anurẓm 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لعرش ن‑ربّي

¹ ژرغ ءيلمّا كرا ياضني، يان‑يمي ءيرژم غ‑يگنّا. سفلدغ ءي‑واوال لّي‑ستّين‑يكّان ءيساول‑د سري، ءيگا زوند نّفّار، ييني‑يّي: «غلي‑د س‑غيد اد‑اك‑ملغ ما‑د‑يقّانّ ا‑يجرو تيگيرا.»

² ياوي‑يّي رّوح لقودوس غاكودان، س‑ژريغ يا‑لّعرش غ‑يگنّا، ژرغ ءولا غوالّي فلّاس ءيسكيوسن.

³ غوالّي ءيسكيوسن ف‑لعرش، ار‑زگيس‑كّاتن لالوان ن‑وژگُّاغ د‑وقرفي تيلي‑تسليت ن‑ونژار تسوتل ءي‑لعرش، ار‑تّيسفيو س‑تيفاوت تازگزاوت.

⁴ ژرغ سين ءيد‑مراو د‑كّوژ (24) لّعرش لولّين ءي‑لعرش‑ان، سكيوسن فلّاسن سين ءيد‑مراو د‑كّوژ (24) ن‑ومغار، لسن تيملسا تومليلين. كود يان، ءيلّا ف‑يخف‑نس يان‑تّاج ن‑وورغ.

⁵ ار‑د‑كّاتن‑ووسمانّ زغ‑دار لعرش، ييگات‑وقّريان ن‑يگّيگ. ار‑سّوفون سّا ن‑يسوفا غ‑لگدّام لّعرش، ا‑تن‑يگان د‑سّا لّارواح ن‑ربّي.

⁶ ييلي ءولا غ‑لگدّام لّعرش كرا ءيرواس يات‑تمدا ن‑جّاج ءيصفان زوند ادفل. ژرغ كّوژط لمخلوقات دّرنين، لولّينت ءي‑لعرش، كرايگاتّ يات غ‑تسگا. گّوتنت‑گيسنت‑والّن، لان‑تنت زغ‑لگدّام ءولا تيغوردين.

⁷ تامزواروت ترواس ءيزم. تيس سنات ترواس ازگر. تيس كراطّ، ءيرواس‑وودم‑نس ءودم ن‑ورگاز. تيس كّوژط ترواس ءيگيدر يوويلن.

⁸ كرايگاتّ يات غ‑لمخلوقات‑ان تطّاف سضيص ءيفراون، ءيگاتنت‑گيسنت‑والّن زغ‑كرايگاتّ ماني. ار‑تّيريرنت غ‑ييض ءولا ازال بلا‑دا‑تفسّانت ار‑تّينينت: «امژلاي، امژلاي، امژلاي ا‑يگا سيدي ربّي لّي‑يحكامن كولّو ما‑يلّان. ءيكّا‑تّين ءيلّا، ييلي، راد‑بدّا‑ييلي.»

⁹ كولّو ماد‑كّانت ار‑تالغنت ار‑تمجّادنت ار‑تحمادنت غوالّي ءيسكيوسن ف‑لعرش، ءيگ غوالّي بدّا ءيلّان راد‑بدّا‑ييلي.

¹⁰ ار‑ن‑طّارن سين ءيد‑مراو د‑كّوژ ن‑ومغار غ‑لگدّام ن‑والّي ءيسكيوسن ف‑لعرش، سجدن ءي‑والّي بدّا ءيلّان راد‑بدّا‑ييلي، ار‑ن‑تلوحن تّاج‑نسن غ‑لگدّام لّعرش ار‑تّينين:

¹¹ «وا‑ربّي سيديتنّغ، كيّي ا‑يستهلّان لمجد د‑تّوقير د‑لحوكم، اشكو كيّي ا‑يخلقن كولّو ما‑يلّان. هاتي ءيتياوخلاق ييلي، اشكو كيّي ا‑ت‑يران.»