filibbi 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑بولُس د‑تيموتاوس، ءيخدّامن لّماسيح ياسوع، ءي‑كولّو ءيمژلاين لّماسيح ياسوع غ‑تمدينت ن‑فيليبّي ءولا ءينگابالن د‑يمعاوانّ‑نّون.

² اد‑اون‑تيلي لباراكا د‑سّلامت زغ‑ربّي باباتنّغ د‑سيديتنّغ ياسوع لماسيح.

بولُس ءيضالب ربّي ا‑يبارك ايت‑فيليبّي

³ ار‑تشكارغ ربّي‑نو غاكود نّا‑فلّاون‑سوينگيمغ.

⁴ ار‑تفراحغ غاكود نّا‑تي‑تضالابغ ف‑سّيبت‑نّون كولّوكن،

⁵ اشكو ار‑ديدي‑تّمعاوانم غ‑تووري لّخبار ءيفولكين زغ‑واسّ امزوارو سول س‑غاسّاد.

⁶ هاتي سّنغ ماياد باهرا: ربّي لّي‑گيگون‑يگران افولكي را‑ت‑يسّافاو ارد ءيكمّل غ‑واسّ لّي‑غ‑را‑د‑يوورّي لماسيح ياسوع.

⁷ ءيقّان‑يّي‑د ا‑گيگون‑سوينگيمغ كولّوكن غمكان، اشكو ءوسيغ‑كُن‑بدّا غ‑وول‑ينو. لّيغ ا‑تحاماغ ف‑لخبار ءيفولكين ار‑ت‑زّگاغ غ‑وولاون ن‑مدّن، ءولا غيلاد غ‑تياماژغ ءيليغ غ‑يسكراف، تكشمّ ديدي كولّوكن غ‑لباراكا ن‑تووري‑اد.

⁸ ربّي ا‑فلّا‑يگان ءينيگي، ييسّان مامنك ا‑يّي‑ينقّا‑ومارگ‑نّون، ار‑كُن‑تّيريغ س‑تايري لّماسيح ياسوع.

⁹ ءيمّا غيلاد ار‑تضالابغ ربّي اد‑اون‑يسّيگات باهرا لحنانت ن‑ينگراتون، ءيفك‑اون ا‑تيسّانم كولّو ما‑يگان وين لحقّ ار‑تاطّوم ما‑يشوان زغ‑ما‑يُخشنّ.

¹⁰ غمكاد ا‑س‑را‑تيژضارم ا‑بدّا‑تّناوالم افولكي، تغوسم زغ‑كولّو ما‑يگان لعيب ءولا كولّو ما‑يشّحشّامن مدّن ار اسّ لّي‑غ‑را‑د‑ياشك لماسيح.

¹¹ راد‑اون‑تيگات صّابت ن‑وفولكي لّي‑گيگون‑يسكار ياسوع لماسيح، ءيبان گيگون لمجد ن‑ربّي، الغن‑ت مدّن ف‑سّيبت‑نّون.

ءيفرح بولُس س‑ماد‑اس‑يجران

¹² واي‑ايتما، ريغ ا‑تيسّانم غاياد‑يّي‑يجران ءيزوويد غ‑تواسّنا لّخبار ءيفولكين،

¹³ ايلّيغ سّنّ كولّو ءيمخزنيين لّقصر د‑وييّاض گّوتنين ءيزد ف‑سّيبت لّماسيح ا‑ف‑تياماژغ.

¹⁴ ءولا ايتماتنّغ، ءيگّوت گيسن ما‑يوورّين ءيدوس غ‑سيديتنّغ ف‑سّيبت ن‑يسكراف‑ينو. زعمن باهرا ار‑تبرّاحن س‑وگُّار س‑واوال ن‑ربّي، ءور‑ا‑تيكساضن يات.

¹⁵ سّنغ كرا گيسن ار‑تّيرين اد‑زّوورن سّيمغورن ءيخف‑نسن، غايان كا‑ف‑ا‑تبرّاحن ف‑لماسيح. والاينّي ءيلّا سول ماد‑دار‑تلّا نّييت ءيصفان،

¹⁶ ار‑تبرّاحن ف‑سّيبت لّحنانت لّي‑گيسن‑يلّان، اشكو سّنّ ءيس‑يّي‑د‑ييوي ربّي س‑غيد باش اد‑تحاماغ ف‑لخبار ءيفولكين.

¹⁷ ءيمّا وييّاض ياضني ءورد س‑وول ءيصفان ا‑س‑ا‑تبرّاحن ف‑لماسيح، اشكو ران اد‑امژن غير كرا ءي‑يخف‑نسن، ءيرين اد‑يّي‑سّيگاتن تانوكموت غ‑لحبس.

¹⁸ ءيمّا نكّي، ما‑راد‑ينيغ؟ ابلا‑اد‑فرحغ ءيغ‑ا‑سفليدن مدّن ءي‑تبرّاحت ف‑لماسيح، ءيگ‑ييت ف‑يمي ن‑ايت‑سين‑وودماون نغد ويد دار ءول ءيصفان. هاتي راد‑سول‑فرحغ،

¹⁹ اشكو مايد‑يّي‑يجران، سّنغ ءيس‑را‑زگيس‑نجمغ تيگيرا ف‑سّيبت ن‑ما‑فلّا‑تّضالابم ربّي ار‑يّي‑يتعاوان رّوح ن‑ياسوع لماسيح.

²⁰ ءيگّوت گيگي رّجا، ءيريغ باهرا اد‑سكارغ كولّو ما‑يّي‑د‑يقّانّ س‑زّعامت ءيگّوتن، باش ا‑گيگي‑تبان‑تموغرا لّماسيح غيلاد زوند كرايگاتّ لوقت، ءيغ‑سولغ ءولا ءيغ‑مّوتغ.

²¹ اشكو داري نكّي: ءيغ‑دّرغ، لماسيح ا‑يگان تودرت‑ينو. ءيغ‑مّوتغ، راد‑يّي‑ييلي ما‑يوفن تودرت‑اد.

²² ءور‑سّينغ مانوا را‑گيسن‑يريغ، اشكو ءيغ‑سولغ غ‑دّات راد‑يژضارغ اد‑زايدغ غ‑تووري‑اد ءيفولكين.

²³ ريغ ماياد ءولا مايان س‑سين. ريغ باهرا اد‑فّوغّ دّونيت‑اد ءيليغ د‑لماسيح، اشكو ءيفولكي مايان س‑وگُّار.

²⁴ والاينّي ف‑سّيبت‑نّون را‑ياف اد‑قاماغ غ‑دّات.

²⁵ سّنغ باهرا ءيس‑يوف غمكاد. راد‑سولغ قاماغ ديدون كولّوكن باش ا‑تّزايادم ار‑تّفراحم غ‑وغاراس ن‑سيديتنّغ.

²⁶ غمكاد ا‑س‑راد‑باهرا‑تّفراحم س‑لماسيح ياسوع ف‑سّيبت‑ينو غاكود لّيغ را‑ن‑داغ‑دارون‑اشكغ.

²⁷ والاينّي ءيلّا فلّاون ا‑تسكارم س‑ما‑د‑يمشاشكان د‑لخبار ءيفولكين لّماسيح. اشكو ريغ ا‑بدّا‑فلّاون‑سفليدغ ءيس‑كولّو‑تزگام غ‑يان‑وغاراس، ءيغ‑د‑فلّاون‑اگّوگغ نغد ءيغ‑ن‑دارون‑وشكيغ، ار‑كولّو‑تّخدامّ س‑يات‑تنباطّ باش ا‑تسّلمادم لحقّ لّخبار ءيفولكين غمكلّي ءيگا

²⁸ بلا‑دا‑تّيكساضم زغ‑ويلّي‑كُن‑سّرفوفونّين. غمكاد ا‑س‑راد‑ژرن ءيس‑لّان نتني غ‑وغاراس لّهالاك تيليم كونّي غ‑وغاراس ن‑وجنجم، اشكو ربّي ا‑را‑كُن‑يجّنجم.

²⁹ اشكو لّيغ‑اون‑يفكا ا‑تامنم س‑لماسيح، ءيفكا‑ياون ءولا تارفوفنت ف‑سّيبت‑نس.

³⁰ تكشمّ ءولا كونّي س‑يميغ لّي‑تژرام مّاغّ سرس نكّي، تسفلدم ءولا غيلاد ءيس‑ا‑سول‑سرس‑تمّاغّ.