گالاطيّا 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ والاينّي غمكاد ا‑يگا كولّو وانّا يوورتن. لّيغ سول ءيمژّي، ءيگ زوند ءيسمگ غ‑تگمّي ن‑باباس، واخّا را‑يطّاف كولّو ايدا ن‑باباس تيگيرا.

² اشكو ءيلّا سول غ‑دّو‑وفوس ن‑ويلّي‑ت‑يگابلن د‑ويلّي دار ءيفل باباس لامانت لّوورت‑نس، ارد ءيروح‑وزمز لّي‑ف‑يقصاد باباس ا‑ت‑گيس‑يامژ.

³ ءولا نكُّني نكّا‑تّين نگا غمكان. غاكود لّيغ سول نمژّي، نگا زوند ءيسمگان غ‑دّو‑سّولطا لّارواح ن‑دّونيت‑اد.

⁴ والاينّي غاكود لّيغ‑د‑يروح‑وزمز، ربّي يوزن‑د يوس س‑دّونيت. ءيلول‑د زغ‑واحليگ ن‑يات‑تمغارت، يوورّي ييلي ءولا نتّا غ‑دّو شّرع،

⁵ باش ا‑يفوكّو وينّا لّانين غ‑دّو شّرع ءيرار‑اغ ا‑نگ تاروا ن‑ربّي.

⁶ غمكاد اد‑اغ‑يملان ءيس‑نگا تاروا ن‑ربّي، اشكو يوزن‑د رّوح ن‑يوس ءيزدغ غ‑وولاون‑نّغ، ءيرار‑اغ ا‑سرس‑ناقرا: «ابّا، وا‑بابا.»

⁷ هاتي ءور‑سول‑تگيم ءيسمگان، والاينّي توورّيم تگام تاروا ن‑ربّي. د‑وانّا ءيگان زغ‑تاروا ن‑ربّي، را‑يوورت لباراكات ن‑ربّي.

بولُس يوسي تاغوفت ف‑ايت‑گالاطيّا

⁸ غايد ءيزرين ءور‑تسّينم ربّي. تكّام‑تّين تگام ءيسمگان ءي‑كرا لّقوّات لّي‑ور‑گينين ربّي.

⁹ ءيمّا غيلاد غ‑تسّنم ربّي (نغد يوف اد‑ينيغ، غيلاد غ‑كُن‑يسّن ربّي)، ماخ ايلّيغ ترام ا‑توورّيم‑داغ تگم ءيسمگان ءي‑لارواح‑ان لّي‑ور‑گينين يات ءولا ژضارن اد‑سكرن يات؟

¹⁰ هان توورّيم غيلاد ار‑تسكارم ف‑ووسّان لّعيد‑نسن د‑ييرن‑نسن د‑يزماز‑نسن د‑يسگُّاسن‑نسن.

¹¹ ها‑يّي ءوسيغ فلّاون تاغوفت. ءيزد بلا لفايتّ اد‑خدمغ نهاتافغ غ‑گراتون؟

¹² واي‑ايتما، ضالبغ زغ‑گيگون ا‑ديدي‑تبيدّم غمكلّي‑بدّا‑ديدون‑تبدّادغ. غايد ءيزرين ءور‑جّو‑گيگي‑تسكيرم كرا يُخشنّ.

¹³ تسّنم ءيزد ف‑سّيبت ن‑ماد‑وضنغ ا‑ف‑ن‑دارون‑وشكيغ غ‑يسيزوار، اويغ‑اون‑ين لخبار ءيفولكين.

¹⁴ واخّا فلّاون تشقا‑تماضونت‑ينو، ءور‑يّي‑تحگيرم ءولا ترورم‑يّي، والاينّي تشّكشمّ‑يّي‑ن س‑دارون تفرحم سري زوند ءيغ‑گيغ يا‑لّمالاك زغ‑دار ربّي، زوند‑نّيت ءيغ‑گيغ لماسيح ياسوع.

¹⁵ ما‑س‑يگُّرا لفرح‑نّون لّي‑س‑سري‑تفرحم؟ سّنغ غ‑ووسّان‑ان مراد ءيس‑تژضارم ا‑تسّوكفم الّن‑نّون ءيكون تفكام‑يّي‑تنت.

¹⁶ ءيمّا غيلاد ءيس‑يّي‑تگام د‑ونوّاش‑نّون ف‑سّيبت ن‑ماد‑اون‑نّيغ لحقّ؟

¹⁷ مدّن‑ان ار‑تّ‑گيگون‑تاوين باهرا، والاينّي ءورد ف‑كرا ءيفولكين. ءور‑رين ابلا ا‑كُن‑ديدي‑سّنگاران، باش ا‑ستّ‑گيسن‑تّاويم غير نتني.

¹⁸ ءيشوا ا‑ستّي‑تاويم غ‑كرا، ءيغ‑يگا كرا ءيفولكين. ءيشوا‑بدّا، زوند ءيغ‑ن‑ديدون‑لّيغ زوند ءيغ‑فلّاون‑اگّوگغ.

¹⁹ وا‑تاروا‑نو عزّانين، ها‑يّي غيلاد گيغ زوند تامغارت لّي‑را‑يارو، ءيزري‑فلّا‑ونگاژ ن‑تلاليت‑نّون ارد گيگون تيمغور‑تحكيمت لّماسيح.

²⁰ امار يوفان ا‑ن‑ديدون‑يليغ غيلاد، ساولغ‑اون ف‑واوال ياضني. هاتي ءوسيغ فلّاون تاغوفت باهرا.

لمعنا ن‑هاجار ءولا سارا

²¹ وا‑كونّي لّي‑يران ا‑تسكارم كولّو س‑شّرع، را‑كُن‑سقساغ ف‑شّرع: ءيس‑ور‑تسّينم ما‑گيس‑يتياران؟

²² ءيملا‑ياغ ف‑يبراهيم ءيس‑دارس سين تاروا، يان تورو‑ت‑تسمگت‑نس د‑يان تورو‑ت‑تمغارت‑نس.

²³ يوس ن‑تسمگت، تورو‑ت غمكلّي تارونت‑توتمين، ءيمّا يوس ن‑تمغارت‑نس، تورو‑ت ف‑سّيبت ن‑يان‑واوال لّي‑ينّا ربّي ءي‑يبراهيم.

²⁴ مايد ءيجران، تلّا‑ياس يات لمعنا ءينتلن. اشكو سنات‑تمغارين‑ان رواسنت ءي‑سين ءيد‑لعهد. ختالّي يورون ءيسمگان، تگا لمعنا‑نس زوند لعهد ن‑شّرع لّي‑يتياوسكارن غ‑ودرار ن‑سينا. نتّات تگا تيسمگت هاجار.

²⁵ تگا لمعنا ن‑هاجار زوند ادرار ن‑سينا لّي‑يلّان غ‑تمازيرت ن‑واعرابن، تگ زوند تامدينت ن‑وروشاليم د‑يمزدغن‑نس لّي‑گانين ءيسمگان.

²⁶ ءيمّا تايّاض تگا زوند ءوروشاليم ياضني لّي‑يگان تين ءيگنّا. نتّات تگا ءينّاتنّغ سارا، ءور‑اكُّ‑تگي تيسمگت.

²⁷ اشكو ءيتيارا: «وا‑تامغارت لّي‑ور‑جّو‑يورون، وا‑كمّي لّي‑ف‑ور‑جّو‑يزري‑ونگاژ، نكر غيلاد تفرحت ار‑تسّغروتّ. اشكو كمّي لّي‑ن‑يفل‑ورگاز را‑تاروت ءوگُّار ن‑تالّي ءيطّافن ارگاز.»

²⁸ كونّي اي‑ايتما، تگام زوند ءيسحاق، تلولم ف‑سّيبت ن‑واوال ن‑ربّي.

²⁹ والاينّي غمكلّي ءينكر غوالّي ءيلولن زوند كولّو مدّن ار‑يسّرفوفون غوالّي ءيلولن س‑رّوح ن‑ربّي، غمكان اد‑سكارن مدّن ءولا غيلاد.

³⁰ ما‑يتّيني‑وارّا ن‑ربّي؟ ار‑يتّيني: «سّمسر تيسمگت نتّات د‑يوس، اشكو يوس ن‑تسمگت ءور‑را‑يطّاف تاغامت غ‑لوورت ن‑باباس. را‑يگ لوورت كولّوت وين يوس ن‑تالّي ءيگان تامغارت بلا ءيسكراف.»

³¹ ءيمّا غيلاد اي‑ايتما، ما‑را‑نيني؟ ءورد تاروا ن‑تسمگت ا‑نگا، والاينّي نگا تاروا ن‑تمغارت لّي‑ور‑جّو‑دار ءيسكراف.