filibbi 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

مامنك ا‑س‑را‑نرضو ربّي؟

¹ واي‑ايتما، اوال‑ينو ءيگُّران ءيگا‑ت: «فرحات غ‑سيديتنّغ.» ءور‑فلّا‑يژّاي اد‑اون‑داغ‑اراغ ماياد، والاينّي را‑كُن‑يعاون ا‑ور‑تجلوم.

² رارات لعاقل زغ‑ايت‑يسكّيرن‑ان أُخشنّين، اشكو زوند ءيضان اد‑گان، ار‑تبّين دّات ن‑مدّن.

³ ءيمّا ايت‑تژالّيت ءيصحان، ا‑تن‑يگان د‑نكُّني ءورد نتني. ار‑نتعباد ربّي س‑تحكيمت ن‑رّوح‑نس، ار‑نتزعام ف‑سّيبت لّماسيح ياسوع. ءور‑ا‑نبنّو ف‑ما‑يگان وين دّات ن‑بنادم.

⁴ مراد ءيس‑ريغ نكّي، ءيلّا داري غ‑دّات‑ينو ما‑ف‑ا‑بنّوغ. اشكو ءيغ‑يلّا كرا ن‑يان ءيغالن ءيس‑دارس كرا‑ف‑ا‑يبنّو ف‑يسكّيرن ن‑دّات، ءيلّا داري مايان س‑وگُّار.

⁵ ژّولّان‑يّي غ‑ويس تام‑ووسّان، گغ زغ‑ايت‑ربّي، زغ‑تقبيلت ن‑بنيامين، ار‑ساوالغ س‑يواليون ن‑ايت‑يودايا زغ‑مژّيي‑ينو. كّيغ‑تّين گيغ افاريسي، ار‑سكارغ س‑شّرع كولّوت.

⁶ ءيعزّو‑داري‑وغاراس‑ان باهرا، ايلّيغ ا‑سّرفوفونغ ايت‑ومناگّار لّماسيح. ار‑سكارغ كولّو ما‑فلّا‑يلّان باش اد‑ترضوغ ربّي س‑وفولكي لّي‑يگان وين شّرع.

⁷ والاينّي كولّو كرا حاسبغ ءيگا‑يّي افولكي غ‑ووسّان‑ان، حاسبغ‑ت غيلاد ءور‑يگي يات ف‑سّيبت لّماسيح.

⁸ حاسبغ كولّو تيغاوسيوين‑ان زوند ءور‑گينت يات، اشكو تلّا داري غيلاد ما‑تنت‑يوفن باهرا، ا‑ستّ‑يگان د‑تواسّنا لّماسيح ياسوع لّي‑يوورّين ءيگا سيدي. ف‑سّيبت‑نس ا‑ف‑گيغ تيغاوسيوين‑ان د‑يركان، فلغ كولّو ما‑داري‑يلّان باش اد‑يّي‑ييلي لماسيح،

⁹ گغ ءولا نكّي وينس. ءور‑سول‑ا‑سكارغ ف‑اد‑ترضوغ ربّي س‑يسكّيرن ن‑شّرع، والاينّي ءيرضا فلّا ف‑سّيبت ن‑ماد‑ومنغ س‑لماسيح. اشكو غمكاد ا‑س‑ا‑يترضو ربّي ف‑كولّو‑ويلّي سرس ءومنّين.

¹⁰ ءيمّا غيلاد ريغ اد‑يسّانغ لماسيح ءولا تاحكيمت ءيتجهّدن لّي‑ت‑يد‑يسّنكرن زغ‑لموت، ءيسّانغ ءولا تامونت ن‑تمّاريو‑نس، ءيريغ اد‑گغ زوند نتّان غ‑لموت‑نس

¹¹ ارد نكرغ ءولا نكّي زغ‑گر ويلّي مّوتنين.

تيزّلا لّي‑س‑يرا بولُس ا‑يلكم تّمي

¹² ءور‑نّيغ ءيزد نكّين ا‑يروحن كولّو ماياد ءولا كمّلغ گيس، والاينّي ار‑تزايادغ س‑لگدّام باش اد‑امژغ مايلّي‑ف‑يّي‑يومژ لماسيح ياسوع.

¹³ واي‑ايتما، ءور‑نّيغ ءيس‑ت‑ومژغ غيلاد، والاينّي يات‑تغاوسا كاد‑سكارغ: ار‑ن‑فالغ ما‑يلّان غ‑تغوردين، ار‑تّيدوغ س‑ما‑يلّان غ‑لگدّام.

¹⁴ ار‑تازّالغ اد‑روحغ تّمي، باش اد‑امژغ لكاس لّي‑يگان تودرت ن‑وفلّا لّي‑س‑يّي‑د‑يغرا ربّي ف‑وودم لّماسيح ياسوع.

¹⁵ ءيخصّا‑ياغ ا‑نسوينگيم غمكان، كولّو وانّا گينّغ ءيمقّورن غ‑وغاراس ن‑ربّي. والاينّي ءيغ‑دارون كرا ن‑يسوينگيمن ياضني، راد‑اون‑يمل ربّي تيغاوسيوين‑ان غمكلّي گانت.

¹⁶ ءيمّا غيلاد ءيلّا فلّانّغ ا‑بدّا‑نسكار س‑تنباضين لّي‑نلمد.

¹⁷ واي‑ايتما، سكارات كولّوكن زوند نكّي، تضفورم غويلّي مونّين د‑وغاراس لّي‑اون‑نملا.

¹⁸ اشكو نّيغ‑اون‑ت كيگان د‑تواليو، ءينيغ‑اون‑ت‑داغ غيلاد س‑يمطّاون: ءيگّوت ما‑يسكارن زوند ءيغ‑ور‑يگي‑وگّجدي لّماسيح يات.

¹⁹ راد‑گُّرون نتني س‑لهالاك، اشكو ار‑تعبادن اديس‑نسن. غايلّي‑س‑ا‑تفراحن ا‑را‑تن‑يشّحشّم، اشكو ار‑تسالان غير ما‑يگان وين دّونيت‑اد.

²⁰ ءيمّا نكُّني نگا ايت‑يگنّا. نگا‑ن رّجا‑نّغ غ‑ونجّام لّي‑را‑د‑ياشك زغ‑يگنّا ار‑سرس‑نتقل، ا‑ت‑يگان د‑سيديتنّغ ياسوع لماسيح.

²¹ نتّان ا‑را‑يرار دّات‑نّغ ن‑واكال ا‑تگ زوند دّات‑نس لّمجد س‑تحكيمت لّي‑س‑يژضار ا‑يگ كولّو ما‑يلّان غ‑دّو‑وفوس‑نس.