filibbi 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لفرح د‑سّلامت

¹ واي‑ايتما، تعزّام داري باهرا، ار‑يّي‑ينقّا‑ومارگ‑نّون. كونّي ا‑س‑ا‑تفراحغ، تگم تّاج ن‑يخف‑ينو. واي‑ايتما عزّانين، ءيلّا فلّاون ا‑تزگام غمكان غ‑سيديتنّغ.

² راد‑ضالبغ زغ‑افوديّا، ضالبغ ءولا زغ‑سينتيخا، ا‑د‑مشاشكانت ءي‑نگراتسنت غ‑تامونت ن‑سيديتنّغ.

³ ضالبغ‑ك ءولا كيّي اي‑امعاون‑ينو ءيفولكين، ا‑تعاونت تيمغارين‑ان. خدمنت نتنتي غ‑تووري لّخبار ءيفولكين غ‑تاما‑نو نكّي د‑كليمانتوس د‑يمعاوانّ‑ينو ياضني لّي‑مي‑تياران ءيسماون‑نسن غ‑وارّا ن‑ويلّي طّافنين تودرت ءيدومن.

⁴ فرحات‑بدّا غ‑سيديتنّغ. را‑ت‑داغ‑ينيغ، فرحات.

⁵ ملات ءي‑كولّو مدّن منشك ا‑يلّا صّبر‑نّون. هاتي ياكمور‑د سيديتنّغ.

⁶ ا‑ور‑تاسيم تاغوفت ف‑كرا، والاينّي تژّالّات ار‑تّضالابم ربّي ف‑كرايگاتّ كرا، ار‑تي‑تّشكارم ار‑اس‑تّينيم ف‑اينّا‑كُن‑يخصّان.

⁷ غمكاد ا‑س‑راد‑اون‑تيلي سّلامت ن‑ربّي لّي‑يوگُرن ءيسوينگيمن ن‑بنادم، را‑تگابل ءول‑نّون ءولا لعاقل‑نّون غ‑تامونت لّماسيح ياسوع.

⁸ واي‑ايتما، اوال‑ينو ءيگُّران ا‑ت‑يگان: ا‑تسوينگيمّ غ‑ما‑يگان لحقّ ءولا ما‑غ‑يلّا ما‑تّوقّارم ءولا ما‑يُغژانّ ءولا ما‑يغوسن ءولا ما‑يميمن ءولا ما‑يشوان. ءيغ‑يلّا كرا ءيفولكين ءولا كرا‑غ‑يلّا ما‑تّالغم، سوينگيمات غ‑تغاوسيوين‑اد.

⁹ كولّو ما‑زگيگي‑تلمدم تامژم‑ت تسفلدم‑اس تژرم‑ت گيگي، سكارات سرس. غمكاد ا‑س‑راد‑بدّا‑ديدون‑ييلي ربّي ن‑سّلامت.

كرا ءيعزّان ءيلمد‑ت بولُس

¹⁰ ءيمّا غيلاد فرحغ باهرا غ‑سيديتنّغ اشكو توورّيم ار‑گيگي‑تسوينگيمّ. سّنغ ءيس‑ا‑بدّا‑گيگي‑تسوينگيمّ، والاينّي ءور‑تژضارم ا‑تسكرم كرا ار غيلاد.

¹¹ ءورد ف‑سّيبت ن‑حتاجّاغ كرا ا‑ف‑نّيغ مايان، اشكو لمدغ اد‑قنعوغ س‑اينّا‑داري‑يلّان.

¹² ءيغ‑داري‑يدروس ءولا ءيغ‑داري‑يگّوت، سّنغ ما‑راد‑سكرغ. اشكو لمدغ كرا ءيعزّان، ءيسّانغ مامنك اد‑تقناعغ س‑كولّو كرا‑يّي‑يجران. زوند ءيغ‑شبعاغ تيرمت زوند ءيغ‑قاماغ س‑لاژ، زوند ءيغ‑داري ما‑يگّوتن زوند ءيغ‑داري ما‑يدروسن.

¹³ ژضارغ ءي‑كرايگاتّ كرا س‑تدواست لّماسيح لّي‑يّي‑يسّدوسن.

¹⁴ ءيمّا كونّي، افولكي ايد‑گيگي‑تسكرم غيلاد غ‑ديدي‑تبيدّم غ‑تنوكموت‑ينو.

¹⁵ تسّنم كونّي ن‑فيليبّي، غاكود لّيغ فّوغّ تامازيرت ن‑ماكيدونيّا غ‑ووسّان زوارنين لّخبار ءيفولكين، ءور‑ديدي‑يبيدّ كرا ن‑ومناگّار غ‑‹فك‑امژ› ابلا كونّي واحدوكن.

¹⁶ ءيمّا كونّي، لّيغ‑ن‑قاماغ غ‑تمدينت ن‑تاسالونيكي تازنم‑يّي‑ن لمعاونت ءورد غير يات‑توال ءولا سنات غاكود لّيغ حتاجّاغ.

¹⁷ ءورد نكّين ا‑يران كرا ءي‑يخف‑ينو، والاينّي ريغ اد‑دارون‑تيگات صّابت غ‑لحساب‑نّون.

¹⁸ ءيمّا غيلاد ها‑يّي شبعاغ، ييلي داري ما‑يوفان زغ‑لخير، اشكو ءيسّروح‑يّي‑د ابافروديتوس مايلّي‑يّي‑دي‑توزنم. ءيگا زوند توجّوت ءيميمن ءولا زوند يات‑توافكا ءيتّرسن غ‑لگدّام ن‑ربّي لّي‑س‑يفرح ءيرضو سرس.

¹⁹ ربّي لّي‑مي‑گيغ وينس راد‑اون‑ياكّا كولّو ما‑تحتاجّام زغ‑تميخار لّمجد‑نس ف‑وودم لّماسيح ياسوع.

²⁰ ربّي باباتنّغ ا‑بدّا‑نتالغ غيلاد ءولا كولّو مايد‑د‑يفتان، امين.

²¹ ار‑ن‑تسلّامغ ف‑كولّو ءيمژلاين لّماسيح ياسوع. ار‑ن‑فلّاون‑تسلّامن ايتماتن لّي‑ديدي‑لّانين.

²² ار‑ن‑كولّو‑فلّاون‑تسلّامن ءيمژلاين ن‑غيد، باهرا غويد گانين زغ‑تگمّي ن‑قايصر.

²³ ا‑گيگون‑تيلي لباراكا ن‑سيديتنّغ ياسوع لماسيح.