گالاطيّا 6 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

صّابت ن‑وفولكي

¹ واي‑ايتما، ءيغ‑ن‑توفام كرا ن‑يان ءيضر غ‑ما‑يُخشنّ، ءيلّا فلّاون كونّي لّي‑غ‑تلّا لغلّت ن‑رّوح لقودوس ا‑ديدس‑تساولم س‑لحنانت ترارم‑ت س‑وغاراس. والاينّي اويات‑ستّ غ‑يخف‑نّون، ا‑ور‑تضرم ءولا كونّي.

² تمعاوانات ءي‑نگراتون غ‑اينّا فلّاون ءيژّاين. غمكاد ا‑س‑را‑تسّافاوم لوصيت لّماسيح.

³ والاينّي ءيغ‑يلّا ما‑يغالن ءيس‑يگا كرا، هاتي ءيسّكاركس ف‑يخف‑نس، اشكو ءور‑يگي يات.

⁴ ءيلّا ف‑كود يان ا‑يسوينگيم غ‑ما‑يسكار باش ا‑يژر ءيس‑يفولكي نغد ءوهو. ءيغ‑يفولكي راد‑اس‑ييلي ما‑س‑ا‑يتفراح د‑يخف‑نس بلا‑دا‑يتمناد غ‑ماد‑سكارن وييّاض.

⁵ اشكو كود يان را‑ياسي ما‑ت‑يد‑يوشكان.

⁶ كولّو وانّا ءيتلمادن اوال ن‑ربّي، ءيلّا فلّاس ا‑ياطّو لخير نّا‑دارس‑يلّان د‑ومسلمد‑نس.

⁷ اد‑ور‑تجلوم ءيخف‑نّون. ءور‑يژضار يان ا‑ستّ‑يزّري ف‑ربّي.

⁸ امود نّا‑ن‑تلوحم، نتّان ا‑را‑تمگرم. يان ءيسكارن س‑ما‑يتّيري‑وول ن‑بنادم، زغ‑وول‑نس ا‑زغ‑را‑يمگر لموت. ءيمّا يان ءيسكارن س‑ما‑يتّيري رّوح لقودوس، زغ‑رّوح ا‑زغ‑را‑يمگر تودرت ءيدومن.

⁹ ا‑ور‑نترماي غ‑وفولكي‑اد نسكار، اشكو را‑نمگر صّابت غ‑وزمز‑نس ءيغ‑ور‑نهروصّي.

¹⁰ ءيلّا فلّانّغ ا‑نسكار افولكي غ‑كولّو مدّن غاكود نّا‑نوفا، س‑وگُّار غ‑ايتماتنّغ لّي‑ومنّين س‑لماسيح.

¹¹ ژرات منشك ايد‑س‑مقّورنت تيرّا‑ياد‑اون‑ين‑وريغ نكّي س‑وفوس‑ينو.

¹² ءيمّا غويلّي‑اون‑يتّينين ا‑تژّالّم ءي‑دّات، ران نتني اد‑رضون مدّن س‑ما‑يگان وين دّات، باش ا‑ور‑رفوفنّ ف‑سّيبت ن‑وگّجدي لّماسيح.

¹³ ءيمّا ايت‑تژالّيت‑ان، ءولا نتني ءور‑ا‑سكارن كولّو ما‑يتياران غ‑شّرع، والاينّي ار‑گيگون‑تّيرين ا‑تژّالّم ءي‑دّات باش اد‑الغن ءيخف‑نسن ف‑ما‑يتياوسكارن ءي‑دّات‑نّون.

¹⁴ ءيمّا نكّي ءور‑راد‑الغّ ابلا اگّجدي ن‑سيديتنّغ ياسوع لماسيح. اشكو س‑وگّجدي لّماسيح ا‑س‑مّوتغ ءي‑دّونيت، ءيمّت‑يّي ما‑يگان وين دّونيت.

¹⁵ ءيمّا تاژالّيت ن‑دّات ءور‑تگي يات، زوند ءيغ‑اس‑تژّولّام زوند ءيغ‑اس‑ور‑تژّولّيم. والاينّي تاغاوسا ءيهيّان ا‑ستّ‑يگان تودرت لّجديد لّي‑دارون‑يلّان.

¹⁶ اد‑اون‑تيلي سّلامت ن‑ربّي د‑رّحمت‑نس ءي‑كولّو وينّا سكارنين س‑تنباطّ‑اد، ا‑تن‑يگان د‑ايت‑ربّي ن‑صّاحت.

¹⁷ ءيمّا غيلاد، ضالبغ‑اون ا‑ور‑سول‑يزايد يان ءي‑تكرّايين‑ينو. اشكو ءيبرّاين‑اد ءوسيغ غ‑دّات‑ينو، نتني تيميتار ن‑ياسوع اد‑گان.

¹⁸ ا‑گيگون‑تيلي لباراكا ن‑سيديتنّغ ياسوع لماسيح، اي‑ايتما. امين.