anurẓm 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تابرات ءي‑ومناگّار غ‑سارديس

¹ «ارا اوال‑اد ءي‑لمالاك ن‑ومناگّار غ‑تمدينت ن‑سارديس: ها‑ما‑ينّا غوالّي دار سّا لّارواح ن‑ربّي ءولا سّا ن‑يتران. سّنغ كولّو ما‑تسكارت. ار‑تّينين مدّن ءيس‑تدّرت والاينّي تمّوتّ.

² رار لعاقل تسّدوست ما‑گيك‑يقامان ءور‑تا‑يمّوت. ءوفيغ‑ن مايلّي تسكارت ءور‑تا‑يكمّيل غ‑يژري ن‑ربّي‑نو.

³ سوانگم‑د ما‑تلمدت ءولا مايلّي مي تسفلدت غايد ءيزرين. سكار سرس، توورّيد‑د زغ‑دّنوب‑نّك. ءيغ‑ور‑ترورت لعاقل، هاتي را‑ن‑سرك‑اشكغ زوند امخّار، ءور‑را‑تيسّانت مان تاساعت غ‑را‑ك‑ين‑لكمغ.

⁴ والاينّي لّان سول دارك غ‑سارديس كرا ن‑مدّن دروسنين لّي‑ور‑سّركينين تيملسا‑نسن. نتني ا‑را‑ديدي‑يمون س‑تملسا تومليلين، اشكو نتني ا‑يستهلّان.

⁵ كولّو وانّا ءينران، را‑يلس ءولا نتّا تيملسيت تومليلت. راد‑ادّرغ ءيسم‑نس غ‑دار بابا ربّي ءولا لمالايكا‑نس، ءينيغ فلّاس ءيزد وينو ا‑يگا. ءور‑سار‑كّيسغ ءيسم‑نس زغ‑وارّا ن‑تودرت.

⁶ وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن.

تابرات ءي‑ومناگّار غ‑فيلادالفيا

⁷ «ارا اوال‑اد ءي‑لمالاك ن‑ومناگّار غ‑تمدينت ن‑فيلادالفيا: ها‑ما‑ينّا غوالّي ءيگان امژلاي ءيگ لحقّ، ءيطّاف تاساروت ن‑وگلّيد داود. اينّا رژمغ نكّي، ءور‑يژضار يان ا‑ت‑يقّن. د‑اينّا قّنغ، ءور‑يژضار يان ا‑ت‑يرژم.

⁸ سّنغ كولّو ما‑تسكارت. هاتي رژمغ يان‑يمي غ‑لگدّام‑نّك، ءور‑را‑ييژضار يان ا‑ت‑يقّن. سّنغ ءيس‑ور‑تژضارت ءي‑ما‑يگّوتن والاينّي تومژت غ‑واوال‑ينو، ءور‑تنّيت ءور‑يّي‑تسّينت.

⁹ ءيمّا مدّن‑ان ن‑ايت‑تگمّي ن‑تژالّيت ن‑شيطان، ار‑سّكيركيسن ار‑تّينين ءيزد ايت‑يودايا اد‑گان والاينّي ءور‑اكُّ‑گين ايت‑يودايا. را‑تن‑د‑اويغ اد‑كنون س‑واكال غ‑دار ءيضارن‑نّك، باش اد‑يسّانّ ءيزد كيّي ا‑داري‑يعزّان.

¹⁰ هاتي تصبرت تزگات غمكلّي‑ك‑وصّاغ. ف‑مايان ا‑ف‑را‑ك‑سّنتالغ غ‑تاساعت ن‑تنوكموت لّي‑را‑يزري ف‑دّونيت ا‑تارم كولّو ويلّي گيس زدغنين.

¹¹ غير ءيميكّ را‑ن‑اشكغ. امژ غ‑ما‑دارك‑يلّان، ا‑ور‑تادجت يان اد‑اك‑ياكُر تّاج‑نّك.

¹² كولّو وانّا ءينران، را‑ت‑گغ د‑تانّالت غ‑تگمّي ن‑ربّي‑نو، ءور‑سار‑تّ‑يفّوغ. را‑فلّاس‑اراغ ءيسم ن‑ربّي‑نو د‑يسم ن‑تمدينت ن‑ربّي‑نو، ا‑ستّ‑يگان د‑وروشاليم لّجديد لّي‑را‑د‑يگّوز زغ‑يگنّا زغ‑دار ربّي‑نو، اراغ فلّاس ءولا ءيسم‑ينو لّجديد.

¹³ وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن.

تابرات ءي‑ومناگّار غ‑لاوديكيّا

¹⁴ «ارا اوال‑اد ءي‑لمالاك ن‑ومناگّار غ‑تمدينت ن‑لاوديكيّا: ها‑ما‑ينّا غوالّي ءيگان ‹امين› ءيگ ءينيگي ءيصحان ءيزگان، ءيزوور كولّو ما‑يخلق ربّي.

¹⁵ سّنغ كولّو ما‑تسكارت. سّنغ ءيس‑ور‑تسمّيطّ ءولا ترغيت. امار يوفان غير ا‑تسمّيطّ نغد ا‑ترغت.

¹⁶ والاينّي تولبيت، ءور‑تسمّيطّ ءولا ترغيت. غايان ا‑ف‑را‑ك‑سّوفسغ زغ‑يمي‑نو.

¹⁷ ها‑كيّي ار‑تّينيت «لاباس گيگي. ءيگّوت داري لخير. ءور‑حتاجّاغ يات.» والاينّي ءور‑اكُّ‑تسّينت مامنك ا‑تضعفت تهرشت تژلضت تبوكضت تقامات بلا تيملسيت.

¹⁸ راد‑اك‑ينيغ يوف‑اك ا‑زغ‑داري‑تسغت ءورغ لّي‑يصفان س‑لعافيت ف‑ا‑دارك‑نّيت‑ييلي لخير. تسغت زغ‑داري ءولا تيملسا تومليلين ف‑ا‑تلست تدلت لعيب ن‑دّات‑نّك. تسغت زغ‑داري ءولا اسافار ءي‑والّن‑نّك ف‑ا‑تيسفيوت.

¹⁹ وينّا داري عزّانين ار‑تن‑تژيغ ار‑تن‑تربّاغ. اوي‑تّ غ‑يخف‑نّك غيلاد، توورّيد‑د زغ‑دّنوب‑نّك.

²⁰ ها‑يّي بيدّغ غ‑يمي ار‑سّضوقّورغ. ءيغ‑يلّا ما‑يسفلدن ءي‑واوال‑ينو ءيرژم‑يّي، را‑دارس‑كشمغ شّغ ديدس ءيشّ ديدي.

²¹ كولّو وانّا ءينران، راد‑اس‑فكغ ا‑ديدي‑يسكيوس ف‑لعرش‑ينو غمكلّي نريغ نكّي سكيوسغ د‑بابا ربّي ف‑لعرش‑نس.

²² وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن.»