anurẓm 8 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ويس سّا ن‑طّوابع ءولا تاطّاست ن‑وورغ

¹ ءيفسي‑ولقّاغ ءيلمّا ويس سّا ن‑طّوابع، س‑يفسّا كولّو ما‑يلّان غ‑يگنّا ايلّيغ ءيزري ما‑يتگّان مناصّ ن‑تاساعت.

² ژرغ ءيلمّا سّا لّمالايكا لّي‑بيدّنين غ‑لگدّام ن‑ربّي، تّفكن‑اسن سّا ن‑نّفّارات.

³ ءيدّو يا‑لّمالاك ياضني ءيبيدّ غ‑تاما ن‑وژرو ن‑تغرسي، ياسي تاطّاست ن‑وورغ. ءيتّفك‑اس لبخور ءيگّوتن ا‑ديدس‑يسّمون تيژولّا ن‑كولّو‑يمژلاين ن‑ربّي، باش ا‑تنت‑ين‑يسّاكمور ءي‑ربّي ف‑طّبلا ن‑وورغ لّي‑يلّان غ‑لگدّام لّعرش.

⁴ ار‑ياقلاي‑واگّو لّبخور د‑تژولّا ن‑يمژلاين زغ‑وفوس لّمالاك س‑لگدّام ن‑ربّي.

⁵ ءيدّو لمالاك ءيلمّا، ءيعمّر تاطّاست س‑تيرگين لّعافيت زغ‑دار طّبلا، ءيلوح‑تّ‑ين ف‑دّونيت. ءيمّاسّ ءيگّيگ س‑وقّريان ءيتجهّدن، ءوتن‑ووسمانّ ءيمّاسّ‑واكال.

سّا لّمالايكا لّي‑دار سّا ن‑نّفّارات

⁶ نكرن ءيلمّا سّا لمالايكا لّي‑دار سّا نّفّارات، سكرن ف‑ا‑تن‑وتن.

⁷ يوت لمالاك امزوارو نّفّار‑نس، س‑يضر ءيبروري د‑لعافيت ف‑دّونيت خلضن د‑يدامّن. ءيجدر تولوت غ‑دّونيت ءولا تولوت غ‑يسغارن، تجدر ءولا توگا ءيزگزاون كولّوتّ.

⁸ يوت ويس سين لّمالايكا نّفّار‑نس، س‑يتياتّاي كرا ءيرواسن يان‑ودرار ءيمقّورن ءيجدّرن س‑لعافيت، ءيتّلوح‑ن غ‑ومدا.

⁹ يوورّي ءيژگُّاغ تولوت غ‑ومدا زوند ءيدامّن، ءيمّت تولوت غ‑لمخلوقات لّي‑لّانين غ‑ومدا، ءيتّهلك ءولا تولوت غ‑واناون لّي‑تكّانين امدا.

¹⁰ يوت ويس كراض لّمالايكا نّفّار‑نس، س‑يضر يان‑يتري ءيمقّورن زغ‑يگنوان ار‑يجدّر زوند اسافو، ءيضر ف‑تولوت ن‑يسافّن د‑تالعينين ن‑وامان.

¹¹ ءيگا ءيسم ن‑يتري ‹اسمّوم›، يوورّي ءيسمّوم تولوت غ‑وامان، ءيمّت ما‑يگّوتن غ‑مدّن لّي‑سوانين امان‑ان، اشكو وورّين سمّومن باهرا.

¹² يوت ويس كّوژ لّمالايكا نّفّار‑نس، س‑تتّوت تافوكت ءيلّاس تولوت‑نس، ءيتّوت‑وايّور ءولا نتّا ءيلّاس تولوت‑نس، تّوتن ءيتران ءولا نتني ءيلّاس تولوت‑نسن. ار‑تلاح تيفاوت غ‑تولوت ن‑وزال ءولا تولوت ن‑ييض.

¹³ سّماقّلغ‑ن‑داغ س‑ژريغ يان‑يگيدر يوويل غ‑وامّاس ن‑يگنوان، سفلدغ‑اس ءينّا س‑واوال ءيتجهّدن: «تاگوضي تاگوضي تاگوضي ا‑را‑ييلي ءي‑يمزدغن ن‑دّونيت ف‑سّيبت ن‑نّفّارات لّي‑راد‑وتن كراض لمالايكا ياضني.»