرا ءيرا باهرا ا‑يوورت لباراكا ن‑باباس، والاينّي باباس ءور‑اس‑تّ‑يفكي. واخّا‑ياس‑تّ‑يضالب باهرا س‑يمطّاون، ءور‑اس‑يسوگير يات.

¹⁸ ءور‑ن‑تاكمورم كونّي س‑كرا ن‑ودرار ن‑دّونيت‑اد غمكلّي‑ن‑اكمورن ءيمزوورا‑نّون، ار‑ن‑گيس‑سّموقّولن تيمزليوين لّعافيت د‑تيلّاس د‑ومالو د‑يگّيگ.

¹⁹ ءولا تسفلدم كونّي ءي‑تيجّيجت ن‑نّفّار ءولا اوال لّي‑يتبرّاحن. نتني، لّيغ سفلدن ءي‑واوال‑ان، ضالبن‑ت باهرا اد‑اسن‑ور‑سول‑يساول،

²⁰ اشكو گُّدن ف‑لوصيت ن‑ربّي لّي‑س‑اسن‑ينّا: «وانّا‑د‑يروحن ادرار‑اد، ءيگ‑ييت لبهيمت نغد بنادم، ءيقّان‑د ا‑تي‑تكّاتم س‑يژران ارد ءيمّت.»

²¹ ءولا موسا ءيكسوض باهرا زغ‑كولّو مايلّي‑ن‑يژرا ييني: «ار‑سري‑تكّات تاودا.»

²² والاينّي تاكمورم‑د كونّي س‑ودرار ياضني، ا‑ت‑يگان د‑وروشاليم ن‑يگنّا، ءيگ تامدينت ن‑ربّي لّي‑يدّرن. تاكمورم‑د س‑كيگان د‑وافضان لّمالايكا مونّ‑د كولّو س‑لفرح ءيگّوتن،

²³ ءولا س‑ومناگّار ن‑ويلّي ءيگا ربّي د‑تاروا‑نس ءيخفدّيتن لّي‑مي‑تياران ءيسماون‑نسن غ‑يگنّا. تاكمورم‑د س‑ربّي لّي‑يتحكامن ف‑كولّو مدّن، ءولا س‑لارواح ن‑مدّن لّي‑ف‑يرضا ءيسّافو‑اسن كولّو ماد‑اسن‑ينّا.

²⁴ تاكمورم‑د س‑ياسوع لّي‑يسكرن لعهد لّجديد غ‑گر ربّي د‑بنادم، ءولا س‑وروشّ ن‑يدامّن‑نس لّي‑يفكان رّجا ءوگُّار ن‑يدامّن ن‑هابيل.

²⁵ اويات‑ستّ باهرا غ‑غوالّي سرون ءيساوالن. اشكو لهالاك ا‑يضرن ف‑ويلّي اگُينين اد‑سفليدن س‑موسا لّي‑تن‑يومرن غ‑دّونيت‑اد، والاينّي ءوگُّار ن‑غايان ا‑راد‑اغ‑ييلي نكُّني ءيغ‑نرور تيغوردين‑نّغ س‑والّي‑اغ‑د‑يومرن زغ‑يگنّا.

²⁶ لّيغ ءيساول ربّي غ‑ووسّان‑ان، ءيمّوسّا‑واكال س‑واوال‑نس. ءيمّا غيلاد ءينّا‑ياغ ف‑ما‑را‑يسكر: «راد‑داغ‑سّماسّغ اكال، سّماسّغ ءولا ءيگنوان.»

²⁷ س‑واوال‑ان ا‑س‑اغ‑يملا ءيس‑را‑يمّاسّ كولّو ما‑يتياوخلاقن، ءيتياتّاي باش ا‑ور‑يقاما غير ما‑يطّافن لّساس ءيزگان.

²⁸ ءيمّا غيلاد غ‑اغ‑يفكا ربّي يات‑تگلديت لّي‑ور‑سار‑را‑يمّاسّ، ءيلّا فلّانّغ ا‑ت‑نتشكار ار‑ت‑نتعباد غمكلّي‑زگينّغ‑يرا، ار‑ت‑نتوقّار ار‑تّ‑نتاوي باهرا غ‑ما‑س‑ا‑ت‑نترضو.

²⁹ اشكو ربّي‑نّغ ءيرواس ءي‑لعافيت ءيفنّون.