anurẓm 9 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ يوت ويس سمّوس لّمالايكا نّفّار‑نس، س‑ژريغ يان‑يتري ءيضر زغ‑يگنوان س‑واكال. تّفك‑اس يات‑تساروت ءي‑يتري‑ان، ءيگان تين‑تدروت ن‑واكال.

² ءيدّو ءيرژم ءيمي ن‑تدروت، ءيغلي‑د زغ‑گيس كرا ن‑واگّو ءيگّوتن زوند اگّو ن‑وفارنو ءيمقّورن، ايلّيغ تلّاس تافوكت ءيلّاس لحال كولّو س‑واگّو لّي‑د‑يغلين زغ‑تدروت ن‑واكال.

³ تفّوغ‑د‑يلمّا‑تمورغي زغ‑واگّو، تتّرس ف‑واكال، تّفك‑اس‑تژضّارت ا‑تقّس زوند ءيغردم.

⁴ ءيتياونّا‑ياس ا‑ور‑تهلك توگا ن‑واكال والا ءيسغارن والا تيفراوين ن‑يسافارن، والاينّي ا‑تهلك غير مدّن لّي‑ور‑دار طّابع ن‑ربّي ف‑يگنزي‑نسن.

⁵ ءور‑تژضار ا‑تن‑تنغ، والاينّي ءيتياوفكا‑ياس ا‑تن‑تسّمحاكّا سمّوس‑ييرن، ار‑تن‑تژّاض زوند غمكلّي ءيژّاض سّمّ ن‑يغردم ءيغ‑يقّس بنادم.

⁶ غ‑ووسّان‑ان راد‑باهرا‑يرين مدّن اد‑مّتن، والاينّي ءور‑راد‑يژضارن اد‑مّتن. راد‑باهرا‑ژوژضن لموت، والاينّي ءور‑را‑ستّ‑افن.

⁷ ترواس‑تمورغي‑ان ءي‑ييسّان ءوجادنين ءي‑يميغ. كود يات، ءيلّا ف‑يخف‑نس كرا ءيرواسن تّاج ن‑وورغ. گن‑وودماون‑نسنت زوند ءودم ن‑بنادم،

⁸ ءيگ‑وازّار‑نسنت زوند ازّار ن‑تمغارت، گن‑ووخسان‑نسنت زوند ءوخسان ن‑يزم.

⁹ لسنت ف‑يدمارن‑نسنت كرا ءيرواسن ابانّك ن‑ووزّال. ءيگ ءيجّيج ن‑يفراون‑نسنت زوند ءيجّيج لّكرارص د‑ييسّان گّوتنين ار‑كولّو‑تازّالن س‑يميغ.

¹⁰ كود يات تطّاف تيمغيلت د‑وساقس زوند ءيغردم. غ‑تمغيلت‑نسنت ا‑غ‑تلّا‑تژضّارت لّي‑س‑راد‑سّمحاكّانت مدّن سمّوس‑ييرن.

¹¹ تامورغي‑ان، اگلّيد لّي‑گيس‑يحكامن ءيگا لمالاك ن‑تدروت ن‑واكال. ءيگ ءيسم‑نس ‹ابادّون› س‑واوال ن‑ايت‑يودايا، ءيگ ‹ابولّيون› (غوالّي ءيفنّون) س‑واوال ن‑ايت‑يونان.

¹² غمكاد ا‑تزري‑تگوضي تامزواروت. راد‑سول‑يلينت سنات‑تگوضيوين ياضني.

¹³ يوت ويس سضيص لّمالايكا نّفّار‑نس، س‑سفلدغ ءي‑يان‑واوال ءيساول‑د زغ‑دار كّوژ‑واسكاون ن‑تغمرين ن‑طّبلا ن‑وورغ لّي‑يلّان غ‑لگدّام ن‑ربّي.

¹⁴ ءيغر ءي‑لمالاك‑ان ويس سضيص لّي‑يوسين نّفّار ييني‑اس: «رژم‑د ءي‑كّوژ لمالايكا لّي‑تياماژنين غ‑دار‑واسيف ن‑فورات ءيمقّورن.»

¹⁵ ءيرژم ءيلمّا ءي‑كّوژ لمالايكا لّي‑وجادنين ءي‑تاساعت‑ان ن‑واسّ‑ان ن‑وايّور‑ان ن‑وسگُّاس‑ان باش اد‑نغن تولوت ن‑بنادم.

¹⁶ سفلدغ ءي‑كرا ءيملا‑يّي منّاو اد‑گان ءيمنّاين ن‑ييسّان ن‑يميغ. گان سين ءيد‑ميّا ن‑يد‑ميليون (000‏.000‏.200).

¹⁷ غمكاد ا‑س‑يّي‑د‑بانّ‑ييسّان غ‑توارگيت لّي‑ژريغ. كرايگاتّ امنّاي ءيلسا ابانّك ءيلّا گيس‑وژگُّاغ د‑وژرقي د‑ووراغ، گن ءيگويّا ن‑ييسّان زوند اگايّو ن‑يزم، ار‑دي‑تّفّوغ لعافيت د‑واگّو د‑لكبريت زغ‑يمي‑نسن.

¹⁸ غاكودان ا‑يمّوت تولوت ن‑بنادم س‑كراطّ‑تگوضيوين‑ان، س‑لعافيت د‑واگّو د‑لكبريت لّي‑د‑يتفّوغن زغ‑يماون‑نسن.

¹⁹ اشكو غ‑يمي‑نسن د‑تمغيلت‑نسن ا‑غ‑تلّا‑تژضّارت ن‑ييسّان‑ان. كود يان، تيمغيلت‑نس تطّاف ءيخف زوند الگمّاض ما‑س‑ا‑يسّياگّاس مدّن.

²⁰ ءيمّا كولّو ويلّي ءور‑مّوتنين س‑تگوضيوين‑ان، سول ءور‑تا‑رين اد‑فلن غايلّي سكارن س‑يفاسّن‑نسن. زوويدن نتني ار‑تعبادن لجنون ءولا لاصنام ن‑وورغ د‑نّوقرت د‑واناس د‑وژرو د‑وكشّوض لّي‑ور‑تمنادنين ءولا‑دا‑سفليدن ءولا‑دا‑فتّون.

²¹ نتني ءور‑تن‑اكُّ‑تُگراژ ف‑يسكّيرن‑نسن، ار‑نقّان ار‑سكارن سّيحر ار‑تفسادن ار‑تاكُرن.