گالاطيّا 5 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لماسيح ءيرژم‑اغ زغ‑يسكراف

¹ ءيرژم‑اغ لماسيح باش ا‑ور‑سول‑نگ ءيسمگان ءي‑يات. بيدّات غيلاد تزگام ا‑ور‑توورّيم‑داغ س‑يسكراف ن‑تسموگيت.

² سفلدات‑يّي نكّي بولُس، راد‑اون‑ينيغ: ءيغ‑ترام ا‑تّغوسم س‑تژالّيت ن‑دّات ءور‑راد‑اون‑ييلي يات غ‑لماسيح.

³ را‑ت‑ينيغ‑داغ س‑لمعقول ءي‑كولّو وانّا ءيران ا‑يژّالّ ءي‑دّات‑نس، ءيغ‑تسكرت غمكان ءيقّان‑ك‑يد ا‑بدّا‑تسكارت س‑كولّو ما‑يتياران غ‑شّرع.

⁴ وا‑كونّي لّي‑يتّيرين ا‑ترضوم ربّي س‑شّرع، هاتي تسّنگارام ءيخف‑نّون د‑لماسيح، توورّيم تضرم زغ‑لباراكا‑نس.

⁵ ءيمّا نكُّني نسّن ءيس‑را‑فلّانّغ‑يرضو ربّي ف‑سّيبت ن‑ما‑نومن س‑لماسيح. غمكاد ا‑يگا رّجا ءيصحان لّي‑اغ‑يفكا رّوح لقودوس.

⁶ اشكو يان ءيگان وين لماسيح، هان تاژالّيت ن‑دّات ءور‑دارس‑تگي يات، زوند ءيغ‑اس‑يژّولّا زوند ءيغ‑اس‑ور‑يژّولّي. اشكو ءيلّا دارس ماد‑باهرا‑يوفن مايان. هاتي يومن س‑لماسيح، ءيعمّر س‑لحنانت‑نس.

⁷ تكّام‑تّين ار‑تّزايادم غ‑وغاراس لّماسيح. ءيمّا غيلاد ما‑كُن‑يحصارن ا‑ور‑سول‑تسكارم س‑لحقّ؟

⁸ ءيسوينگيمن‑ان ءور‑د‑كّين ربّي لّي‑اون‑يغران،

⁹ والاينّي تاخميرت ءيدروسن ا‑يسّكتاين لعجين ءيگّوتن.

¹⁰ ءيمّا نكّي ءومنغ گيگون ءيس‑ور‑را‑تسفليدم س‑كرا ن‑وسوينگيم ياضني، اشكو وين سيديتنّغ ا‑تگام. را‑يحكام نتّا ف‑والّي‑اون‑تّ‑يسّطيّرن، وانّا را‑يگ‑ييت.

¹¹ واي‑ايتما، ءورد نكّين ا‑يتّينين ءي‑مدّن «ءيقّان‑كُن‑د ا‑تژّالّم ءي‑دّات‑نّون». ماياد ا‑ف‑ا‑يّي‑سول‑سّرفوفونّ. اشكو مراد ءيس‑ا‑ياسن‑تّينيغ غمكان، ءور‑را‑يّي‑يتژي يان غاكود نّا‑تبرّاحغ ف‑وگّجدي لّماسيح.

¹² ءيمّا مدّن‑ان لّي‑كُن‑يسّندوديين، امار يوفان اد‑بّين ءيگيوّال‑نسن كولّوت.

¹³ واي‑ايتما، ءيغرا‑ياون ربّي ا‑ترژمّ زغ‑يسكراف. والاينّي ا‑ور‑تّينيم «نتياورژام غيلاد، نژضار ا‑نسكار اينّا ءيرا ءيخف‑نّغ.» اشكو ءيلّا فلّاون ا‑تّحنّوم ار‑تّقاسام ءي‑نگراتون.

¹⁴ هاتي تمون‑د لمعنا ن‑شّرع كولّوتّ غ‑يان‑واوال ار‑يتّيني: «ا-تّيريت ادجار‑نّك زوند ءيخف‑نّك.»

¹⁵ والاينّي ءيغ‑ا‑تّلبايم ءي‑نگراتون ار‑تشتّام تيفيّي ن‑ينگراتون، هان را‑تهلكم ءي‑نگراتون.

رّوح ن‑ربّي ءولا ءول ن‑بنادم

¹⁶ والاينّي راد‑اون‑ينيغ، سكارات‑بدّا س‑ماد‑اون‑يمالا رّوح لقودوس بلا‑دا‑تسوينگيمّ غ‑ما‑يتّيري ءيخف‑نّون.

¹⁷ اشكو ءول ن‑بنادم ار‑يتّيري ما‑ور‑يتّيري رّوح لقودوس، ءولا رّوح لقودوس ار‑يتّيري ما‑ور‑يتّيري‑وول ن‑بنادم. هاتني ار‑گيگون‑تمّاغن ايلّيغ ءور‑ا‑تسكارم ما‑تّيريم.

¹⁸ والاينّي ءيغ‑ا‑تسكارم ماد‑اون‑يمالا رّوح لقودوس، ءور‑را‑سول‑تقامام غ‑يسكراف ن‑شّرع.

¹⁹ هان ءيسكّيرن ن‑بنادم، نسّن مامنك اد‑گان. ار‑تزنون ار‑تفسادن ار‑تشتهون ءي‑نگراتسن،

²⁰ ار‑تعبادن ءيلاهات ن‑دّونيت‑اد ار‑سكارن سّيحر، ار‑تكرهون ار‑تژين ار‑تنوّاشن ار‑تبزاگن ف‑ينگراتسن، ار‑تّيرين اد‑اگُرن وييّاض، ار‑تمّاغن د‑وانّا ءور‑زگيسن‑يگين، ار‑رگّمن وانّا ءور‑ديدسن‑يبيدّن،

²¹ ار‑تّيرين اد‑امژن ما‑ور‑يگين وينسن، ار‑تنوفولن س‑تيسّي ار‑تمونون ف‑تيلّاي‑نسن أُخشنّين، كولّو ءيسكّيرن‑اد د‑ما‑تن‑يرواسن. راد‑اون‑ينيغ س‑لمعقول غمكلّي‑اون‑نّيغ غايد ءيزرين، غويلّي سكارنين غمكان ءور‑راد‑كشمن س‑تگلديت ن‑ربّي.

لغلّت ن‑رّوح لقودوس

²² ءيمّا لغلّت ن‑رّوح تگا لحنانت د‑لفرح د‑لهنا د‑صّبر، ار‑نتعاوان وييّاض ار‑ديدسن‑نتفولكي ار‑ديدسن‑نتبدّاد

²³ ار‑ديدسن‑نترخو ار‑بدّا‑نقُّاي غ‑يخف‑نّغ. هاتي وان تيغاوسيوين‑اد، ءور‑يلّي كرا ن‑شّرع تنت‑ياگُين.

²⁴ اشكو كولّو وانّا ءيگان وين لماسيح ياسوع، ءيگا ءيخف‑نس د‑واد ءيمّوتن ف‑وگّجدي باش ا‑گيس‑يمّت كولّو ما‑يتّيري بنادم ءي‑يخف‑نس ءولا كولّو ما‑يُخشنّ.

²⁵ ءيمّا غيلاد غ‑ندّر س‑تحكيمت ن‑رّوح لقودوس، ءيلّا فلّانّغ ا‑نسكار س‑ماد‑اغ‑يمالا رّوح لقودوس.

²⁶ ا‑ور‑نسّيمغور ءيخف‑نّغ ءولا‑دا‑نتژي د‑يان ءولا‑دا‑نتّيري ما‑يگان وين وييّاض.