iɛbrin 10 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لموت لّماسيح تسّغوس‑اغ زغ‑دّنوب

¹ ءيمّا شّرع ن‑ايت‑يودايا ءيگا غير زوند امالو لّباراكات لّي‑را‑ييلي. ءور‑يژضار ا‑د‑يسّبايّن لباراكات‑ان غمكلّي گانت. اشكو شّرع ءور‑يژضار ا‑يسّغوس س‑وسغوس ءيكمّلن غويلّي‑ن‑بدّا‑سّاكمورنين تيغرسيو ءي‑ربّي اسگُّاس ار اسگُّاس.

² مراد ءيس‑وورّين غوسن غويلّي تعبادنين غمكان، ءيكون ءور‑سول‑ا‑سّحسّان ءيس‑ا‑گيسن‑تقامان دّنوب ءولا‑دا‑تّيرين ا‑تزايادن ار‑ن‑سّاكمورن تيغرسيو ياضني.

³ والاينّي تيغرسيو‑ان، نتنتي ا‑تن‑د‑يتراران اد‑سوينگيمن غ‑دّنوب‑نسن اسگُّاس ار اسگُّاس،

⁴ اشكو ءور‑ژضارن ءيدامّن ن‑يموگاين د‑واغاضن اد‑سّيتّين دّنوب.

⁵ مايان ا‑ف‑ينّا لماسيح غاكود لّيغ را‑د‑ياشك س‑دّونيت: «تيغرسيو د‑توافكيو، ءور‑ا‑تنتي‑تّيريت والاينّي تقصادت گيگي يات‑دّات.

⁶ لبهايم تياوجدارنين ءولا اتيگ ن‑دّنوب، ءور‑ا‑سرسن‑تّرضوت،

⁷ والاينّي نّيغ‑اك ‹ها‑يّي ءوشكيغ‑د اد‑سكرغ ما‑تريت ا‑ربّي، غمكلّي فلّا ءيتياران غ‑وارّا‑نّك.› »

⁸ غمكان ا‑س‑يملا ربّي ءيس‑ور‑ا‑يتّيري تيغرسيو ءولا تيوافكيو ءولا لبهايم تياوجدارنين ءولا اتيگ لّي‑اكّان مدّن ف‑دّنوب‑نسن. ءور‑ا‑سرسن‑يترضو، واخّا دا‑ياس‑تن‑ين‑سّاكمورن مدّن غمكلّي ءيتّيني شّرع.

⁹ ءيزايد ءيلمّا لماسيح ييني «ها‑يّي ءوشكيغ‑د اد‑سكرغ ما‑تريت.» غمكان ا‑س‑يسّونف كولّو تيغرسيو تيمزوورا باش ا‑يزّگا تيغرسي ياضني.

¹⁰ لّيغ ءيسكر ياسوع لماسيح مايلّي گيس ءيرا ربّي، ءيسرس‑ن يات‑توال غ‑لگدّام‑نس تيغرسي لّي‑يگان دّات‑نس. غمكاد ا‑س‑اغ‑يسّغوس نكُّني زغ‑دّنوب‑نّغ.

¹¹ اسّ ف‑واسّ ار‑تبدّادن ءينمغورن ن‑ايت‑يودايا ار‑سكارن تاووري‑نسن، ار‑ن‑سّاكمورن كيگان د‑تغرسيو لّي‑ور‑ژضارنين اد‑سّيتّينت دّنوب.

¹² ءيمّا لماسيح، يات‑توال ا‑ن‑يسرس يات‑تغرسي ف‑دّنوب ن‑كولّو تاسوتين، ءيسكيوس ءيلمّا ف‑وفاسي ن‑ربّي

¹³ ار‑يتقل ارد ءيگ ربّي كولّو ءينوّاشن‑نس غ‑دّو ءيضارن‑نس.

¹⁴ اشكو س‑يات‑تغرسي ا‑س‑يسّغوس ءيمژلاين ن‑ربّي س‑وسغوس ءيكمّلن لّي‑ور‑سار‑يتمّين.

¹⁵ ءولا رّوح لقودوس ءيفكا‑ياغ توگّا ف‑ماياد ءينّا:

¹⁶ «سيدي ربّي ا‑ينّان ‹غمكاد ا‑يگا لعهد لّي‑راد‑ديدسن‑سكرغ غ‑ووسّان‑ان. را‑ن‑اراغ تينباضين‑ينو ف‑وولاون‑نسن، گغ‑تنت غ‑يخفاون‑نسن.› »

¹⁷ ءيزايد ءيلمّا ييني: «ءور‑سول‑راد‑د‑كتيغ دّنوب‑نسن ءولا لخُشانات لّي‑سكرن.»

¹⁸ غمكاد ا‑س‑يملا ءيس‑فلّانّغ‑يسّيتّي لماسيح كولّو دّنوب لّي‑نسكر. ءور‑اغ‑سول‑يخصّا ا‑ن‑نسّاكمور كرا ن‑تغرسيو ياضني.

اكمورات‑ن س‑ربّي ار‑تزّعامّ ءي‑نگراتون

¹⁹ ف‑مايان ا‑ف‑راد‑اون‑ينيغ اي‑ايتما، نژضار ا‑نكشم غيلاد س‑زّعامت س‑‹تحانوت ءيتياوقداسن› ف‑سّيبت ن‑يدامّن ن‑ياسوع.

²⁰ اشكو س‑لموت‑نس ا‑س‑اغ‑يجّوجاد يان‑وغاراس لّجديد لّي‑يتاوين س‑تودرت، ا‑سرس‑نزري زغ‑لخاميا س‑وگُنس.

²¹ لّيغ‑اغ‑يلّا يان‑ونمغور ءيهيّان لّي‑يتگابالن مدّن ن‑ربّي،

²² ءيلّا فلّانّغ ا‑ن‑ناكمور س‑ربّي س‑نّييت ءيكمّلن، نامن راد‑اغ‑يقبل، نغوس زغ‑كولّو دّنوب لّي‑س‑ا‑يسّحسّا‑وول ن‑بنادم، تارود ءولا دّات‑نّغ س‑وامان غوسنين.

²³ ءيلّا فلّانّغ ا‑نامژ غ‑رّجا لّي‑س‑نومن بلا‑ياس‑نرژم، اشكو ربّي لّي‑يفكان اوال‑نس راد‑بدّا‑گيس‑يزگا.

²⁴ ءيلّا فلّانّغ ا‑ستّ‑نتاوي غ‑ينگراتنّغ باش ا‑نتمعاوان ا‑نيسّان مامنك ا‑نتحنّو ار‑نسكار كولّو ما‑يفولكين.

²⁵ ا‑ور‑نسّيكّي ف‑ومناگّار ن‑ينگراتنّغ غمكلّي سكارن كرا ن‑مدّن، والاينّي ا‑نزّعام ءي‑نگراتنّغ، غيلاد س‑وگُّار اشكو ار‑تّمنادم ءيس‑ا‑د‑يتاكمور‑واسّ لّي‑غ‑را‑د‑ياشك سيديتنّغ.

لحوكم لّي‑را‑يتّوت ف‑ويلّي ءور‑رينين ربّي

²⁶ والاينّي ءيغ‑ننكر ار‑نسكار دّنوب تيگيرا ن‑ما‑نسّن لحقّ، ءور‑را‑سول‑دارنّغ‑تيلي كرا ن‑تغرسي ما‑فلّانّغ‑يسّيتّين دّنوب.

²⁷ هان س‑تكساض گّوتنين ا‑س‑راد‑اغ‑د‑يقّان ا‑نتقل س‑لحوكم ن‑ربّي ءولا لعافيت ءيتجهّدن لّي‑س‑را‑يهلك كولّو ويلّي فّوغنين زغ‑واوال‑نس.

²⁸ نسّن ءيس‑ور‑يرحيم ربّي يان ءيرورن تيغوردين‑نس س‑شّرع ن‑موسا، اشكو ءيقّان‑ت‑يد ا‑يمّت ف‑توگّا ن‑سين نغد كراض ءيناگان.

²⁹ والاينّي ءوگُّار لّعقوبيت‑ان ا‑را‑ييلي ءي‑وانّا يوضّرن يوس ن‑ربّي س‑يضارن‑نس، ءيحگر ءيدامّن لّعهد لّي‑ت‑يسّغوسن، ءيرگم رّوح ن‑رّحمت.

³⁰ اشكو نسّن ءيزد ربّي ا‑ينّان: «نكّي ا‑راد‑اسن‑يرار ف‑ماد‑سكرن، فكغ‑اسن ماد‑اسن‑يگان.» ييني‑داغ: «ربّي سيديتون را‑يوت لحوكم ف‑مدّن‑نس.»

³¹ هان تيكساض ءيگّوتن ا‑را‑ييلي ءي‑وانّا ءيضرن غ‑وفوس ن‑ربّي لّي‑يدّرن.

صّبر ءولا لباراكا

³² سوانگماد‑د ءوسّان ءيمزوورا لّي‑غ‑توورّيم تسفاوم س‑تيفاوت لّماسيح، تصبرم تزگام غاكود لّيغ ا‑تكّاتم تامّارا ءيشقان.

³³ كرا ن‑يزماز ار‑فلّاون‑زراينت‑ترگّام د‑ترفوفنت غ‑لگدّام ن‑مدّن. ءيزماز ياضني ار‑تبدّادم د‑ويلّي‑ف‑ا‑زراينت.

³⁴ ار‑تّعاوانم ايتماتون لّي‑ن‑لّانين غ‑لحبس، تصبرم د‑ويلّي‑اون‑كّيسنين ايدا‑نّون، تفرحم اشكو تسّنم ءيس‑تطّافم كرا يوفن مايان، ا‑ت‑يگان د‑وايدا ءيدومن.

³⁵ ءيمّا غيلاد، ا‑ور‑دي‑توورّيم ف‑زّعامت‑ان گيگون ءيلّان، اشكو راد‑اون‑گيس‑تيلي لباراكا ءيگّوتن.

³⁶ ءيخصّا‑كُن ا‑تصبرم ارد تكمّلم كولّو ما‑گيگون‑يرا ربّي، تكشمّ تيگيرا س‑مايلّي‑س‑اون‑ينّا راد‑اون‑ييلي.

³⁷ اشكو ءينّا: «يان ءيميكّ را‑د‑يروح غوالّي را‑د‑ياشك، ءور‑را‑ن‑يماطل.

³⁸ وانّا يومنّ، نتّان ا‑ف‑راد‑رضوغ فكغ‑اس تودرت. والاينّي ءيغ‑يوورّي تيغوردين ءور‑راد‑اس‑ييلي رّضا‑نو.»

³⁹ ءيمّا نكُّني ءور‑نگي زغ‑ويلّي وورّينين تيغوردين تياوهلاكن، هاتي نگا زغ‑ويلّي ءومنّين نجمن.