filibbi 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءوگوز لّماسيح ءولا تاتّويت-نس

¹ ءيس‑ور‑تدوسم تزعمّ ف‑سّيبت ن‑ما‑تگام وين لماسيح؟ ءيس‑ور‑ا‑كُن‑تسّفجّيج تايري‑نس؟ ءيس‑ور‑ا‑تسّحسّام س‑تامونت ن‑رّوح‑نس؟ ءيس‑ور‑دارون لحنانت ءولا لمحبّت ءيگّوتن ن‑ينگراتون؟

² لّيغ دارون ءيلّا كولّو مايان، را‑كُن‑ضالبغ اد‑يّي‑تكمّلم لفرح‑ينو، تگم كولّو يان غ‑يسوينگيمن‑نّون ءولا تايري‑نّون، تمونم غ‑يان‑وغاراس، تمشاشكام‑د غ‑يات‑تنباطّ.

³ ا‑ور‑تسكارم كرا ف‑ا‑تزّوورم ءيخف‑نّون ءولا‑دا‑تّيريم ا‑تملم ءيس‑تگام كرا، والاينّي ژّيمژايات ءيخف‑نّون ار‑بدّا‑تّگّام وييّاض د‑ما‑كُن‑يوفن.

⁴ ءيلّا ف‑كود يان گيگون ا‑ور‑يسوينگيم غير غ‑ما‑يرا ءي‑يخف‑نس، والاينّي ا‑يسوينگيم ءولا غ‑ما‑راد‑يرين وييّاض.

⁵ ءيلّا فلّاون ا‑تسوينگيمّ غمكلّي ءيسوينگيم لماسيح ياسوع.

⁶ ءيگا نتّا غمكلّي ءيگا ربّي، والاينّي ءور‑يغوي غ‑مايان ا‑ن‑سول‑يقاما غمكلّي ءيگا ربّي.

⁷ هاتي ءيفل‑ن كولّو ماد‑دارس‑يلّان، يوورّي ءيگ زوند ءيسمگ، ءيلول غ‑صّورت ن‑بنادم.

⁸ لّيغ ءيگا س‑سّيفت ن‑بنادم، يادر‑د ءي‑يخف‑نس، ءيسكر كولّو ما‑گيس‑يرا ربّي ايلّيغ ءيمّوت س‑لموت ءيشقان ف‑وگّجدي.

⁹ ف‑مايان ا‑ف‑ت‑يولّ ربّي س‑تاتّويت ن‑يگنّا، ءيفك‑اس ءيسم لّي‑يوگُرن كرايگاتّ ءيسم،

¹⁰ باش ا‑د‑يكنو كرايگاتّ افود س‑يسم ن‑ياسوع، غ‑يگنّا ءولا غ‑واكال ءولا غ‑دّو‑واكال،

¹¹ ييني كرايگاتّ ءيلس: «ياسوع لماسيح ا‑يگان سيديس ن‑كولّو ما‑يلّان.» غمكاد ا‑س‑راد‑كولّو‑وقّرن لمجد ن‑ربّي باباتنّغ.

ءيتران غ‑تيلّاس ن‑دّونيت

¹² ف‑مايان ا‑ف‑را‑كُن‑وصّاغ اي‑ايتما عزّانين، اشكو سّنغ ءيس‑ترام ا‑تسكارم ما‑فلّاون‑يلّان، غيلاد غ‑د‑فلّاون‑اگّوگغ غمكلّي‑تي‑تسكارم غاكود لّيغ‑ن‑ديدون‑لّيغ. ف‑مايان ا‑ف‑راد‑اون‑ينيغ: سكارات كولّو باش ا‑تسّافوم اجنجم لّي‑س‑تنجمّ، ار‑باهرا‑تّوقّارم ربّي ار‑بدّا‑ستّي‑تّاويم غ‑ما‑يرا نتّا.

¹³ اشكو ربّي ا‑بدّا‑گيگون‑يحكامن باش ا‑تّيريم ما‑ت‑يرضان ار‑سرس‑تسكارم.

¹⁴ زايدات غ‑كولّو ماياد بلا‑دا‑تّنگموگم ءولا‑دا‑تّژيم،

¹⁵ باش ا‑تغوسم بلا گيگون ءيلّا كرا لّعيب، تگم تاروا شوانين ن‑ربّي غ‑وامّاس ن‑تاسوت‑اد يُخشنّ ءيجلان. ها‑كونّي زوند ءيتران غ‑يگنوان ا‑س‑ا‑تفاوم غ‑وامّاس‑نسن،

¹⁶ ار‑اسن‑تمالام اوال ن‑تودرت. مايان ا‑س‑راد‑سرون‑فرحغ باهرا غ‑واسّ لّي‑غ‑را‑د‑ياشك لماسيح، ژرغ ءيس‑ورد بلا لفايتّ ا‑س‑ا‑تازّالغ ار‑تنهاتافغ غ‑دارون.

¹⁷ واخّا ءيغ‑راد‑فّين ءيدامّن‑ينو ف‑يگّي ن‑توافكا لّيمان‑نّون زوند امان ن‑واضيل لّي‑تفّين مدّن ف‑توافكيو‑نسن غ‑لگدّام ن‑ربّي، ها‑يّي رضيغ س‑مايان، فرحغ سرون كولّوكن.

¹⁸ ءولا كونّي ءيلّا فلّاون ا‑سرس‑ترضوم، تفرحم ديدي.

توگّا ف‑تيموتاوس د‑ابافروديتوس

¹⁹ ار‑ترجوغ غ‑سيديتنّغ ياسوع اد‑اون‑ين‑ازنغ تيموتاوس غ‑مايد‑د‑ياكمورن باش ا‑يّي‑د‑يسّفرح ءولا نكّي س‑كرا لّخبار زغ‑دارون.

²⁰ ءور‑داري يان ءيسوينگيمن زوند نتّان، ار‑تّ‑يتاوي باهرا غ‑مامنك ا‑تگام.

²¹ اشكو كود يان ار‑يسوينگيم غ‑ما‑يگان وينس، ءورد ما‑يگان وين ياسوع لماسيح.

²² ءيمّا كونّي تسّنم ف‑تيموتاوس ءيس‑يفولكي باهرا، تيسّانم مامنك ا‑ديدي‑يتخدام زوند ارّاو د‑باباس غ‑تووري لّخبار ءيفولكين.

²³ ار‑ترجوغ ا‑ت‑ين‑ازنغ غيلاد، والاينّي ار‑تقلغ ارد ژرغ ما‑س‑راد‑يّي‑تگُّرو غيد.

²⁴ ها‑يّي تيقّنغ غ‑سيديتنّغ را‑ن‑اشكغ ءولا نكّي س‑دارون غ‑مايد‑د‑ياكمورن.

²⁵ سوانگمغ ءيس‑را‑ياف اد‑اون‑ين‑رارغ ءولا گماتنّغ ابافروديتوس لّي‑ديدي‑يتخدامن ار‑يتبدّاد غ‑تاما‑نو. ءيگا امازان‑نّون، توزنم‑ت‑يد ا‑يّي‑يعاون غ‑ما‑يّي‑يخصّان.

²⁶ اشكو ار‑ت‑ينقّا‑ومارگ‑نّون كولّوكن، طيّر‑اس لّيغ ءيسّن ءيس‑تسفلدم ف‑تماضونت‑نس.

²⁷ س‑صّاحت يوضن باهرا ايلّيغ ءيلّا ف‑لموت، ءيمّا ربّي ءيحنّا گيس. ءيحنّو فلّا ءولا نكّي لّيغ‑ت‑يجّوجّي، ءيكّيس فلّا تاغوفت‑ان زغ‑تغوفيوين ياضني.

²⁸ ماياد ا‑ف‑ريغ اد‑اون‑ت‑ين‑ازنغ غيلاد باش ا‑تي‑تژرم تفرحم ديدس، والا ا‑سول‑اسيغ تاغوفت‑نس نكّي.

²⁹ شّكشمات‑ت س‑دارون، تفرحم سرس باهرا س‑يسم ن‑سيديتنّغ. تالغات مدّن زوند غواد،

³⁰ اشكو خدا ءور‑يمّوت ف‑سّيبت ن‑تووري لّماسيح. ءور‑يغوي غ‑تودرت‑نس اشكو ءيرا ا‑يّي‑يتعاوان غ‑مايلّي مي ءور‑تژضارم كونّي.