گالاطيّا 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

امشاشكا ن‑بولُس د‑يرقّاسن ياضني

¹ زرين كّوژ د‑مراو ن‑وسگُّاس س‑وورّيغ س‑وروشاليم نكّي د‑بارنابا، اويغ ديدي تيطوس.

² ءيملا‑يّي ربّي ءيس‑يّي‑د‑يقّان اد‑دّوغ س‑غين. مناگّارغ غاكودان د‑ويلّي مي تّينين ءينمغورن. نّيغ‑اسن غ‑گريّي ديدسن ف‑مامنك ا‑يگا‑واوال لّخبار ءيفولكين لّي‑س‑ا‑تبرّاحغ غ‑دار ايت‑تميزار اگّوگنين، اشكو كسوضغ ا‑ور‑را‑تيلي لفايتّ غ‑ماد‑سكرغ ءولا غ‑مايد سول سكارغ.

³ ءيمّا نتني ءور‑اغ‑وصّان ا‑نژّالّ ءي‑دّات ن‑وسمون‑ينو تيطوس واخّا ءيگا گو‑يونان.

⁴ والاينّي لّان غين كرا ن‑مدّن سكرن زوند ءيغ‑گان ايتماتنّغ، كشمن دارنّغ س‑تنتلا، ءيرين اد‑ژرن مامنك ا‑نسكار غيلاد غ‑اغ‑يرژم لماسيح زغ‑يسكراف ن‑شّرع. ار‑تّيرين اد‑اغ‑كرسن‑داغ زوند ءيسمگان.

⁵ ءيمّا نكُّني ءور‑اكُّ‑نقبيل يات غ‑مايلّي‑اغ‑تّينين، باش ا‑ور‑فلّاون‑كّيسن لحقّ لّخبار ءيفولكين.

⁶ ءيمّا غويلّي‑ف‑ا‑تّينين مدّن زوند ءيغ‑گان كرا (واخّا ءور‑يّي‑يهمّا ماد‑گان اشكو ربّي ءور‑ا‑يسكار س‑وودماون)، نتني ءور‑يّي‑نّين كرا ن‑وسوينگيم ياضني.

⁷ والاينّي ژران ءيس‑يّي‑يفكا ربّي اد‑سّلكمغ لخبار ءيفولكين ءي‑ايت‑تميزار ياضني، غمكلّي ءيفكا ءي‑بطرُس ا‑ت‑يسّلكم ءي‑ايت‑يودايا.

⁸ اشكو ربّي لّي‑يتخدامن غ‑بطرُس باش ا‑يگ ارقّاس ءي‑ايت‑يودايا، ار‑گيگي‑يتخدام ءولا نكّي باش اد‑گغ ارقّاس ءي‑ايت‑تميزار ياضني.

⁹ ءيمّا ياعقوب د‑بطرُس د‑يوحانّا لّي‑مي‑تّينين مدّن ءينمغورن، لّيغ ژران ماياد، مدين‑اغ‑د افوس‑نسن افاسي نكّي د‑بارنابا. مشاشكان‑د ديدنّغ ا‑نتمعاوان ءي‑نگراتنّغ، ار‑نتخدام نكُّني غ‑تميزار ياضني ار‑تخدامن نتني غ‑دار ايت‑يودايا.

¹⁰ ءور‑گينّغ‑رين ابلا يات‑تغاوسا. ران گينّغ ا‑ستّ‑نتاوي غ‑يمژلاض لّي‑دارسن‑يلّان. ءيمّا نكّي سوانگمغ يادلّي ف‑مايان، ءيريغ باهرا ا‑ت‑سكرغ.

بولُس ءور‑يفرح س‑ما‑يسكر بطرُس

¹¹ والاينّي غاكود لّيغ‑د‑يوشكا بطرُس س‑تمدينت ن‑انطاكيّا، نكرغ سرس غ‑لگدّام ن‑ايتماتن، اشكو ءور‑ا‑يسكار س‑لحقّ.

¹² نتّا غ‑يسيزوار ار‑يشتّا د‑ايتماتن ن‑تميزار ياضني، والاينّي غاكود لّيغ‑د‑وشكان كرا ن‑يمدّوكُّال ن‑ياعقوب، يوورّي بطرُس ءور‑ا‑سول‑يشتّا د‑مدّن‑ان ءولا‑دا‑ديدسن‑يتمونو، اشكو ءيكسوض زغ‑ويلّي ءور‑يتقبالن وينّا ءور‑ژّولّينين ءي‑دّات‑نسن.

¹³ غاكودان نكرن وييّاض ن‑ايت‑يودايا سكرن سين‑وودماون غمكلّي ءيسكر بطرُس، ايلّيغ‑تن‑يتابعا ءولا بارنابا.

¹⁴ ءيمّا نكّي، لّيغ ژريغ ءور‑ا‑تامژن غ‑لحقّ لّخبار ءيفولكين، ساولغ س‑بطرُس غ‑لگدّام‑نسن كولّوتن نّيغ‑اس: «كيّي گو‑يودايا ا‑تگيت، والاينّي تميارت ا‑تسكارت زوند ايت‑تميزار ياضني ءورد ايت‑يودايا. مامنك غيلاد ا‑تريت ا‑تّينيت ءيقّان‑د ايت‑تميزار ياضني اد‑سكارن س‑شّرع ن‑ايت‑يودايا؟»

تودرت لّجديد ف‑سّيبت لّموت لّماسيح

¹⁵ ها‑نكُّني لاصل‑نّغ ءيگا زغ‑ايت‑يودايا، ءورد زغ‑ايت‑تميزار ياضني لّي‑مي‑تّينين ‹ايت‑دّنوب›.

¹⁶ والاينّي نسّن تاغاوسا‑ياد باهرا. را‑يرضو ربّي ف‑وينّا ءومنّين س‑ياسوع لماسيح، ءورد ف‑ويلّي سكارنين س‑ما‑يتياران غ‑شّرع ن‑موسا. ماياد ا‑س‑اغ‑د‑يقّان ءولا نكُّني ن‑ايت‑يودايا ا‑نامن س‑ياسوع لماسيح. ف‑سّيبت لّماسيح ا‑ف‑فلّانّغ‑يرضا ربّي، ءورد ف‑سّيبت ن‑كرا نسكار ءيگان وين شّرع. اشكو ءور‑يژضار يان ا‑يرضو ربّي س‑يسكّيرن ن‑شّرع.

¹⁷ والاينّي غيلاد غ‑ا‑نترجو ا‑فلّانّغ‑يرضو ربّي ف‑سّيبت لّماسيح، ما‑را‑نيني ءيغ‑ا‑سول‑نتافا دّنوب غ‑يخف‑نّغ زوند ايت‑تميزار‑ان ياضني؟ ءيس‑ا‑ياغ‑يفال لماسيح ا‑نتزاياد غ‑دّنوب؟ ءوهو، ءورد غمكان ا‑نگا.

¹⁸ اشكو مراد ءيس‑ا‑بنّوغ ف‑غايلّي خُليغ، را‑گيگي‑يبان ءيزد دّنوب اد‑سكارغ.

¹⁹ والاينّي گيغ غيلاد زوند ءيغ‑يّي‑ينغا شّرع مّتغ‑اس، باش اد‑د‑نكرغ دّرغ ءي‑ربّي.

²⁰ ها‑يّي مّوتغ د‑لماسيح ف‑وگّجدي‑نس. ءورد سول نكّي ا‑يدّرن والاينّي لماسيح ا‑گيگي‑يدّرن. كولّو ماد‑سكارغ غيلاد، ار‑ت‑سكارغ ف‑سّيبت ن‑ماد‑ومنغ س‑يوس ن‑ربّي لّي‑گيگي‑يحنّان ءيفك تودرت‑نس فلّا.

²¹ ءور‑رورغ لحنانت‑اد ن‑ربّي زوند ءيغ‑ور‑تگي يات. اشكو مراد ءيس‑نژضار ا‑نرضو ربّي س‑يسكّيرن ن‑شّرع، بلا لفايتّ ا‑را‑تگ لموت لّماسيح.