anurẓm 5 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ارّا لّي‑يقّنّ س‑سّا ن‑طّوابع

¹ ژرغ ءيلمّا يان‑وارّا ءيموتّلن غ‑وفوس افاسي ن‑والّي ءيسكيوسن ف‑لعرش، ءيتيارا زغ‑سنات‑تسگيو، ءيقّن س‑سّا ن‑طّوابع.

² ژرغ‑ن يا‑لّمالاك ءيتجهّدن يولّ اوال‑نس ييني: «ما‑يستهلّان ا‑يرژم ارّا‑ياد، ءيفسي طّوابع لّي‑فلّاس‑يلّان؟»

³ والاينّي ءور‑يلّي يان غ‑يگنّا ءولا غ‑واكال ءولا غ‑دّو‑واكال ءيژضارن ا‑يرژم ارّا‑يان ءولا ءيسّماقّل گيس.

⁴ ار‑الّاغ باهرا اشكو ءور‑يتيافا يان ءيستهلّان ا‑يرژم ارّا‑يان ءولا ا‑گيس‑يسّماقّل.

⁵ غاكودان ءيساول‑د سري يان زغ‑يمغارن ييني‑يّي‑د: «اد‑ور‑تالّات. هاي‑يزم ن‑تقبيلت ن‑ياهودا، هاي‑اژور ن‑وگلّيد داود، نتّان ا‑ينران، ييژضار ا‑يفسي سّا ن‑طّوابع‑اد، ءيرژم ارّا.»

القّاغ لّي‑يستهلّان

⁶ ژرغ ءيلمّا يان‑ولقّاغ، ءيبيدّ غ‑دار لعرش غ‑گر كّوژط لمخلوقات، لولّين‑اس ءيمغارن. ءيرواس ءيس‑يتياوغراس، ءيطّاف سّا ن‑تاسكيوين د‑سّا ن‑والّن، ا‑تن‑يگان د‑سّا لّارواح ن‑ربّي لّي‑يوزن اد‑كن كولّو دّونيت.

⁷ ياسي‑د‑ولقّاغ ارّا‑يان زغ‑وفوس افاسي ن‑والّي ءيسكيوسن ف‑لعرش.

⁸ لّيغ‑د‑يوسي ارّا، ضرنت‑ن كّوژط لمخلوقات ءولا سين ءيد‑مراو د‑كّوژ (24) ن‑ومغار غ‑لگدّام ن‑ولقّاغ. كرايگاتّ يان يوسي لوتار، اسين ءولا تاطّاسين ن‑وورغ عمّرنين س‑لبخور لّي‑يگان تيژولّا ن‑يمژلاين ن‑ربّي.

⁹ ار‑تّيريرن يان‑ومارگ لّجديد ار‑تّينين: «كيّي ا‑يستهلّان ا‑تاسيت ارّا‑ياد تفسيت طّوابع‑نس، اشكو تّياوغراست تفروت مدّن س‑يدامّن‑نّك زغ‑كرايگاتّ تاقبيلت ءولا كرايگاتّ لّوغا ءولا كرايگاتّ تاسوت ءولا كرايگاتّ تامازيرت، ترارت‑تن اد‑گن كولّو وين ربّي.

¹⁰ تسكرت زغ‑گيسن ايت‑تگلديت ن‑ربّي‑نّغ ف‑ا‑ن‑سراسن غ‑لگدّام‑نس تيوافكيو ما‑س‑ا‑يترضو. د‑نتني ا‑را‑يحكام غ‑دّونيت.»

¹¹ سّماقّلغ‑ن‑داغ س‑سفلدغ ءي‑واقّور ن‑وافضان ن‑وافضان د‑يد‑والف ن‑يد‑والف لّمالايكا، سوتلن ءي‑لعرش د‑لمخلوقات د‑يمغارن.

¹² ار‑تّينين س‑واوال ءيتجهّدن: «ءيستهلّا‑ولقّاغ لّي‑يتياوغراسن ا‑يامژ لحوكم د‑لخير د‑تحكيمت د‑تژضّارت د‑تّوقير د‑لمجد د‑لحمد.»

¹³ سفلدغ غاكودان ءي‑كولّو ما‑يخلق ربّي غ‑يگنّا ءولا غ‑واكال ءولا غ‑دّو‑واكال ءولا غ‑ومدا، سفلدغ ءي‑كولّو ما‑يدّرن غ‑كرايگاتّ ماني ار‑تّينين: «ا‑ييلي لحمد د‑تّوقير د‑لمجد د‑لقوّا ءي‑والّي ءيسكيوسن ف‑لعرش ءولا ءي‑ولقّاغ، غيلاد ءولا كولّو مايد‑د‑يفتان.»

¹⁴ ءينينت كّوژط لمخلوقات: «امين.» ضرن‑ين ءيمغارن سجدن‑اس.