anurẓm 7 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

كّوژ لمالايكا

¹ لّيغ ءيزري مايان، ژرغ كّوژ لمالايكا بيدّن غ‑كّوژط‑تسگيو ن‑دّونيت، حصارن‑ين اضو ا‑ور‑يوت اكال ءولا امدا ءولا كرا ن‑وسغار.

² ژرغ‑ن ءيلمّا يا‑لّمالاك ياضني ءيغلي‑د زغ‑يلّيغ ا‑دي‑تاقلاي تافوكت، ياسي‑د طّابع ن‑ربّي باب ن‑تودرت. ءيغر لمالاك‑ان س‑واوال ءيتجهّدن ءي‑كّوژ لمالايكا لّي‑يوصّا ربّي اد‑هلكن اكال د‑ومدا،

³ ييني‑اسن: «اد‑ور‑تهلكم اكال ءولا امدا ءولا ءيسغارن ارد نگ طّابع ف‑يگنزي ن‑كولّو ءيخدّامن ن‑ربّي‑نّغ.»

⁴ سفلدغ ءيلمّا ءي‑كرا ءيملا‑يّي منّاو اد‑گان غويلّي‑مي‑گان طّابع. گان ميّا د‑كّوژ ءيد‑مراو د‑كّوژ ن‑والف (000‏.44‏1). گان نتني زغ‑كولّو تيقبيلين ن‑ايت‑ربّي،

⁵ ييلي سين د‑مراو‑والف (000‏.12) زغ‑كرايگاتّ تاقبيلت: زغ‑ياهودا د‑راوبين د‑گاد

⁶ د‑اشير د‑نافتالي د‑ماناسّي

⁷ د‑شيمعون د‑لاوي د‑ياسّاكار

⁸ د‑زابولون د‑يوسف د‑بنيامين.

مدّن گّوتنين غ‑يگنّا

⁹ لّيغ ءيزري مايان سّماقّلغ‑ن ژرغ مدّن گّوتنين باهرا، ءور‑را‑ييژضار يان ا‑تن‑يحاسب. گان نتني زغ‑كولّو تيميزار د‑تقبيلين د‑تاسوتين د‑لّوغات ن‑دّونيت. بيدّن غ‑لگدّام لّعرش ءولا القّاغ س‑تملسا تومليلين، اسين تالضايين غ‑وفوس‑نسن.

¹⁰ الّن اوال‑نسن ار‑تّينين: «ربّي‑نّغ لّي‑يسكيوسن ف‑لعرش، نتّان د‑ولقّاغ اد‑اغ‑يجّنجمن.»

¹¹ بيدّن غين كولّو لمالايكا، لولّين ءي‑لعرش ءولا ءيمغارن ءولا كّوژط لمخلوقات، ضرن‑ين ف‑وودم‑نسن غ‑لگدّام لّعرش سجدن ءي‑ربّي

¹² ءينين: «امين. ا‑ييلي لحمد د‑لمجد د‑تحكيمت د‑شّوكر د‑تّوقير د‑لحوكم د‑لقوّا ءي‑ربّي‑نّغ غيلاد ءولا كولّو مايد‑د‑يفتان، امين.»

¹³ ءيسقسا‑يّي يان زغ‑يمغارن: «ءيس‑تسّنت ماد‑گان غويد لسانين تيملسا تومليلين؟ مانيزغ‑د‑وشكان؟»

¹⁴ ءينيغ‑اس: «كيّي ا‑يسّنّ ا‑سيدي.» ييني‑يّي: «نتني گان غويلّي‑د‑فّوغنين زغ‑ونوكمو لّي‑باهرا‑يشقان، سيردن تيملسا‑نسن س‑يدامّن ن‑ولقّاغ ايلّيغ ملّولنت باهرا.

¹⁵ ف‑مايان ا‑ف‑بيدّن غ‑لگدّام لّعرش ن‑ربّي ار‑تي‑تعبادن غ‑ونتال‑نس غ‑ييض ءولا ازال. غوالّي ءيسكيوسن ف‑لعرش راد‑بدّا‑تن‑يسّنتال غ‑دارس.

¹⁶ ءور‑سار‑تن‑ينغي لاژ ءولا ءيريفي. ءور‑سار‑تن‑توت تافوكت ءولا ءيجاوان.

¹⁷ اشكو القّاغ لّي‑يلّان غ‑لعرش، نتّان ا‑را‑تن‑يكس ءيزوور‑اسن س‑تالعينين ن‑وامان ن‑تودرت. راد‑اسن‑يسفيض ربّي كولّو ءيمطّاون‑نسن.»