iɛbrin 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تيموغرا لّماسيح

¹ ف‑يمي لّانبيا گّوتنين ا‑ف‑يساول ربّي س‑يمزوورا‑نّغ غايد ءيزرين، كرايگاتّ ازمز د‑ماد‑اسن‑يملا.

² ءيمّا غ‑ووسّان‑اد گُّرانين ءيساول‑د سرنّغ ف‑يمي ن‑يان ءيگان يوس. نتّان ا‑س‑يخلق كولّو ما‑يلّان، ءيژلي‑ت ا‑يوورت كرايگاتّ كرا.

³ ءيبان گيس لمجد ن‑ربّي، ءيگ صّورت ن‑رّوح‑نس، ءيحكام غ‑كولّو ما‑يلّان س‑تحكيمت ن‑واوال‑نس. غاكود لّيغ ءيسّيتّي دّنوب ف‑بنادم ءيسكيوس ف‑وفاسي ن‑ربّي لّمجد غ‑تاتّويت ن‑يگنوان.

لماسيح يوگُر لمالايكا

⁴ ءيگا‑ت ربّي د‑واد يوگُرن لمالايكا، ءيفك‑اس ءيسم لّي‑يوگُرن ءيسماون‑نسن.

⁵ اشكو ءورد كرا ن‑يان غ‑لمالايكا ا‑مي‑ينّا ربّي غ‑وارّا‑نس: «كيّي تگيت ءيوي. باباك اد‑گيغ غاسّاد.» ءورد كرا لّمالاك ا‑ف‑ينّا: «راد‑گغ باباس، ءيگ نتّا ءيوي.»

⁶ والاينّي ربّي، غاكود لّيغ را‑د‑يازن يوس ءيخفدّي س‑دّونيت ءينّا: «كولّو لمالايكا ن‑ربّي، ءيقّان‑تن‑د ا‑تي‑تعبادن.»

⁷ هاتي لمالايكا ا‑ف‑ينّا: «ربّي ءيسكر لمالايكا‑نس زوند اضو، ءيسكر ءيخدّامن‑نس زوند تيمزليوين لّعافيت.»

⁸ والاينّي لّيغ ءيساول ف‑يوس ءينّا: «لعرش‑نّك ا‑ربّي ا‑راد‑بدّا‑يدوم، ءور‑را‑سار‑يتمّو. ءيگا‑وعمود ن‑تگلديت‑نّك اعمود لّحقّ.

⁹ ار‑تّرضوت س‑وفولكي، ار‑تّكرهوت لخُشانت. مايان ا‑ف‑ك‑يژلي ربّي لّي‑يگان ربّي‑نّك س‑وژغور لّفرح ءيسّايك‑ك نّيگ ءينگّان‑نّك.»

¹⁰ ييني‑داغ فلّاس: «كيّي ا‑سيدي ربّي ا‑يزّوگزن لّساس ن‑دّونيت غ‑يسيزوار. ف‑وفوس‑نّك ا‑ف‑تياوسكارن ءيگنوان.

¹¹ نتني را‑تن‑كولّو‑لاح، ءيمّا كيّي راد‑بدّا‑تيليت. نتني راد‑كولّو‑مدون زوند تيملسيت، ءيمّا كيّي راد‑بدّا‑تقامات.

¹² را‑تن‑تسّموتّلت زوند اسلهام تكّيست‑تن، ءيمّا كيّي غمكلّي تگيت ا‑راد‑بدّا‑تگت. ءيسگُّاسن‑نّك ءور‑را‑سار‑تمّون.»

¹³ ءور‑جّو‑ينّي ربّي ءي‑كرا لّمالاك: «سكيوس ف‑وفاسيي‑ينو ارد گغ ءينوّاشن‑نّك غ‑دّو ءيضارن‑نّك.»

¹⁴ اشكو لمالايكا ءور‑گين غير لارواح لّي‑تخدامنين ءي‑ربّي، ار‑تن‑د‑يتازن اد‑قاسان غويلّي را‑ينجم.