گالاطيّا 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑بولُس ءيگان ارقّاس س‑ترقّاست لّي‑ور‑يگين تين بنادم ءولا ژلين‑يّي سرس مدّن، والاينّي ءيژلي‑يّي سرس ياسوع لماسيح د‑ربّي باباتنّغ لّي‑ت‑يد‑يسّنكرن زغ‑لموت.

² زغ‑گيگي نكّي د‑ايتماتن لّي‑ديدي‑يلّان، ءي‑يمناگّارن غ‑تمازيرت ن‑گالاطيّا.

³ اد‑اون‑تيلي لباراكا د‑سّلامت زغ‑ربّي باباتنّغ د‑سيديتنّغ ياسوع لماسيح.

⁴ نتّان ا‑يفكان ءيخف‑نس، ءيمّت باش اد‑اغ‑يجّنجم زغ‑دّنوب‑نّغ. ءيفوكّو‑اغ زغ‑دّونيت‑اد يُخشنّ غمكلّي ءيرا ربّي باباتنّغ.

⁵ ار‑ت‑باهرا‑نتالغ، غيلاد ءولا كولّو مايد‑د‑يفتان، امين.

لخبار ءيفولكين لّماسيح

⁶ ءيمّا كونّي، ءيضر‑يّي لعجب گيگون. اشكو غير يات لوقت ءيدروسن ايد تزّريم س‑تفلم ربّي لّي‑اون‑يغران س‑لباراكا لّماسيح. توورّيم س‑يان‑وغاراس ياضني، ار‑اس‑تّينين كرا ن‑مدّن ‹لخبار ءيفولكين›

⁷ والاينّي ءورد لخبار ءيفولكين ايان. سّنغ ءيس‑لّان كرا ن‑مدّن غ‑دارون ار‑اون‑تّ‑سّطيّارن، ءيرين ا‑تبدّالن لخبار ءيفولكين لّماسيح س‑تكركاس.

⁸ والاينّي ءيغ‑ن‑يوشكا كرا ن‑يان ار‑اون‑يمالا كرا مي ءيتّيني ‹لخبار ءيفولكين› ءور‑يگين لخبار لّي‑اون‑ين‑نيوي غ‑يسيزوار، را‑فلّاس‑ينيغ «ا‑ت‑يهلك ربّي» واخّا نكّي نغد كرا لّمالاك زغ‑يگنوان.

⁹ ننّا‑ياون غايد ءيزرين، ءينيغ‑اون‑داغ غيلاد: ءيغ‑ن‑يوشكا كرا ن‑يان ار‑اون‑يمالا كرا مي ءيتّيني ‹لخبار ءيفولكين› ءور‑يگين لخبار ءيفولكين لّي‑تومژم زغ‑يسيزوار، هاتي نّيغ فلّاس «ا‑ت‑يهلك ربّي.»

غمكاد ا‑يگرا بولُس غ‑تبرّاحت س‑لماسيح

¹⁰ ما‑تغالم كونّي؟ ءيزد مدّن اد‑ريغ اد‑فلّا‑رضون، نغد ربّي؟ ءيزد مدّن اد‑ريغ ا‑يّي‑تالغن؟ ءوهو، مراد ءيس‑ريغ ا‑يّي‑تالغن مدّن ءور‑راد‑گغ اخدّام لّماسيح.

¹¹ واي‑ايتما، ريغ ا‑تيسّانم ماياد. ءورد زغ‑بنادم ا‑زغ‑د‑يوشكا لخبار ءيفولكين لّي‑س‑ا‑تبرّاحغ.

¹² اشكو ءور‑ت‑ومژغ دار مدّن ءولا سّلمدن‑يّي‑ت مدّن، والاينّي ءيسّبايّن‑يّي‑ت‑يد ياسوع لماسيح.

¹³ تسفلدم كونّي ف‑مامنك ا‑ستّين‑كّيغ ار‑باهرا‑سكارغ س‑تنباضين ن‑ايت‑يودايا، ار‑سّرفوفونغ ايتماتن ن‑ومناگّار ن‑ربّي س‑ترفوفنت ءيشقان، ار‑ن‑تگّاغ تيقّي‑نو اد‑هلكغ امناگّار ا‑ور‑سول‑يقاما.

¹⁴ غ‑ووسّان‑ان زوارغ ما‑يگّوتن غ‑ينگّان‑ينو ن‑ايت‑يودايا، اشكو عزّانت داري باهرا لعادات ن‑يمزوورا‑نّغ لّي‑زرينين.

¹⁵ والاينّي ربّي لّي‑يّي‑يژلين لّيغ ءور‑تا‑لولغ، ءيحنّا گيگي ءيرضو اد‑يّي‑يغر

¹⁶ ءيسّبايّن‑يّي يوس، باش اد‑دّوغ ار‑فلّاس‑تبرّاحغ غ‑دار ايت‑تميزار اگّوگنين. ءور‑سقساغ كرا ن‑بنادم

¹⁷ ءولا دّيغ س‑وروشاليم اد‑ساولغ د‑يرقّاسن لّي‑يّي‑زوارنين، والاينّي فّوغّ مودّوغ س‑تمازيرت ن‑واعرابن. يان كرا وورّيغ س‑تمدينت ن‑ديماشق.

¹⁸ زرين كراض ءيسگُّاسن س‑دّيغ س‑وروشاليم ا‑غين‑ساولغ د‑بطرُس. گاورغ ديدس سمّوس د‑مراو ن‑واسّ.

¹⁹ والاينّي ءور‑ژريغ ءيرقّاسن ياضني ابلا ياعقوب گماس ن‑سيديتنّغ.

²⁰ مايد‑اون‑ين‑وريغ، ربّي ءيسّن ءيس‑ور‑گيس‑سّكاركسغ.

²¹ فّوغّ ءيلمّا ار‑تمودّوغ غ‑تميزار ن‑سوريّا د‑كيليكيّا.

²² غ‑ووسّان‑ان ءور‑تا‑يّي‑سّينّ ايت‑يمناگّارن غ‑تمازيرت ن‑يودايا.

²³ غير سفلدن فلّا، ار‑تّينين «غوالّي‑ستّين ءيكّان ار‑اغ‑يسّرفوفون، هاتي ار‑يتبرّاح غيلاد ف‑وغاراس لّي‑ف‑يقصاد ا‑ت‑يهلك.»

²⁴ ار‑باهرا‑تالغن ربّي ف‑سّيبت‑ينو.