anurẓm 22 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ ءيمل‑يّي ءيلمّا لمالاك اسيف ن‑وامان ن‑تودرت. ار‑يسّمرقيقيي زوند ادفل ءيصفان، ءيفّي‑د زغ‑دار لعرش ن‑ربّي د‑ولقّاغ،

² ءيفتو غ‑وامّاس ن‑وسوك ن‑تمدينت. ييلي‑وسغار ن‑تودرت غ‑سنات‑تسگيو ن‑واسيف. ار‑ياكّا لغلّت‑نس كرايگاتّ ايّور، سنات د‑مراوت‑توال غ‑وسگُّاس. گن ءيفراون‑نس اسافار ما‑س‑ا‑تجّين مدّن زغ‑كولّو تيميزار ن‑دّونيت،

³ ءور‑سار‑را‑تيلي تاگات. غين ا‑غ‑را‑ييلي لعرش ن‑ربّي د‑ولقّاغ. را‑تي‑تعبادن ءيخدّامن‑نس،

⁴ ار‑تمنادن ءودم‑نس، ءيتيارا ءيسم‑نس ف‑يگنزي‑نسن.

⁵ ءور‑سول‑را‑ييلي ءيض، والا را‑سول‑حتاجّان تيفاوت لّقنادل ءولا تين تافوكت. اشكو سيدي ربّي ا‑يگان تيفاوت‑نسن، د‑نتني ا‑را‑يحكام. ءور‑را‑سار‑يتمّو لحوكم‑نسن.

غير ءيميكّ را‑د‑ياشك لماسيح

⁶ ييني‑يّي ءيلمّا لمالاك: «أُغژانّ ءيواليون‑اد، لحقّ اد‑گان. سيدي ربّي لّي‑يدحاين س‑رّوح‑نس غويلّي ساوالنين س‑ماد‑اسن‑يمالا، يوزن‑د لمالاك‑نس غيلاد ا‑د‑يمل ءي‑يخدّامن‑نس ما‑د‑يقّانّ ا‑يجرو غ‑مايد‑د‑ياكمورن.»

⁷ ءينّا ياسوع: «هاتي غير يان ءيميكّ را‑ن‑اشكغ.» امباركي ا‑يگا وانّا ءيسكارن س‑يواليون لّي‑د‑يسّبايّن ربّي غ‑وارّا‑ياد.

⁸ نكّي يوحانّا سفلدغ ءي‑تغاوسيوين‑اد ژرغ‑تنت. لّيغ ءيزري كولّو مايد مي سفلدغ ژرغ‑ت، ضرغ‑ن اد‑سجدغ غ‑دار ءيضارن لّمالاك لّي‑يّي‑تنت‑يملان،

⁹ س‑يّي‑ينّا: «ا‑ور‑تسكرت غمكان، اشكو اخدّام كاد‑گيغ، زوند كيّي د‑ايتماك لانبيا ءولا كولّو ويلّي سكارنين س‑يواليون ن‑وارّا‑ياد. ربّي واحدوت ا‑تّعبادت.»

¹⁰ ءيزايد ييني‑يّي: «ءيواليون ن‑وارّا‑ياد لّي‑اك‑يسّبايّن ربّي، ا‑تن‑ور‑تقّنت س‑طّابع تحضوت‑تن. اشكو ياكمور‑د‑وزمز لّي‑غ‑راد‑كولّو‑يجرو مايد ءيتياران.

¹¹ وانّا ءيسكارن ما‑يُخشنّ، را‑يقاما غ‑ما‑يُخشنّ. وانّا ءيسكارن ما‑يسّركاون، را‑يقاما غ‑ما‑يسّركاون. وانّا ءيسكارن افولكي، را‑يقاما غ‑وفولكي. وانّا ءيرضان ربّي، را‑يقاما غ‑ما‑يرضان ربّي.»

¹² ءينّا ياسوع: «هاتي غير يان ءيميكّ را‑ن‑اشكغ، فكغ ءي‑كولّو مدّن ماد‑ستهلّان، رارغ ءي‑كرايگاتّ يان ف‑ما‑يسكر.

¹³ گيغ امزوارو گغ امگُّارو. گغ غوالّي ءيزوارن گغ غوالّي ءيگُّران. گغ ءيسيزوار گغ ءيسيگُّرا.»

¹⁴ ءيمباركين اد‑گان غويلّي سيردنين تيملسا‑نسن اد‑اسن‑ييلي لحقّ اد‑كشمن زغ‑يماون ن‑تمدينت شّن زغ‑وسغار ن‑تودرت.

¹⁵ ءيمّا غويلّي ركانين را‑ن‑قامان غ‑برّا. گان‑تن غويلّي سكارنين سّيحر د‑ويلّي تفسادنين د‑ويلّي نقّانين د‑ويلّي تعبادنين ءيلاهات ن‑دّونيت، نتني ءولا كولّو ويلّي سّكيركيسنين ار‑تفراحن س‑تكركاس.

¹⁶ «نكّي ياسوع ءوزنغ‑اون‑ين لمالاك‑ينو ا‑يمل تيغاوسيوين‑اد ءي‑يمناگّارن ن‑ايتماتن. گيغ اژور ن‑داود گغ اگُلاس‑نس. گغ ءيتري لّي‑يسفاون زيكّ صّباح.»

¹⁷ ءيساول‑د رّوح ن‑ربّي ءولا تاسليت ءينين‑اس: «اشك‑يد.» وانّا ءيسفلدن، ءيلّا فلّاس ا‑ييني: «اشك‑يد.» د‑وانّا ياغ ءيريفي، ءيژضار ا‑د‑ياشك، ءيسو زغ‑وامان ن‑تودرت، كولّو وانّا ءيران بلا ءيفكا يات.

¹⁸ اويات‑ستّ غ‑ما‑راد‑ينيغ ءي‑كولّو وانّا ءيسفلدن ءي‑يواليون لّي‑د‑يسّبايّن ربّي غ‑وارّا‑ياد: ءيغ‑يدّا يان ارد‑اسن‑يزايد كرا، راد‑اس‑يزايد ربّي كولّو تيگوضيوين لّي‑يبدر غ‑وارّا‑ياد.

¹⁹ ءيغ‑يدّا يان ارد ءيكّيس كرا زغ‑يواليون لّي‑د‑يسّبايّن ربّي غ‑وارّا‑ياد، راد‑اس‑يكّيس تاغامت ن‑وسغار ن‑تودرت ءولا غ‑تمدينت تامژلايت لّي‑يبدر غ‑وارّا‑ياد.

²⁰ ءيساول غوالّي‑د‑يسّبايّنّ تيغاوسيوين‑اد ييني: «لحقّ اياد. غير ءيميكّ را‑ن‑اشكغ.» امين. اشك‑يد ا‑سيديتنّغ ياسوع.

²¹ ا‑تيلي لباراكا ن‑سيديتنّغ ياسوع ءي‑يمژلاين ن‑ربّي كولّوتن. امين.