گالاطيّا 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

شّرع ءولا لحوكم ن‑ربّي

¹ وا‑كونّي ن‑ايت‑گالاطيّا، ءيزد تفّوغم ءيخف‑نّون؟ ءيس‑كُن‑يسّنوفل كرا ن‑يان؟ نملا‑ياون يادلّي مامنك ا‑يمّوت ياسوع لماسيح ف‑وگّجدي، تيسّانم‑ت باهرا.

² ءيمّا غيلاد را‑كُن‑سقساغ، ءيزد ف‑سّيبت ن‑ما‑تسكارم س‑شّرع ن‑موسا ا‑ف‑اون‑ين‑يوشكا رّوح لقودوس، نغد ف‑سّيبت ن‑ما‑تسفلدم ءي‑لخبار‑نّغ ءيفولكين تامنم سرس؟

³ ءيس‑نّيت‑تفّوغم ءيخف‑نّون؟ تگرام غ‑تودرت‑اد لّجديد س‑تحكيمت ن‑رّوح لقودوس، ءيمّا غيلاد ءيس‑ترام ا‑گيس‑تزايدم س‑يسكّيرن ن‑بنادم؟

⁴ ءيس‑ور‑يگي يات، كولّو مايلّي دارون ءيجران غايد زرينين؟

⁵ ءيزد ف‑سّيبت ن‑ما‑تسكارم س‑شّرع ا‑ف‑اون‑ياكّا ربّي رّوح لقودوس ار‑دارون‑يسكار لمعجيزات، نغد ف‑سّيبت ن‑ما‑تسفلدم ءي‑لخبار ءيفولكين تامنم سرس؟

⁶ ءولا ءيبراهيم، ءيتيارا فلّاس: «يومن ربّي، مايان ا‑ف‑ت‑يگا ربّي د‑واد ف‑يرضا.»

⁷ ريغ ا‑تيسّانم ماياد. ايت‑يبراهيم، ا‑تن‑يگان د‑ويلّي ءومنّين.

⁸ اشكو ءيتيارا غ‑وارّا ن‑ربّي ف‑مامنك ا‑را‑يرضو ربّي ءولا ف‑ايت‑تميزار اگّوگنين ف‑سّيبت ماد‑ومنّ. ءيساول ربّي س‑يبراهيم ءيمل‑اس لخبار ءيفولكين لّي‑را‑ييلي ييني‑اس: «س‑يسم‑نّك ا‑س‑راد‑باركغ كولّو تيميزار ن‑دّونيت.»

⁹ غمكاد ا‑س‑نسّن ءيس‑را‑يبارك ربّي كولّو وانّا يومنّ غمكلّي ءيبارك ءيبراهيم لّي‑يومنّ.

¹⁰ كولّو ويلّي ءيتّيرين اد‑رضون ربّي س‑يسكّيرن ن‑شّرع، هاتي غ‑دّو لحوكم ا‑غ‑سول‑قامان. اشكو ءيتيارا: «ربّي را‑يوت لحوكم س‑جهنّاما ف‑كرايگاتّ يان ءور‑يسكارن س‑كولّو ما‑يتياران غ‑وارّاتن ن‑شّرع.»

¹¹ ءيملا‑ياغ‑واوال‑اد ءيس‑ور‑يژضار يان ا‑يرضو ربّي س‑يسكّيرن ن‑شّرع، والاينّي ءيتيارا‑داغ ءينّا ربّي: «وانّا يومنّ، نتّان ا‑ف‑راد‑رضوغ فكغ‑اس تودرت.»

¹² وانّا ءيبنّون ف‑شّرع، ءور‑ا‑يتاوي رّجا س‑ما‑يومن، اشكو غمكلّي ءيتياران: «يان ءيسكارن كولّو س‑يسكّيرن‑اد، راد‑اس‑يفك ربّي تودرت ف‑سّيبت‑نسن.»

¹³ ءيمّا لماسيح ءيفوكّا‑ياغ زغ‑لعقوبيت لّي‑را‑يضر ف‑ويلّي ءيبنّون ف‑شّرع. يوورّي ءيگا نتّا واد‑ف‑تضر لعقوبيت، باش ا‑ور‑فلّانّغ‑تضر نكُّني. اشكو ءيتيارا: «كولّو وانّا ءيتياگّالن ف‑وگّجدي، لعقوبيت ن‑ربّي ا‑فلّاس‑يلّان.»

¹⁴ ءيمّوت لماسيح ياسوع باش اد‑كشمن ءولا ايت‑تميزار اگّوگنين س‑لباراكا لّي‑ف‑ينّا ربّي ءي‑يبراهيم، نامژ كولّواغ رّوح لقودوس لّي‑ف‑ينّا ربّي راد‑اغ‑ت‑يفك. كولّو ماياد راد‑اغ‑ييلي ف‑سّيبت ن‑ما‑نومن.

امود ن‑يبراهيم

¹⁵ واي‑ايتما، نسّن ماد‑سكارن مدّن ءيغ‑د‑مشاشكان ف‑كرا ن‑تغاوسا. ار‑اكّان لعهد ءي‑نگراتسن. ءيغ‑سكرن لعهد، ءور‑يژضار يان ا‑يانف ءي‑لعهد‑ان ءولا‑ياس‑يزايد كرا.

¹⁶ غايد ءيزرين ار‑يساوال ربّي س‑يبراهيم ار‑اس‑يتّيني ف‑ما‑راد‑اس‑يفك ءي‑يبراهيم، نتّا د‑وامود‑نس. ءور‑اس‑ينّي «را‑ت‑فكغ ءي‑يمادن‑نّك» زوند ءيغ‑گان مدّن گّوتنين، والاينّي ءينّا‑ياس «را‑ت‑فكغ ءي‑وامود‑نّك» ءيگان يان ءيگ لماسيح.

¹⁷ لمعنا‑ياد، ريغ اد‑اون‑سرس‑ملغ ماياد. ربّي ءيفكا يا‑لّعهد ءي‑يبراهيم، ييني‑اس راد‑اس‑ت‑يزّگا. زرين كّوژ ءيد‑ميّا د‑كراض ءيد‑مراو (430) ن‑وسگُّاس، ءيفك ءيلمّا ربّي شّرع ءي‑مدّن‑نس. والاينّي ءور‑يژضار شّرع ن‑موسا ا‑يسّانف ءي‑لعهد لّي‑ت‑يد‑يزوارن، ءولا ءيژضار ا‑يكّيس اوال لّي‑س‑ياد‑ينّا ربّي ءي‑يبراهيم.

¹⁸ اشكو ربّي، مراد ءيس‑يفكا لوورت‑نس غير ءي‑ويلّي سكارنين س‑شّرع، ءيكون ءور‑اكُّ‑يقاما غ‑واوال لّي‑س‑ياد‑ينّا ءي‑يبراهيم. والاينّي ءورد غمكان ا‑يسكر ربّي، اشكو س‑واوال‑نس ءيزگان ا‑س‑يفكا لوورت ءي‑يبراهيم.

¹⁹ ءيمّا غيلاد ما‑را‑نيني ف‑شّرع؟ ماخ ايلّيغ‑ت‑يد‑يزوويد ربّي ءي‑مدّن‑نس؟ ءيزوويد‑اسن‑ت باش اد‑اسن‑يمالا دّنوب لّي‑سكارن. ءيقاما شّرع غير ار اكود لّيغ‑د‑يوشكا‑وامود ن‑يبراهيم لّي‑ف‑ياد‑ينّا ربّي. ف‑وفوس لّمالايكا ا‑ف‑اسن‑يفكا شّرع، د‑نتني سّبايّنّ‑ت‑يد ءي‑موسا، د‑نتّا ءيسّبايّن‑ت‑يد ءي‑وييّاض.

²⁰ والاينّي اوال لّي‑يفكا ربّي ءي‑يبراهيم، ءيفكا‑ياس‑ت غ‑گراس ديدس، ءور‑ت‑يخصّا يان ياضني.

لوورت لّي‑يتياوفكان ءي‑ويلّي ءومنّين

²¹ ءيمّا غيلاد ما‑را‑نيني؟ ءيس‑يسّونف شّرع ءيواليون ن‑ربّي لّي‑س‑ياد‑ينّا ءي‑يبراهيم؟ ءوهو، ءور‑ت‑يسّونف. اشكو بنادم، مراد ءيس‑اس‑يتياوفكا كرا ن‑شّرع ما‑س‑ا‑يتطّاف تودرت، را‑يرضو ربّي ف‑كرايگاتّ يان ءيسكارن س‑شّرع.

²² والاينّي ارّاتن ن‑ربّي ار‑مالان مامنك ا‑تّياماژ دّونيت كولّوتّ غ‑دّو لحوكم ن‑دّنوب. ءيمّا لوورت لّي‑ف‑ينّا ربّي ءي‑يبراهيم، ار‑ت‑ياكّا ءي‑ويلّي ءومنّين س‑ياسوع لماسيح، ار‑اسن‑ت‑ياكّا غيلاد ف‑سّيبت لّيمان‑نسن.

²³ غ‑وزمز لّي‑غ‑ور‑تا‑د‑يوشكي لماسيح ءور‑تا‑سرس‑نومين، نتياوكرّاف سول س‑يسكراف ن‑شّرع. ار‑اغ‑تحصارن‑وارّاتن ن‑شّرع ار كيغ‑د‑يلكم‑وزمز‑اد غ‑نومن س‑لماسيح.

²⁴ ءيكّا‑تّين ءيگا شّرع انگابال فلّانّغ، ار‑اغ‑يتربّا ايلّيغ‑د‑يوشكا لماسيح ءيسكر سّلامت غ‑گر ربّي د‑ويلّي سرس ءومنّين.

²⁵ ءيمّا غيلاد غ‑د‑يلكم‑وزمز لّيمان، ءور‑سول‑يگي شّرع انگابال‑نّغ.

²⁶ ها‑كونّي كولّوكن، تاروا ن‑ربّي ا‑تگام ف‑سّيبت ن‑ما‑تومنم س‑لماسيح ياسوع.

²⁷ اشكو كولّو وانّا گيگون ءيدّمن س‑ودوم ن‑وامان باش ا‑يمل ءيس‑يگا وين لماسيح، هاتي يوورّي ءيدّر س‑تودرت لّماسيح.

²⁸ ماياد ا‑ف‑ور‑ا‑سول‑نژّمژلاي گو‑يودايا زغ‑گو‑يونان، ءولا‑دا‑نژّمژلاي اوتم زغ‑تاوتمت ءولا ءيسمگ زغ‑واد‑يگان وين ءيخف‑نس، اشكو تگام كولّو يان غ‑لماسيح ياسوع.

²⁹ والاينّي لّيغ تگام وين لماسيح، هاتي ايت‑يبراهيم ا‑تگام. را‑تامژم لوورت لّي‑ف‑اس‑ينّا ربّي را‑ت‑يفك ءي‑تاروا‑نس.