anurẓm 6 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

القّاغ ءيفسي طّوابع

¹ ژرغ‑ن القّاغ ءيفسي يان زغ‑سّا ن‑طّوابع، س‑سفلدغ ءي‑يات زغ‑كّوژط لمخلوقات تساول س‑واوال ءيتجهّدن زوند ءيگّيگ تيني: «فّوغ‑د.»

² سّماقّلغ‑ن س‑ن‑ژريغ يان‑وايّيس ءومليل، يوسي‑ومنّاي‑نس يا‑لّقوس ن‑يميغ. ءيتّفك‑اس يان‑تّاج، ءيفّوغ‑د ا‑ينرو، ءيگ واد بدّا ءيتنرون.

³ ءيفسي‑ولقّاغ ويس سين طّوابع، س‑سفلدغ ءي‑تيس سنات لمخلوقات تنّا: «فّوغ‑د.»

⁴ ءيفّوغ‑د‑وايّيس ياضني ءيگا اژگُّاغ. ءيتّفك ءي‑ومنّاي‑نس ا‑يكّيس سّلامت ف‑دّونيت ف‑اد‑نقّان مدّن ءي‑نگراتسن، تّفك‑اس يات تاژّيت ءيمقّورن.

⁵ ءيفسي‑ولقّاغ ويس كراض طّوابع، س‑سفلدغ ءي‑تيس كراطّ لمخلوقات تنّا: «فّوغ‑د.» سّماقّلغ س‑ژريغ ايّيس ءيضيلي، يوسي‑ومنّاي‑نس يا‑لّميزان غ‑وفوس‑نس.

⁶ سفلدغ ءي‑كرا ءيرواس اوال زغ‑گر كّوژط لمخلوقات ييني: «غير كيلو ن‑يردن س‑وقاريد ن‑نّوقرت. غير كراض ءيد‑كيلو ن‑طمژّين س‑وقاريد ن‑نّوقرت. والاينّي ا‑ور‑تسّوكفم زّيت ءولا اضيل.»

⁷ ءيفسي‑ولقّاغ ويس كّوژ طّوابع، س‑سفلدغ ءي‑تيس كّوژط لمخلوقات تنّا: «فّوغ‑د.»

⁸ سّماقّلغ س‑ژريغ ايّيس اوراغ، ءيگ ءيسم ن‑ومنّاي‑نس ‹لموت›، ءيضفور‑ت‑‹ومضّال›. ءيتّفك‑اسن اد‑حكامن ف‑يان‑وگزّوم زغ‑كّوژ ءيگزمان ن‑دّونيت، اد‑نغن غويلّي گيس زدغنين س‑تاژّيت د‑وغني د‑واطّان د‑لوحوش ن‑دّونيت.

⁹ ءيفسي‑ولقّاغ ويس سمّوس طّوابع، س‑ژريغ لارواح ن‑ويلّي مّوتنين ف‑سّيبت ن‑تبرّاحت‑نسن س‑واوال ن‑ربّي ءولا توگّا‑نسن لّي‑فلّاس‑فكان. غ‑دّو‑وژرو ن‑تغرسي ا‑غ‑لّان،

¹⁰ الّن اوال‑نسن ءينين: «وا‑سيدي ربّي ءيتجهّدن، تگيت امژلاي تگت لحقّ. ار ماناگو ا‑را‑ن‑تسّماطلت لعقوبيت لّي‑يلّان ف‑مدّن ن‑دّونيت، ترارت‑اسن ف‑يدامّن‑نّغ؟»

¹¹ غاكودان ا‑يتياوفكا ءي‑كرايگاتّ يان گيسن تيملسيت تومليلت، ييني‑اسن ربّي اد‑قلن سول ءيميكّ ارد ءيكمّل غونشك لّي‑د‑يقّانّ زغ‑ايتماتسن د‑يمعاوانّ‑نسن لّي‑راد‑نغن مدّن غمكلّي‑تن‑نغان نتني.

¹² ءيفسي‑ولقّاغ ويس سضيص طّوابع. سّماقّلغ‑ن ژرغ اكال ءيمّوسّا س‑جّهد، توورّي تلّاس تافوكت زوند اخنيف ءيضلان، يوورّي ءيژگُّاغ‑وايّور كولّوت زوند ءيدامّن.

¹³ ضرن‑د ءيتران زغ‑يگنوان س‑واكال غمكلّي‑د‑يتلوح‑واضو ءيقوراين زغ‑وازار.

¹⁴ ءيتّين ءيگنوان، موتّلن زوند كرا ن‑وارّا ءيموتّلن ف‑يعماد‑نس، ءيتياتّاي كولّو ما‑يگان ادرار د‑يگزير زغ‑يلّيغ ءيلّا.

¹⁵ روولن ءيگلدان ن‑دّونيت د‑ينمغورن ن‑تميزار د‑ينمغورن لّعسكر، روولن ايت‑وايدا د‑ايت‑سّولطا، نتني ءولا كولّو مدّن ءيسمگان ءولا غويلّي گانين وين ءيخف‑نسن، رگسن غ‑يفران ءولا غ‑گر ءيجاريفن ن‑يدرارن.

¹⁶ ار‑اقران ءي‑يدرارن د‑يجاريفن ار‑اسن‑تّينين: «ضراد‑د فلّانّغ تسّنتالم‑اغ زغ‑وودم ن‑والّي ءيسكيوسن ف‑لعرش ءولا زغ‑لغاضاب ن‑ولقّاغ.

¹⁷ اشكو ءيلكم‑د‑واسّ لّي‑باهرا‑يشقان ءيگ اسّ لّغاضاب‑نسن. ما‑را‑ييژضار ا‑گيس‑يبيدّ؟»