iɛbrin 11 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

غويلّي ءومنّين اوال ن‑ربّي

¹ يان يومنّ اوال ن‑ربّي، هاتي ءيسّن راد‑اس‑ييلي مايلّي‑ن‑يترجو. ءور‑ا‑يتشكّو غ‑مايلّي ءور‑يژري.

² مايان ا‑س‑يرضا ربّي ف‑يمزوورا‑نّغ لّي‑زرينين.

³ ءولا نكُّني، ف‑سّيبت ن‑ما‑نومن اوال ن‑ربّي ا‑ف‑نسّن ءيزد نتّان ا‑يخلقن كولّو ما‑يلّان س‑واوال‑نس، ءيسكر كولّو ما‑نتمناد زغ‑ما‑ور‑يتياوژرّان.

⁴ ءولا هابيل، ف‑سّيبت ن‑ما‑يومن اوال ن‑ربّي ا‑ف‑ن‑يسرس غ‑لگدّام ن‑ربّي يات‑توافكا لّي‑يوفن تين گماس قاين. ءيمل‑اس ربّي ءيس‑فلّاس‑يرضا ف‑سّيبت لّيمان‑نس، ءيقبل مايلّي‑اس‑يفكا. ار‑يساوال هابيل سول س‑غيلاد واخّا ءيمّوت، اشكو يومن ربّي.

⁵ ءولا اخنوخ، ف‑سّيبت ن‑ما‑يومن اوال ن‑ربّي ا‑ف‑يتيالال س‑يگنّا ءور‑يمّوت. ءور‑ژضارن مدّن ا‑ت‑افن اشكو ربّي ءيسّيتّي‑ت زغ‑دّونيت. لّيغ ءور‑تا‑يتيالال، ءيملا‑ياس ربّي ءيس‑فلّاس‑يرضا.

⁶ والاينّي يان ءور‑يومينّ ربّي، ءور‑را‑ييژضار ا‑يامژ رّضا‑نس. اشكو وانّا ءيران ا‑ن‑ياكمور س‑ربّي، ءيقّان‑ت‑يد ا‑يامن ءيس‑يلّا ربّي، يوجاد ا‑يبارك وانّا‑ت‑يسيگّيلن.

⁷ ءولا نوح، ف‑سّيبت ن‑ما‑يومن اوال ن‑ربّي ا‑ف‑تّ‑ييوي باهرا غ‑مايلّي‑اس‑ينّا ربّي ف‑كرا ن‑تغاوسيوين لّي‑ور‑تا‑يژري. ءينكر ءيبنو يان‑واناو، ءينجم گيس نتّا د‑ايت‑تگمّي‑نس. ءيفل دّونيت ا‑تّياوهلاك، ءيمّا نتّا ءيگا‑ت ربّي د‑واد ف‑يرضا ف‑سّيبت ن‑ما‑ت‑يومن.

ليمان ن‑يبراهيم

⁸ ءولا ءيبراهيم، ف‑سّيبت ن‑ما‑يومن اوال ن‑ربّي ا‑ف‑يسكر س‑مايلّي‑اس‑ينّا لّيغ‑اس‑يغرا ا‑يفّوغ س‑تمازيرت لّي‑را‑يگ تينس. ءينكر ءيفّوغ واخّا ءور‑يسّين مانيس ا‑يتّيدو.

⁹ ف‑سّيبت ن‑ما‑يومن ربّي ا‑ف‑يسكر تاكات غ‑تمازيرت لّي‑راد‑اس‑يفك ربّي، ءيگ اغريب غ‑وامّاس ن‑ايت‑تمازيرت‑ان. ءيزدغ غ‑يخيّامن، نتّان ءولا ءيسحاق ءولا ياعقوب لّي‑راد‑كولّو‑ديدس‑يطّاف مايلّي‑س‑اس‑ينّا ربّي راد‑اس‑ت‑يفك.

¹⁰ اشكو ار‑ن‑يترجو غ‑تمدينت ياضني، ا‑ستّ‑يگان د‑تالّي ءيسكر ربّي ءيبنو‑تّ ف‑لّساس ءيدومن.

¹¹ ف‑سّيبت ن‑ما‑يومن ربّي ا‑ف‑يورو غ‑تيزي لّي‑غ‑ور‑ا‑يتارو يان، ءولا تژضار‑تمغارت‑نس سارا ا‑تربّو. يوورّي ءيگا باباس ن‑يان‑وارّاو، اشكو يومن ءيس‑يزگا ربّي غ‑واوال‑نس.

¹² غمكاد ا‑س‑توورّي تاسوت ن‑يان‑ورگاز لّي‑يسّورفن تيزي ن‑تودرت، تگّوت زوند ءيتران ن‑يگنوان نغد املال ن‑تاما ن‑ومدا.

¹³ كولّو مدّن‑ان ءومنّ اوال ن‑ربّي ايلّيغ مّوتن، ءور‑تا‑ومژن مايلّي‑س‑اسن‑ينّا راد‑اسن‑ت‑يفك. والاينّي ژران‑ت‑ين غ‑توگّوگت فرحن سرس، ءور‑ا‑تحشامن ا‑تّينين ءيزد ءيبرّانيين د‑يغريبن اد‑گان غ‑دّونيت.

¹⁴ كولّو وينّا ءيتّينين غمكان، ءيبان گيسن ءيس‑ا‑تّيرين يات‑تمازيرت ياضني ا‑تگ تينسن.

¹⁵ اشكو مراد ءيس‑ا‑سوينگيمن غ‑تمازيرت ن‑دّونيت‑اد لّي‑زغ‑د‑وشكان، ءيكون ژضارن ا‑سرس‑وورّين.

¹⁶ والاينّي ار‑تّيرين يات‑تمازيرت لّي‑يوفن ختاد، ا‑ستّ‑يگان د‑تين‑يگنّا. ءور‑تُگراژ ربّي لّيغ ا‑تّينين ءيس‑يگا ربّي‑نسن، اشكو ءيجّوجاد‑اسن يات‑تمدينت.

¹⁷ ءيبراهيم، ف‑سّيبت ن‑ما‑يومن اوال ن‑ربّي ا‑ف‑ن‑يسرس ءيسحاق ف‑يگّي ن‑وكركور لّيغ‑ت‑يورم ربّي. يوجاد ا‑يغرس ءي‑يوس لّي‑دارس‑يگان يان

¹⁸ واخّا‑ياس‑ينّا ربّي س‑واوال‑نس ءيزگان: «زغ‑تاروا ن‑يوك ءيسحاق ا‑زغ‑را‑تيلي تاسوت‑نّك.»

¹⁹ والاينّي يومن ءيبراهيم ءيس‑يژضار ربّي ا‑د‑يسّنكر ءولا يان ءيمّوتن. ءيسكر‑نّيت ربّي زوند مايان، ءيرار‑اس‑د ءيسحاق زغ‑لموت.

ءيبارك ربّي غويلّي ءومنّين اوال‑نس

²⁰ ءولا ءيسحاق ف‑سّيبت ن‑ما‑يومن اوال ن‑ربّي ا‑ف‑ينّا ءي‑ياعقوب د‑عيسو ف‑لباراكات لّي‑راد‑اسن‑ييلي.

²¹ ءولا ياعقوب لّيغ علاين ا‑يمّت، ف‑سّيبت ن‑ما‑يومن اوال ن‑ربّي ا‑ف‑ينّا ءي‑سين تاروا ن‑يوسف ف‑لباراكات لّي‑راد‑اسن‑ييلي، ءيكنو ف‑يخف ن‑وعكّاز‑نس يالغ ربّي.

²² ءولا يوسف لّيغ ا‑د‑يتاكمور ا‑يمّت، ف‑سّيبت ن‑ما‑يومن اوال ن‑ربّي ا‑ف‑يساول ف‑وفّوغ لّي‑س‑راد‑فّوغن ايت‑ربّي زغ‑ميصر، يوصّا‑تن ءيلمّا ف‑يخسان‑نس.

²³ ءولا باباس ن‑موسا د‑ينّاس، ف‑سّيبت ن‑ماد‑ومنّ اوال ن‑ربّي ا‑ف‑ت‑حضان كراض‑ييرن تيغوردين ن‑تلاليت‑نس، اشكو ژران ءيس‑يگا ارّاو ءيفولكين، د‑نتني ءور‑كسوضن لامر ن‑وگلّيد.

ليمان ن‑موسا

²⁴ ءولا موسا لّيغ‑د‑يمقّور، ف‑سّيبت ن‑ما‑يومن اوال ن‑ربّي ا‑ف‑ور‑يري اد‑اس‑تّينين مدّن «يوس ن‑يلّيس ن‑فيرعاون.»

²⁵ يوف دارس ا‑يتمونو د‑ايت‑ربّي غ‑ترفوفنت، ءولا‑دا‑يتفجّيج غ‑دّنوب يات تاساعت ءيدروسن.

²⁶ ءيحاسب نتّا تادالّيت لّي‑غ‑يلّا ف‑سّيبت لّماسيح ءيس‑تعزّا ءوگُّار ن‑تميخار ن‑ميصر، اشكو ار‑ن‑يترجو غ‑لباراكا لّي‑را‑ييلي تيگيرا.

²⁷ ف‑سّيبت ن‑ما‑يومن اوال ن‑ربّي ا‑ف‑يفّوغ زغ‑ميصر، ءور‑يكسوض لغاضاب ن‑وگلّيد. ءيزگا نتّا غ‑مايلّي ءيقصاد زوند ءيغ‑ا‑يژرّا ربّي لّي‑ور‑جّو‑يژري يان.

²⁸ ف‑سّيبت ن‑ما‑يومن ربّي ا‑ف‑يوصّا ايت‑ربّي ف‑واسّ ن‑وسورف، ييني‑اسن اد‑تروشّن تيگُمّا‑نسن س‑يدامّن، باش ا‑ور‑ينغ لمالاك لّموت ءيويتسن ءيخفدّي زوند ءيخفدّيتن ن‑ايت‑ميصر.

وييّاض ءومنّين اوال ن‑ربّي

²⁹ ءولا مدّن‑ان، ف‑سّيبت ن‑ماد‑ومنّ اوال ن‑ربّي ا‑ف‑زرين زغ‑وامّاس ن‑ومدا ءيژگُّاغن زوند ءيغ‑زرين ف‑واكال. لّيغ ران ايت‑ميصر اد‑سكرن زوند نتني، سّخسين‑تن‑كولّو‑وامان.

³⁰ ف‑سّيبت ن‑ماد‑ومنّ مدّن اوال ن‑ربّي ا‑ف‑اسن‑د‑ضرن ءيغوربان ن‑تمدينت ن‑اريحا تيگيرا ن‑ماد‑اس‑تلولّين سّا‑ووسّان.

³¹ ءولا تامگّانت راحاب، ف‑سّيبت ن‑ما‑تومن ا‑ف‑تعاون ءيمازانّ، ءور‑تمّوت تيگيرا د‑ويلّي ءور‑رينين ربّي.

³² ما‑راد‑اون‑سول‑ينيغ؟ ءور‑تومي لوقت ما‑غ‑ا‑ياون‑ين‑سول‑ادّرغ ما‑يسكر جيدعون ءولا باراق ءولا شامشون ءولا ءيفتاح ءولا داود ءولا صامويل ءولا لانبيا.

³³ نتني، ف‑سّيبت ن‑ماد‑ومنّ اوال ن‑ربّي ا‑ف‑نران تيگلداي، زّگان لحقّ، امژن ما‑ف‑اسن‑ينّا ربّي، قّنّ ءيماون ن‑يزماون،

³⁴ سّخسين لعافيت ءيسّديدّين، نجمن زغ‑تاژّيت ءينقّان، وورّين دوسن غ‑ضّعف‑نسن، تجهّدن غ‑يميغ، نرون ءيعسكرين ن‑يبرّانيين.

³⁵ ءولا كرا ن‑تمغارين، نكرن‑اسند‑د غويلّي‑اسنت‑مّوتنين. ءيمّا وييّاض اگُين انورژم، صبرن د‑ويلّي‑تن‑كّاتنين ار لموت، باش اد‑د‑نكرن س‑تودرت لّي‑يوفن تودرت ن‑دّونيت‑اد.

تارفوفنت ن‑ويلّي ءومنّين

³⁶ كرا گيسن، رگمن‑ت. كرا گيسن، سّغورشن‑ت. كرا گيسن، كرفن‑ت س‑سّناسل لوحن‑ت‑ين غ‑لحبس.

³⁷ ءوتن‑تن س‑يژران، بّين‑تن س‑لمناشر، غرسن‑اسن س‑تاژّيت. ار‑تلولّين ار‑لسّان ءيلماون ن‑وولّي د‑واغاضن. ژلضن، زايدن‑د تارفوفنت ءي‑تمّارا.

³⁸ وان غويد، ءور‑تن‑تستهلّا دّونيت. ار‑تكّان لخلا د‑يدرارن، ار‑نسّان غ‑يفران د‑يگُضيان غ‑دّو‑واكال.

³⁹ كولّو مدّن‑ان، ءيرضا فلّاسن ربّي ف‑سّيبت ن‑ماد‑ومنّ اوال‑نس، والاينّي ءور‑ومژن مايلّي‑س‑اسن‑ينّا راد‑اسن‑ت‑يفك.

⁴⁰ اشكو ءيقصاد ربّي كرا يوفن مايان. ييري اد‑ديدنّغ‑كشمن س‑لباراكا لّي‑راد‑اغ‑ييلي، ءيسّافو‑اسن غمكان كولّو مايلّي‑س‑اسن‑ينّا.